प्रणय दिवसमा खाना महोत्सव 

  • प्रेम दिवसमा सौराहा होटलमा ३० प्रतिशत छुट

- साप्ताहिक संवाददाता

माघ २७, २०७६

पछिल्लो समय प्रेम दिवसलाई नेपालमा विभिन्न तरिकाले सेलिब्रेसन गर्ने गरिएको छ । प्रेममा रहेका युवा–युवतीले आफ्नै तरिकाले प्रेम दिवस मनाउने गरेका छन् । प्रेम दिवससँग विवाहित जोडीहरु पनि गाँसिन् थालेका छन् । 

अब प्रेम गर्नेहरुले मात्रै होईन् विभिन्न संस्थाहरुले पनि प्रेम दिवस लक्षित विविध कार्यक्रमहरुको आयोजना गर्न थालेका छन् । प्रेम दिवसलाई लक्षित गरि पर्यटकीय नगरी सौराहामा मङ्गलबारदेखि ‘खाना महोत्सव’ हुने भएको छ । प्रेम दिवसको अवसर पारेर  हुन लागेको सौराहा खाना महोत्सवको तयारी पूरा भएको रेष्टुराँ एन्ड बार एसोसिएसन (रेवान) सौराहाले जनाएको छ ।

सिसुवार चौरमा हुने उक्त महोत्सवमा ४० खानाका कक्ष रहने छन् । महोत्सवमा स्थानीय तथा विदेशी खानाको परिकारसँगै स्थानीय कला, संस्कृति, वेशभूषाको प्रदर्शन गरिनेछ । 

महोत्सवअन्तर्गत सौराहाको हात्तीचोकदेखि ड्याकसम्म सडकमै खाने र सडकमै रमाउने व्यवस्था मिलाइनेछ । सडक किनारमै खाने र सडकमा नै सांस्कृतिक कार्यक्रम अवलोकन गर्ने व्यवस्था मिलाइएको छ । 

पर्यटकका लागि होटलमा ३० प्रतिशत र रेष्टुराँमा १५ प्रतिशत छुटको व्यवस्था मिलाइएको महोत्सवका संयोजक ध्रुव गिरीले जानकारी दिए । महोत्सवअन्तर्गत मेयरकप भलिबल प्रतियोगिता, प्रेमपत्र लेखन प्रतियोगिता, वेटर रेस, महिलाको म्युजिकल चेयर, बालबालिकाको बेलुन फुटाइ, डोरी तान्ने, अन्तरविद्यालय नृत्य प्रतियोगिता तथा सडक नाटकलगायत कार्यक्रम हुनेछन् । 

प्रेम दिवसको दिन महोत्सव प्रवेशका लागि काटिने टिकटबाट सङ्कलन भएको रकममध्ये ७५ प्रतिशत गौतमबुद्ध क्रिकेट रङ्गशालालाई दिइने आयोजकले जनाएको छ । जिल्लाको पर्यटन प्रवर्द्धन गर्ने उद्देश्यले गरिने महोत्सव वाग्मती प्रदेशका पर्यटनमन्त्री अरुण नेपालले उद्घाटन गर्ने कार्यक्रम छ । 

प्रकाशित :माघ २७, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

×