सर, पर्सि मेरो फिजिक्सको परीक्षा छ, मलाई केही महत्त्वपूर्ण प्रश्न बताइदिनुहोस् न, रोहितले आफ्ना छिमेकी फिजिक्स टिचरसँग आग्रह गरे ।
रोहित, तिमीले यो वर्ष मन लगाएर पढ्नुपर्यो, किनभने यो बोर्ड परीक्षा हो । त्यसैले म तिमीलाई कुनै प्रश्न बताउँदिन, शिक्षकले उत्तर फर्काए ।
यद्यपि रोहितले मानेनन् र उनले एउटा साथीको सल्लाहमा बजार गै गेसपेपर किने । परीक्षाको रिजल्ट आएपछि जब उनले आफ्नो फिजिक्स नम्बर देखे, उनी छानाबाट खसेझैं भए, किनभने फिजिक्समा उनको पासमाक्र्स पनि आएको थिएन ।
आजको समयमा रोहित मात्र त्यस्ता विद्यार्थी होइनन्, जो सर्टकटबाट सफलता प्राप्त गर्न चाहन्छन् । रोहितजस्ता किशोर–किशोरी अनेकौं भेटिन्छन् जो नाम त कमाउन चाहन्छन् तर त्यसका लागि खासै मेहनत भने गर्दैनन् ।
सफलता कुनै रूखमा फल्ने फल होइन जसलाई जतिबेला मन लाग्यो त्यतिबेला टिप्न सकियोस् । वैज्ञानिक लिर्डनले ठीकै भनेका थिए– हिजो हामी के थियौं र आज हामी के छौं, यो यस कुरामा निर्भर गर्छ कि हिजो हामीले के गर्यो र आज के गर्दैछौं ?
आजको युगमा हरेक व्यक्ति फलका लागि व्यग्र हुन्छन् । जसलाई हेर्यो सबै आफ्नो सानोतिनो प्रयासको धेरै ठूलो परिणाम प्राप्त गर्न लालायित देखिन्छन् ।
संसारका धेरैजसो सफल मानिसको सफलताको पछाडि के रहस्य छ भने उनीहरू आफ्नो काम पूरै लगन र गम्भीरताका साथ सम्पन्न गर्थे । आफ्नो विषयको पूरापूरा जानकारी राख्थे, साथै उनीहरू सफलता वा नामका लागि कहिल्यै अत्तालिएनन् ।
कुनै पनि काममा सफलता हासिल गर्न हामीले अनेकन निर्णय लिनुपर्छ जसको नतिजा राम्रो पनि हुनसक्छ र खराब पनि । यस्तोमा हामीले जोखिम उठाउन हिच्किचाउनु हुँदैन । जिम्मेवारीपूर्ण जोखिम उठाउने कुरा ज्ञान, आत्मविश्वास एवं योग्यतामा निर्भर गर्छ, त्यसैले यो कार्य अनुचित होइन ।
वास्तवमा समस्यासँग भिड्नु नै जीवन हो । सफलताको वास्तविक आनन्द तब प्राप्त हुन्छ जब हामी संघर्ष गरेर काम सम्पन्न गर्छौं । यस क्रममा आफ्नो उत्साहलाई अलिकति पनि डग्मगाउन दिनु हुँदैन । अनिमात्र सफलता प्राप्त हुनसक्छ । किनभने पटक–पटक खस्नु अनि उठ्नु र संघर्ष गर्नुनै सफलताका लागि गरिएको इमान्दार प्रयास हो ।
सफलताका लागि धैर्य, लगन, इमान्दारिता, कडा मेहनत एवं आत्मविश्वास महत्त्वपूर्ण गुण हुन् । आफ्नो जीवन सफल बनाउन हामीले प्रत्येक काम पूरै लगनका साथ सम्पन्न गर्नुपर्छ । सफलता हाम्रो नजिक आफै हिँडेर आउँदैन । त्यसका लागि हामी आफैंले बाटो खन्नुपर्छ । मेहनत र दृढ अठोटले नै सफलताको बाटो खोल्छ ।