साप्ताहिक संवाददाता
दर्शकले भरिएको तासमान हलभित्र जतिबेला ‘रातो र चन्द्रसूर्जे’ गीतको आवाजसँगै जताततै उफ्रिरहेका शरिरहरु देखिन सुरु भएका थिए त्यतिबेलै हल बाहिर आकाशमा पनि अष्ट्रेलियाको झण्डासँगै नेपालको विशाल झण्डा फर्फराइरहेको थियो ।
नेपालभन्दा धेरै परको अष्ट्रेलिया, अनि अष्ट्रेलियाको मूल भूमिभन्दा अझ पर समुद्रको यो टापु राज्य तासमानिया । पृथ्वीको पिँध अर्थात् एन्टाकर्टिका महादेशसँग नजिकै हुनेगरि यति पर यो अनकन्टारमा अष्ट्रेलियाको समकक्षमै नेपाली झण्डा फहरिएको देखिनु नेपाली मनको लागि गौरवबोध थियो ।
त्यसैले आइतबार बेलुकी होबार्टको यो कार्यक्रमस्थलमा आइपुगेका प्राय: दर्शकहरु हलभित्र पस्नुभन्दा अघि धमाधम नेपाली झण्डा सामुन्ने ‘सेल्फी’ खिच्दै रमाइरहेका देखिन्थे । अढाइ लाख जनसंख्या पनि नभएको अष्ट्रेलियाकै यो सबैभन्दा शान्त प्रादेशिक राजधानीमा पछिल्लो समय विस्तारै नेपाली संख्या पनि बढ्न थालेको छ ।
यस्तो अवस्थामा तासमान हल रहेकै रेस्टप्वाइन्ट होटलमा केहिदिन अघि मात्र नेपथ्य टोली आइपुगेको थियो । टोली आइपुग्नेबित्तिकै नेपालीहरुको सम्मानमा होटलले प्रवेशविन्दुमै रहेको आफ्नो राष्ट्रिय झण्डाको छेवैमा उत्रै आकारको नेपाली झण्डा फहराइदिएको थियो ।
‘नेपथ्य आउनु अगावै हामीले होटल व्यवस्थापनलाई संसारभर फैलिएका नेपालीहरुका निम्ति यस ब्याण्डको महत्व अवगत गराइदिएका थियौं’, स्थानीय आयोजक टोलीका छत्र थापा भन्छन्, ‘त्यसपछि उनीहरुले नै यसरी झण्डा फहराइदिने निर्णय गरिदिँदा ब्याण्ड मात्र नभएर यहाँ बसोबास गर्ने सम्पूर्ण नेपालीले सम्मानित महशुस गरेका छौं ।’
बेलुकीको ठीक सात बजे नेपथ्य कन्सर्टको चीरपरिचित घडी रोकिनेबित्तिकै ‘सा कर्णाली’ गीतको म्यूजिक भिडियो पर्दामा बग्न थालेको थियो । त्यसपछि कवि तुलसी ‘दिवस’को रचनामा ब्याण्डले हालसालै तयार पारेको नयाँ गीत ‘सम्झिराख’ को भिडियो देखाइयो । त्यसलगत्तै सुरुभएको कन्सर्ट अवधिभर नेपथ्यले आफ्नो होबार्टको पहिलो कार्यक्रमका श्रोताहरुलाई पुराना र नयाँ गीतहरुको संगालो सुनाएको थियो ।
यस वर्षको नेपथ्य अष्ट्रेलिया श्रृंखलाको अन्त्य भने मेलबर्नको क्राउन स्थित ‘द पाम्स’ मा पुगेर हुनेछ । नेपथ्यको यस वर्षको यात्रा संयोजन सिड्नीस्थित ‘नेपाली टच’ले गर्दैआएको छ भने तासमानियामा चाहिँ ‘तास इभेन्ट’ले आयोजना गरेको थियो ।
नेपथ्यका मुख्य गायक अमृत गुरुङलाई मंचमा, ड्रमसेटमा ध्रुव लामा, किबोर्डमा सुरज थापा, गितारमा निरज गुरुङ, बेस गितारमा सुविन शाक्य र मादलमा शान्ति रायमाझीले सघाएका थिए ।