यसपालि तपाईंको दसैं कस्तो होला ?

- साप्ताहिक संवाददाता

आश्विन ३०, २०७२

केही दिन बाँकी रहेकाले दसैंमा उमंग कायमै हुन्छ कि भन्ने आशाचाहिँ छ । स्थिति पहिलेकै जस्तो भैदिए मेरो मात्र होइन सबैको दसैं राम्रो हुन्छ, तर देशको अवस्था हेर्दा केही भन्न सकिँदैन । 

नम्रता श्रेष्ठ, नायिका

दसैं आउन अझै बाँकी छ । सरकारले जति सक्दो छिटो पहल गरेर इन्धनको व्यवस्था गरिहाले हुन्थ्यो । त्यसो भए अहिले सोचेजस्तो नरमाइलो हुँदैन । सरकारले सकेन भने चाहिँ यो वर्षको दसैं अहिलेसम्मकै सबैभन्दा झुर दसैं हुनेछ । 

डिजे शिशिर

समस्या समाधान भए त राम्रै हुन्छ, नत्र रमाइलो गर्न सक्ने अवस्था रहँदैन ।

बादल प्रसाईं, गायक

देश जुन अवस्थाबाट गुज्रिरहेको छ, त्यसलाई हेर्दा त दसैं नरमाइलो हुने पक्का छ । यद्यपि आशा अझै मरेको छैन । 

विजय शिवाकोटी, गीतकार

यसपालि इन्धन नभएर हिंड्नुपर्ने भो’ । अब यो मोटा ज्यानको के गति हुने हो भनेर सम्झँदै डर लाग्छ । हे भवानी, मेरो र देशको समस्या सुल्झाइदेऊ । 

सिपी पौडेल ‘मोटे’, हास्यकलाकार

नाकाबन्दीले सबैलाई नराम्रोसँग असर गरेको छ । संस्कृतिलाई नियमितता दिने काम भने गर्नुपर्छ । म दुर्गा भवानीको अनुष्ठानमा लाग्छु । 

मोहन निरौला, निर्देशक

यो देशमा सधैंको दशा, यस्तोमा के–को दसैं ?

रेखा थापा, नायिका

देशको स्थिति विकराल भएकाले यसपालि घर इलाम नजाने भएको छु । काठमाडौंमै दसैं मनाउनुपर्ला ।

डेनी निरौला, गायक

खोइ, यसपालि त पेट्रोलकै लाइनमा बसेर टीका लगाइएला जस्तो छ ।

वर्षा राउत, नायिका

यसपालि दसैंको कुनै उमंग देखिँदैन । दसैं होइन, दशा आइरहेजस्तो लागेको छ ।

वसन्त निरौला, निर्देशक

यसपालिको मेरो दसैं खुकुरीको धारमा छ ।

चारैतिरबाट यो नाकाबन्दीको मारमा छ ।

गोविन्दप्रसाद उपाध्याय, गीतकार

विवाहको २५ औं वार्षिकोत्सव मनाउन म र मेरी श्रीमती दुईमहिने अमेरिका भ्रमणमा छौं । यहाँ मेरो चलचित्र ‘फूलैफूलको मौसम तिमीलाई’को प्रिमियर पनि गर्दैछौं । मेरो दसैं यसपटक अमेरिकामा । 

दिनेश डिसी, निर्देशक

न वाहनमा इन्धन, न चुलोमा इन्धन, धन हुनेले पनि पाएनन् इन्धन । सबै डामाडोल छ, कतै पनि जान नमिल्ने स्थिति छ । यस्तो अवस्थामा कसरी पो मनाउने हो दसैं ?

वसन्त सापकोटा, संगीतकार

गाडीहरू कम कुद्ने भएपछि धूलो उड्दैन, अनि धेरै बाँच्ने भैहालियो । त्यसैले दसैंमा सबैलाई दीर्घायुको कामना । भात पकाउन ग्याँस छैन, मासु केमा पकाउनु ? मेरो दसैं त यसपाला पेट्रोल र ग्याँसको लाइनमै बित्ने भो ।

शान्तिप्रिय, चलचित्र पत्रकार

तराईमा नाकाबन्दी र इन्धनको अभावले सारा नेपालीलाई दु:ख परेकाले यसपटकको दसैं उत्साहजनक हुँदैन । 

रोशन भट्टराई, गीतकार

भूकम्पमा मेरो घर बिग्रियो । दिदीको छोरा पनि चपेटामा पर्‍यो । फेरी देशको अवस्थाका कारण पनि दसैं मनाउने चाहना छैन ।  

नीता ढुंगाना, नायिका

इन्धनको अभावमा बित्छ कि भन्ने लाग्छ ।

लक्ष्मी ठाकुर, हेयर स्टाइलिस्ट

कोठामा ग्याँस नभएर सात दिनदेखि राम्रोसँग खाना खाइएको छैन । दसैंमा अब यो भन्दा बिजोग होला कि भन्ने डर छ । 

प्रमोद अग्रहरि, अभिनेता

नयाँ संविधान आएको वर्ष खुसीयाली हुनुपर्ने हो, तर नाकाबन्दीले आमजनता खुसी हुन सकिरहेका छैनन् । नयाँ प्रधानमन्त्री आएका छन् । त्यसैले अब केही होला कि भन्ने आशा छ ।

मणि लोहनी, कवि

सानो छँदा दसैंको प्रतीक्षा हुन्थ्यो । युवावस्थामा अर्कै रौनक हुन्थ्यो । अब सन्तानको खुसी नै प्यारो लाग्न थालेको छ, तर कहालीलाग्दो हाहाकारमा दसैं त देशकै दशाजस्तो भएको छ । हेरौं ओलीको सरकारले जनतालाई कस्तो राहत दिन्छ ?

विजयरत्न तुलाधर, निर्देशक

अब सधैं यस्तै हो भने देश र कामको चिन्ता लिइँदैन, बरु परिवार तथा इस्टमित्रहरूलाई समय दिएर जे जसरी सकिन्छ, त्यसरी दसैं मनाइन्छ ।

अर्जुन तिवारी, छायाँकार

मनमा उत्साह छैन, तनमा उमंग छैन । इन्धन नभएर काम छैन । काम नभएपछि धनमा पनि कटौती भएको छ । 

पवित्रा आचार्य, नायिका

भोकै दसैं मनाउन सकिन्न, छाक टारेर मनाउनुपर्ला । 

अनन्त तिमिल्सिना, निर्माण नियन्त्रक 

खसीको ठाउँमा फर्सी, रक्सीको ठाउँमा लप्सी, दुई–चार हात र दुई–चार गाँसमै बित्लाजस्तो छ दसैं । ससुराले टीका लगाउन बोलाउँदा दक्षिणाको ठाउँमा ४ लिटर पेट्रोल दिने भए आइन्छ, नत्र आइन्न भनिन्छ । 

दीपकराज गिरी, हास्यकलाकार 

संविधान बनेपछिको यो पहिलो दसैं आफ्नै गाउँ भोजपुरमा मनाउँदैछु । हाम्रो गाउँमा त दसैंको माहौल पनि सुरु भैसक्यो भन्ने सुनेको छु । दसैं लगत्तै संखुवासभाको कार्यक्रममा सहभागिता जनाउँदैछु । 

दावा के शेर्पा, गायक

अरू केही गर्न नसके पनि पिङ खेलेरै भए पनि दसैं मनाउँछु । 

मिङ्स लामा, गायिका

यसपटकको दसैंमा त म इजरायलमा बसोबास गर्ने नेपालीहरूसँग पो मनाउँदै छु त । 

ताराप्रकाश लिम्बू, संगीतकार

 

प्रकाशित :आश्विन ३०, २०७२

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

×