सन् २०२० मा  निर्माण हुने प्रविधिहरू

- साप्ताहिक संवाददाता

माघ १०, २०७६

आकाशमा उड्ने कार

दक्षिण कोरियाली अटो कम्पनी हुन्डाई र एपमा आधारित ट्याक्सी सेवा कम्पनी उबरले उड्ने कार बनाउनका लागि साझेदारीको घोषणा गरेका छन् । अमेरिकाको लस भेगासमा भएको कन्ज्युमर इलेक्ट्रोनिक शो (सीईएस)– २०२० मा यी दुई कम्पनीले एयरक्राफ्टको अवधारणा सार्वजनिक गरेका थिए । यी कम्पनीहरूले बनाउन लागेको फ्लाइङ कारको कन्सेप्ट नासाबाट प्रेरित डिजाइनमा आधारित छ, जुन इलेक्ट्रिक हुनेछ । उक्त शोमा कम्पनीहरूले निर्माण गर्न लागेको कारको नमुनासमेत सार्वजनिक गरिएको थियो । हाल यो कार निर्माणका लागि यी दुवै कम्पनी मिलेर काम गरिरहेका छन् ।

अहिले हुन्डाईले उबरसँग मिलेर पर्सनल एयर भेइकल मोडल एस–११ मा काम गरिरहेको छ । यो कार निर्माण भइसकेपश्चात् करिब २ हजार फिटसम्मको उचाइमा उडान र २ सय ९० किलोमिटर प्रतिघण्टाको स्पिडमा १ सय किलोमिटरसम्म यात्रा गर्न सकिनेछ । इलेक्ट्रिक डिजाइनअनुसार बनेको यो कार चार्ज गर्नका लागि ५ देखि ७ मिनेट समय लाग्नेछ । प्रारम्भमा पाइलटको व्यवस्थासहित निर्माण हुने यो कारलाई बिस्तारै बिना पाइलटको बनाउने कम्पनीहरूले बताएका छन् । यो कारको क्याबिनमा ४ जनासम्मले यात्रा गर्न सक्नेछन् । यात्रुहरूको सुरक्षालाई मध्यनजर गर्दै कम्पनीले आपत्कालीनका लागि प्यारासुटको समेत व्यवस्था गर्ने बताएको छ । यी दुई कम्पनीले यो विमानलाई सन् २०२० को अन्त्यमा सार्वजनिक गर्ने योजना बनाएका छन् । 

टुथब्रस टेक

कोलगेटको प्लाक्लेस प्रो कम्पनीले मानिसको दाँत १० सेकेन्डमै सफा गर्न मिल्ने टुथब्रस टेक निर्माण गर्ने भएको छ । यो ब्रसले मात्र १० सेकेन्डमै मानिसका सबै दाँत सफा गर्ने काम गर्छ । यो ब्रस बक्समा माउथगार्डका रूपमा लगाउन मिल्ने किसिमको छ, जुन ब्रिस्टलले भरिएको हुनेछ, जसले एकै समयमा मानिसको दाँतमा भएको फोहोर सफा गर्ने काम गर्छ । यो ब्रसले ५ सेकेन्डसम्म मानिसको अगाडिको दाँतलाई र बाँकी ५ सेकेन्ड फेरि दायाँ–बायाँ दाँत भएको स्थानलाई सफा गर्छ । कम्पनीले यो ब्रसको मूल्य १ सय ९ युरो तोकेको छ । नेपालमा यो ब्रसको मूल्य भने १३ हजार ७ सय ५ रुपैयाँ पर्नेछ । यो ब्रस मार्चको अन्तिममा उपलब्ध हुने कम्पनीले बताएको छ ।

पानीमा चल्ने बाइक

अमेरिकाको लसभेगासमा भएको कन्ज्युमर इलेक्ट्रोनिक्स शोमा पानीमा पनि चलाउन सकिने इलेक्ट्रिक बाइकको लन्च गरिएको छ । न्युजिल्यान्डको स्टार्टअप मन्टा–५ कम्पनीले निर्माण गरेको यो बाइकलाई हाइड्रो फोइलर एक्सई–१ नाम दिइएको छ । स्टार्टअप मन्टा–५ ले बताएअनुसार यो इलेक्ट्रिक बाइकलाई नदीनाला, तालतलैया तथा समुद्रमा चलाउन सकिन्छ । पानीमा मात्र चल्ने यो बाइकलाई कार्बन फाइबर, ४ सय ६० वाटको इलेक्ट्रिक मोटर, एयरक्राफ्ट ग्रेड आल्मुनियम तथा टायरको स्थानमा हाइड्रोफाइल जडान गरी निर्माण गरिएको छ । यो बाइक पानीमाथि १९ किलोमिटर प्रतिघण्टाको स्पिडमा चलाउन सकिन्छ भने यसको स्पिडलाई राइडरले प्याडलको माध्यमबाट बढाउन र घटाउन सक्नेछन् । बाइक हल्का भएकाले यसलाई सजिलै एक स्थानबाट अर्काे स्थानमा लैजान पनि सकिन्छ । यो बाइक जून महिनादेखि बेलायतमा बिक्री वितरणमा आउनेछ । करिब ८ हजार पाउन्ड मूल्य निर्धारण गरिएको बाइकको नेपाली मूल्य करिब ९ लाख रुपैयाँ पर्नेछ । 

एमआई ब्यान्ड–५

शाओमी कम्पनीको एमआई ब्यान्ड ४ गत वर्ष सर्वाधिक बिक्री भएपछि कम्पनीले यो वर्ष आफ्नो नयाँ प्रोडक्टका रूपमा एमआई ब्यान्ड–५ लन्च गर्ने भएको छ । यो कम्पनीले निर्माण गरेको एमआई ब्यान्ड–४ सन् २०१९ मा फिटनेस ट्रयाकरहरूमध्ये सबैभन्दा धेरै बिक्री हुने डिभाइस बनेको थियो । शाओमी कम्पनी र यसको सहायक कम्पनी हुआमी अहिले एमआई ब्यान्ड–५ निर्माण कार्यमा लागिरहेका छन् । यो डिभाइस चीनमा आगामी जून महिनामा लन्च हुने अपेक्षा गरिएको छ । अब आउने फिटनेस ट्रयाकर डिभाइसमा १ दशमलव २ इन्चको डिस्प्ले हुनेछ, जुन एमआई ब्यान्ड–४ को तुलनामा ठूलो हो । एमआई ब्यान्ड–५ अघिल्लो मोडलको तुलनामा बढी विकसित र टिकाउ हुने बताइएको छ । यो ब्यान्डको चिनियाँ मूल्य १ सय ७९ चिनियाँ युआन तोकिने अनुमान गरिएको छ, तर इन्टरनेसनल भर्सनको मूल्य भने त्योभन्दा बढी हुने कम्पनीले बताएको छ ।

आईफोनको एसई–२ 

एप्पल कम्पनीको मोबाइल फोन आईफोन–११ प्रो बजारमा आएसँगै अहिले आईफोन एसई–२ को चर्चाले आईफोन लभरहरूलाई तरंगित बनाएको छ । कम्पनीले यो फोनलाई सन् २०२० भित्र लन्च गर्ने तयारी गरेको छ, जुन आईफोन एसईको अपग्रेड भर्सनका रूपमा लन्च हुने बताइएको छ । एप्पलले यस्तै प्रकृतिको फोन चार वर्षअघि सन् २०१६ मा पनि सार्वजनिक गरेको थियो । केही समयअघि कम्पनीले यसको मोडलको फोटो तथा भिडियो पनि सार्वजनिक गरेको थियो ।

उक्त सार्वजनिक आईफोनको फोटो र भिडियो हेरेपछि धेरैले यसलाई आईफोन–८ को जस्तो डिजाइनमा आउला भन्ने आँकलन गरेका छन् । आईफोन प्रयोगकर्ताहरूले  एप्पलले आईफोन–९ को नामले समेत सार्वजनिक गर्न सक्ने अनुमान गरेका छन् । आईफोन एसई–२ मा आईफोन–११ प्रोको जस्तै फ्रस्टेड ग्लास र स्टेन लेस स्टिल फ्रेम हुनेछ भने सिंगल रियर क्यामरा, थिक बेजल्स तथा टच आइडी बटन राखिनेछ । ४ दशमलव ७ इन्चको आईपीएस एलईडी रेटिना डिस्प्ले हुने मोबाइलमा सिंगल क्यामरा सेटअप हुनेछ ।

यसका साथै एसई–२ मा थिक बेजल्स, सर्कुलर बटन तथा फिंगरप्रिट सेन्सर पनि राखिने बताइएको छ । त्यस्तै यो फोनमा ए–१३ बायोनिक प्रोसेसर र ३ जीबी र्‍याम हुनेछ । आईफोन एसईको तुलनामा यो आईफोन मोटो र ठूलो हुने अनुमान गरिएको छ । यो आईफोनको पछाडिको भाग सिसाले बन्ने हुनाले यसमा वायरलेस चार्जिङ फिचर्सको सुविधा हुने अपेक्षा गरिएको छ ।

प्रकाशित :माघ १०, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

×