विजय बराल नेपाली चलचित्र क्षेत्रमा स्थापित नाम हो । अग्र्यानिक अभिनयको उपाधि पाएका विजय रंगमञ्च हुँदै सिनेनगरीमा प्रवेश गरेका हुन् । १४ वर्षअघि सर्लाहीबाट कलाकार बन्ने सपना बोकेर काठमाडौ आएका उनले जीवनका अनेकन आरोह–अवरोहको सामना गर्नुर्‍यो । चर्चित हास्यकलाकार नारद खतिवडा र साथीहरुको प्रेरणाबाट कलाक्षेत्रमा प्रवेश गरेका उनले टेलीचलचित्र, विज्ञापनलगायतमा अभिनय गरे । जब उनले मण्डला थिएटरमा अभिनयको ज्ञान लिए तब  कलाकारिताको महत्व बुझ्न थाले । पछिल्लो समय उनी अभिनित चलचित्र कबड्डी कबड्डी कबड्डी प्रदर्शनका हङकङ आएका बेला कान्तिपुर साप्ताहिकका लागि अनोज रोक्काले गरेको कुराकानी :

दर्शकसँगै बसेर चलचित्र कबड्डी कबड्डी कबड्डी हेर्दा कस्तो प्रतिक्रिया पाउनु भयो ? 

जब म पर्दामा देखिन्थे, डाईलग बोल्थे तब दर्शकको ताली र हाँसोले उत्साहित बनायो । भेटमा सबैले राम्रो प्रतिक्रिया दिनुभयो । आगामी चलचित्रमा अझ विविध चरित्रको लागि शुभकामना दिनुभयो । 

के फरक हुनेरहेछ स्वदेश र विदेशका दर्शकमा ? 

जहाँको दर्शक भएपनि माया त उस्तै हो, स्वदेशमा सहजरुपमा समय निकालेर चलचित्र हेर्न नजिकका सिनेमा घरमा आउनुहुन्छ । तर विदेशमा व्यस्त समयको बाबजुत पनि चलचित्र हेर्न, कलाकार भेट््न आउनु भएका दर्शकको माया विशेष लाग्छ । 

तपाईंलाई कहिलेबाट अभिनयलाई नै करियर बनाउछु जस्तो लाग्यो ?

खासमा फिल्ममा भन्दा थिएटरबाट नै मैलै आफूलाई अभिनय गर्न सक्ने विजयको रुपमा पाएको हुँ । तर अहिलेपनि म खतरनाक अभिनय गर्ने कलाकार हो, जस्तो लाग्दैन । सिक्ने क्रम जारी छ । 

कलाक्षेत्रमा लागेर के पाएँ, के गुमाएँ जस्तो लाग्छ ? 

पाउन त सम्पूर्ण नेपाली दर्शकको माया पाएँ । गुमाउन चाहिँ पारिवारिक माया र सामीप्यता गुमाएँ । परिवारसँग फोनको भरमा औपचारिकता निभाउने काम मात्र भयो । अरुको माया पाएँ, आफ्नाको गुमाएँ जस्तो लाग्छ । 

परिवारलाई केही भन्नु छ ?

जीवनमा धन त कमाउँन सकिनँ तर धेरैले माया गर्नुहुन्छ । जीवनमा संघर्ष गर्दैछु । मलाई सधैं माया गर्नुहोला ।

कलाकारिताको सङ्घर्षबाट सिकेको पाठ के हो ? 

कलाकारिता सौख मात्र हैन, गहिरो चिन्तन र तपस्याको विषय पनि हो । 

अबको लक्ष्य ?

दर्शक माझ लिड रोलमा आउने दिनको प्रतीक्षामा छु ।