खानेकुरामा प्रयोग हुने विषादीको प्रकोपबाट जोगिन के गर्नुपर्ला ?

- साप्ताहिक संवाददाता

श्रावण ७, २०७६

सकेसम्म आफ्नै करेसाबारीमा ताजा तरकारी उत्पादन गरौं । यदि ठाउँ छैन भने घरको कौसी वा छतमा गमला राखेर तरकारी फलाऔं । यति गरे विषादीको प्रकोपबाट पक्कै जोगिन सकिन्छ । 

दीपक तामाङ

विषादीको प्रकोपबाट बच्न एकदमै सजिलो छ । भारतबाट आयातित हुने तरकारी खानु भएन । आफ्नै बारीमा अर्गानिक तरकारी फलाउनुपर्‍यो । 

संस्कृति लामिछाने 

भारतको रासन बन्द गर्नुपर्‍यो । आफ्नै बारीमा खानेकुरा उत्पादन गरेर आफैंमा निर्भर हुन सक्नुपर्‍यो । 

नेत्रा राई 

घरेलु उत्पादनमा जोड दिनुपर्छ, त्यसपछि सकेसम्म बजारिया फलफूल तथा तरकारीको उपभोग कम गर्नुपर्छ । हामी आत्मनिर्भर हुनु नै सबैभन्दा राम्रो उपाय हो । 

राज अधिकारी 

अबदेखि हामी सबैले भारतीय तरकारी नखाने निर्णय गरौं, त्यसपछि समस्याको समाधान आफैं हुन्छ । 

प्रलाद सिलवाल

स्वदेशी उत्पादनमा जोड दिऊँ । कृषिमा आधुनिकता ल्याउने अनि बाहिरबाट आयात हुने तरकारी राम्रोसँग चेक गरेर मात्र भित्रिन दिने काम गरौं । 

फिरोज श्रेष्ठ

खानेकुरामा परिसकेको विषादीबाट कसरी जोगिनेभन्दा पनि कसरी मिसावट भयो, त्यसमै ध्यान पुर्‍याउनुपर्‍यो । हामी सबै आ–आफ्नो स्वास्थ्य प्रतिसजग हुनुपर्छ । सरकारका सम्बन्धित निकायले पनि प्रभावकारी ढंगले कदम चाल्नुपर्छ । 

नरिश्वर गौतम

केही गर्नै पर्दैन । फेसबुकमा स्टाटस लेखेर बस्ने र माइतीघर मण्डलामा उफ्रने समयमा आफ्नो गाउँको बाँझो खेतबारी खनेर तरकारी फलाउने, त्यसपछि विषादीको टन्टै साफ । 

गणेश बानियाँ

सरकारले हरेक प्रदेशका किसानले उत्पादन गरेको तरकारी किन्ने बन्दोबस्त मिलाउनुपर्छ । कोल्ड स्टोरको राम्रो चाँजोपाँजो मिलाउनुपर्छ । यति गरेपछि कुनै पनि देशको तरकारीमा आश्रित हुनुपर्ने बाध्यताको अन्त्य आफैं हुनेछ । 

विश्वप्रकाश

खानेले खाएपछि बेच्नेले त जे पनि बेचिहाल्छन् नि । आफैं पनि आफ्नो स्वास्थ्यप्रति सजग हुनुपर्‍यो अनि जिम्मेवार निकायले पनि आफ्नो काम राम्रोसँग गर्नुपर्‍यो । 

विप्लव मगर

हामी सबैले आ–आफ्नो घरको करेसा बारीमा तरकारी उब्जाउनुपर्छ अनि घरमा तयार पारिएको सिन्की तथा गुन्द्रुकको झोल खानुपर्छ । यति गरे तरकारीमा हुने विषादीबाट जोगिन सकिन्छ । 

तुलुसा बन्जरा 

खाद्य सुरक्षालाई सुनिश्चित गर्न खाद्य व्यापारलाई व्यवहारिक बनाउने । दोस्रो गुणस्तरमा ध्यान दिएर खानेकुरा जाँच गर्ने । यति गरे धेरै हदसम्म विषादीबाट जोगिन सकिन्छ । 

सपु अधिकारी

विषादी मुक्त तरकारीका लागि खाडी गएका सबै युवालाई स्वदेश फिर्ता बोलाउनु पर्‍यो । त्यसपछि आधुनिक औजार दिएर कृषिमा लगाउनु पर्‍यो । खाद्यान्नको उचित व्यवस्था, प्रबन्ध, संरक्षण, वितरण एवं भण्डारणमा सरकारले पनि चासो देखाउनुपर्‍यो । 

ब्रहिम विष्ट

सम्भव भएसम्म आफैं उत्पादन गर्ने, सस्तोको बहानामा जहाँ पायो त्यहीँ खरिद नगर्ने । अर्गानिक तरकारी उत्पादन गर्नेहरूलाई हौसला दिएर सहयोग पुर्‍याउने । 

कृष्ण रिजाल

नेपाल सरकारले कृषि उत्पादनमा लगानी गर्ने, बजार व्यवस्थापन गर्ने एवं आफैं अर्गानिक तरकारी उत्पादन गरेर स्वदेशी उत्पादनलाई प्राथमिकता दिने काम गर्‍यो भने तरकारीमा हुने विषादीबाट मुक्त हुन सकिन्छ ।

अन्जना सुनार

सरकारले बजारलाई आफ्नो अधिनमा ल्याएर विषादीयुक्त खानेकुरालाई बजारबाट विस्थापित गर्नुपर्छ । 

नवराज आचार्य 

विषादीबाट त जतिसक्दो जोगिने हो तर त्यसो गर्न निकै गार्‍हो छ । आफ्नो शरीरमा भएको विषादी बाहिर निकाल्न न्युट्रिसन सप्लिमेन्टको आवश्यकता हुन्छ, त्यसैले यसको प्रयोग गर्नुपर्छ । 

नरेश राई 

प्रकाशित :श्रावण ७, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्