दलितमध्येका बादी तथा दमाईं समुदायले गैरदलितको घरमा गएर हुड्के नाच देखाएर अन्न र पैसा लिन्छन्। विवाह, व्रतबन्धजस्ता शुभ कार्यमा पनि हुड्को बजाएर रमाइलो गर्ने चलन छ। यसमा महिला र पुरुष दुवै 'जोडी' बनाएर गाउँछन्। पुरुषको बजाउने र महिलाको नाच्ने जिम्मेवारी हुन्छ।  यहाँका बासिन्दाले मान्दै आएको कुमाउँनी संस्कृतिबाट भित्रिएको यो नाच प्रदर्शन गर्न सीमा जोडिएका भारतीय गाउँका मानिसहरूसमेत आउँछन्। भारतको कुमाउँ क्षेत्र र सुदूरपश्चिमका पहाडी जिल्लाको भाषा र संस्कृतिमा समानता पनि पाइन्छ।