चलचित्रको स्क्रिप्ट सुनाउँदा अभिनेत्री निकिता चाण्डकले आफु रोएको बताइन् । अभिनेता तथा निर्देशक विराज भट्टले भने, ‘साङ्लो हेरिसकेपछि वलिउड र हलिउडमा चलचित्रको एक्सन कपी हुनेछ ।’

यस्तै विभिन्न प्रकारका अभिव्यक्ति दिएर प्रचार–प्रसारमा जुटेको थियो, साङ्लो टिम । चलचित्र प्रदर्शन हुनुभन्दा ठिक एक महिना अघिदेखि निकितालाई लिएर प्रमोशनमा हिडेका थिए विराज । उनले चलचित्र प्रदर्शनको अघिल्लो दिन साप्ताहिकसँग भने, ‘दर्शकले यो चलचित्रलाई मन पराउनेमा ढुक्क छु, किनभने चलचित्रको कन्सेप्ट र स्क्रिप्ट निकै भिन्न छ, चलचित्रको प्रस्तुतीकरण अहिले निर्माण भैरहेका चलचित्रको भन्दा धेरै फरक छ ।’

चलचित्र शुक्रवार प्रदर्शन भयो । मल्टिप्लेक्समा निकै कम शो पायो, सिगंलमा अलिकति बढि छन् । तर, जति शो पाएको छ अधिकांश हलमा सुनसान छन् । चलचित्र हेरिसकेपछि दर्शकको दिमाग घुम्नेछ, ‘चलचित्रको प्रचार–प्रसारमा भनेजस्तो स्क्रिप्टमा के नौलो छ ? प्रस्तुतीकरण कसरी फरक छ ? कहाँनिर छ, वलिउड र साउथले चोर्ने किसिमको एक्सन ?’ आफुले जन्माएका सन्तान हरेक अभिभावकलाई राम्रो लाग्छ । विराजलाई पनि त्यस्तै लाग्यो, स्वभाविकै हो ।

हुन त, चलचित्र प्रदर्शनभन्दा अघि विभिन्न गफ ठोक्ने र चलचित्र चलाउन खोज्ने नेपाली चलचित्रकर्मीहरुको पुरानै शैली हो । चलचित्रको स्तरियता भन्दा अझ बढि गफ नदिने हो भने दर्शक हलमा आउँदैनन् भन्ने पुरानै मानसिकता छ । त्यो विराजले पनि लागु गरे । तर, यो टिमले मन दह्रो पारेर स्विकार्नुपर्छ, चलचित्र हेर्न दर्शक आएनन् ।

कुनैबेलाका एक्सन स्टार हुन्, विराज भट्ट । उनले खेलेको पहिलो चलचित्र हो, खुकुरी । त्यसपछि उनले दर्जनौं चलचित्रमा काम गरे । विभिन्न भुमिकामा देखिए । कति दर्शकलाई अभिनय मार्फत रुवाए । कति दर्शकलाई हँसाए । जे–जे गरेर होस्, उनले एक दशक नेपाली चलचित्र उद्योगमा कव्जा जमाएकै हुन् । विराजले धेरै आशा राखे, भोजपुरी चलचित्रमा हानिए ।

भोजपुरी चलचित्रमा राम्रै चले । नेपालमा जस्तै टिके । राम्रै आम्दानी गरे । चार बर्ष भोजपुरी चलचित्रमा व्यस्त भएपछि उनको मन नेपाल फर्कियो । 

चलचित्र ‘जय परशुराम’बाट पुनः काम थाले । तर, यो चलचित्र चिप्लियो । किन ? प्रमोशनको दौरानमा विराजले भनेका थिए, ‘त्यतिबेला अन्तिममा निर्देशक परिवर्तन भए । स्क्रिप्टदेखि धेरै कुरामा कमजोर भएकाले चलचित्र चलेन ।’ ल ठिकै छ त्यतिबेला विभिन्न कारणले चलचित्र फ्लप भयो । त्यसो भए उनको डेव्यु निर्देशनमा तयार भएको चलचित्र ‘साङ्लो’लाई किन सोचेजस्तो सफलता हात परेन ? विराजले अहिल्यै यस विषयमा मुख खोलेका छैनन् ।

२०१७ की मिस नेपाल निकिता चाण्डकले यसअघि ‘रानीमहल’ बाट अभिनय–यात्रा थाले पनि उक्त फिल्म निर्माणकै क्रममा अड्किएको थियो । त्यसपछि उनी केहि समय विश्राम गरिन् । विराजले यो चलचित्रमा पुनः डेव्यु गराए । निकिताका अनुसार यो चलचित्रको अवस्था जे होस्, यो उद्योगमा उनी निरन्तर रहने छिन् ।

चलचित्रले हाइप बनाउन नसक्दा फ्लप हुन्छन् । विराजका अनुसार यो चलचित्रले राम्रै हाइप बनाएको थियो । यदि ‘साङ्लो’ को पनि ट्रेलर, गीत नचलेको भए यो चलचित्र चल्छ भन्ने आशा मरिसकेको हुन्थ्यो । तर, दर्शकले अघिल्ला कन्टेन्ट रुचाएका कारण चलचित्रलाई पनि रुचाउने विराजको विश्वास थियो ।

कमेडी चलचित्रको लहर चलिरहेका बेला एक्सनप्रधान चलचित्र दर्शकमाँझ ल्याएका हुन्, विराजले । कुनैबेलाका एक्सन स्टार अहिले पनि त्यसलाई दर्शकले रुचाउँछन् कि भन्दै एक्सनलाई धेरै प्राथमिकता दिएका छन् । विराज भन्छन्, ‘एक्सन प्रधान चलचित्रलाई दर्शकले सहर्ष स्विकार गर्नुहुनेछ ।’ तर, आज शनिवारको हल रिपोर्ट हेर्दा दर्शकले सहर्ष स्विकार गरेनन् ।

किड्नीका कारण निर्दोशले कसरी ज्यान गुमाउँछन् ? हुनेखाने र हुँदा खानेहरु विचका प्रेमिहरुको सम्वन्धमा परिवार कसरी भिलेन बन्छ ? अस्पताल प्रशासन जे गरेर हुन्छ, पैसा कमाउने खेलमा कसरी लाग्छ ? चलचित्रले देखाउन खोजेको विषय हो । तर, यो चलचित्रमा उठान भएको विषय कुनै नौलो छैन । संगीत पक्ष ठिकै छ । मुख्य भुमिकामा देखिएका अभिनेता विराज भट्ट र डेव्यु अभिनेत्री निकिता चाण्डकको अभिनय ठिकै हो । भिलेनको भुमिकामा देखिएका प्रकाश शाहको अभिनय राम्रो छ ।

तर, सबै ठिकै हुँदा पनि चलचित्र हेर्न दर्शकको भिड खासै देखिएन । किन ? चलचित्रको प्रस्तुतीकरण चुस्त छैन । स्क्रिप्ट कमजोर छ । चलचित्र राम्रो बन्न सक्ने धेरै बाटो थियो, तर त्यस विषयमा ध्यान दिन नसक्दा विराजको डेव्यु निर्देशन ‘पहिलो गासमै ढुंगा’ भनेजस्तै भएको छ । बाँकी ‘साङ्लो’को अवस्था के हुन्छ, पक्कै केहि दिनमा थाहा होला ।