कोभिड–१९ संक्रमणको महामारीमा व्यापार–व्यवसाय ठप्पप्रायः छ । कम्पनीहरूको कारोबार चौपट भएको छ । व्यवसायीहरू सहयोगका लागि सरकार गुहारिरहेका छन् । आर्थिक संकटको चेतावनी विज्ञहरूले दिइसकेका छन् । तथापि केही यस्ता कम्पनी छन्, जसलाई महामारी र लकडाउनले खासै असर पारेको छैन । बरु, राम्रो मुनाफा कमाइरहेका छन् ।

दुई महिना नाघिसकेको नेपालभित्रको लकडाउनले नै प्रारम्भिक लक्षण देखाइसकेको छ– आउँदो वर्ष बेरोजगारीको दर झनै बढ्ने देखिन्छ । एकातिर देशभित्रै बेरोजगारी बढ्ने, अर्कोतिर विदेशबाट फर्किने युवाहरूले पनि रोजगारी गुमाउने अवस्थाका कारण चुनौती झन् थपिने पक्का छ ।

लकडाउनमा घरभित्र बसेर मात्रै दैनिक जीवनयापन हुन नसक्ने भएपछि मानिसले अनेक विकल्पहरू अँगालिरहेका छन् । नेपालीमा एउटा पुरानो शैलीको उखान छ– ‘खाने मुखलाई जुँगाले छेक्दैन’ । अर्थात् काम गर्ने र सिर्जनशील हुनेहरूलाई संकटको समयले पनि बाधा पुर्‍याउन सक्दैन । मानिसहरू यतिखेर नवीनतम सोंचले आफ्ना दैनिकी क्रियाकलापदेखि व्यवसायहरूसमेत हाँक्न थालेका छन् ।

विभिन्न तथ्यांकलाई आधार मान्ने हो भने हाल नेपालमा ८० हजार हेक्टरभन्दा बढी कृषि योग्य जमिन प्लटिङ अवस्थामा छ । यसरी प्लटिङ भएका जमिनमा कुनै पनि उत्पादनमुखी काम भएका छैनन् । कि त प्लटिङले ग्राहक कुरेर बसेका छन् कि घर ठडिने मिति ।