चाहे बाहिरी होस् वा भित्री घर सजावटमा फर्निचरको बेग्लै र महत्वपूर्ण भूमिका हुन्छ । फर्निचर घरको शोभा मात्र नभएर आवश्यकता भैसकेको अहिलेको समयमा फरक डिजाइन र शैलीका फर्निचर बजारमा उपलब्ध छन् । घरको आकर्षण बढाउनुका साथै सामाजिक हैसियतसमेत देखाउने यस्ता फर्निचरले घरलाई सपनाको घरमा परिणत गर्ने इम्पेरियल फर्निचरकी प्रनिता राणा बताउँछिन् । ग्रिन ब्याम्बो क्रिएसनका प्रबन्ध निर्देशक प्रणव प्रधान भने अहिले मानिसहरू वनविनाशलाई ध्यानमा राख्दै छिटो हुर्किने र इको फ्रेन्डली बाँसका फर्निचरप्रति आकर्षित भएको बताउँछन् । 

काठका फर्निचर 

काठका फर्निचरलाई बलिया, भरपर्दा र टिकाउ फर्निचरका रूपमा लिइन्छ । क्लासिक भिक्टोयिरन शैलीका जंगली सिसौका काठबाट निर्मित फर्निचर बिक्री गर्ने इम्पेरियल फर्निचरकी प्रनिता राणा भन्छिन्–काठलाई शुभसमेत मानिन्छ । त्यसका अतिरिक्त काठका फर्निचर टिकाउ हुनुका साथै आकर्षक एवं प्रयोगमा सहज हुन्छन् ।

जंगली सिसौका काठद्वारा निर्मित फर्निचर केही महँगा भए पनि गुणस्तरका हिसाबले अतुलनीय हुने राणा बताउँछिन् । बेस्ट इन्टेरियर नयाँ बानेश्वरका नेपाली कलात्मक बुट्टेदार फर्निचरले सबैको मन जित्दै आएको छ । त्यहाँका फर्निचरमा नेपाली कालीगढका कलात्मक सीप पाइन्छन् । बेस्ट इन्टेरियरका सञ्चालक हिरा महर्जनका अनुसार काठका फर्निचर टिकाउ हुने र कालान्तरमा डिजाइन पुराना भए पनि पुन:बिक्री गर्दा मूल्य नघट्ने कारणले अहिलेसम्म ग्राहकहरूले फर्निचरमा काठलाई नै प्राथमिकतामा राख्ने गरेका छन् । 

नेपालमा काठका फर्निचर बिक्री गर्ने कम्पनीहरूमा फर्निचर ल्यान्ड, करुणा फर्निचर, इडेक्स फर्निचर, एसबी, इस्तिकबाल फर्निचर, मनकामना फर्निचर, मुस्कान इन्टेरियर, बिरा फर्निचर, शान फर्निचर, आकृति आदि प्रसिद्ध छन् । 

काठका फर्निचरको स्याहार 

मलमलको कपडालाई लिक्विड डिटरजेन्टको घोलमा चोपेर हल्का निचोर्ने । उक्त कपडाले विस्तारै अर्थात् नघोटी फर्निचर पुछ्ने । यसरी सफाइ गर्दा चिसो रहन गए सुख्खा कपडाले पुछिहाल्नुपर्छ । काठका फर्निचर प्रत्यक्ष घामको किरण पर्ने स्थानमा राख्नु हुँदैन, किनभने त्यसबाट फर्निचरको रंग उड्न सक्छ । विभिन्न फर्निचरमाथि फ्लावर भास, ल्याम्प स्ट्याण्ड, पेन होल्डर आदि सजावटका सामग्री राख्दा प्याड वा नरम म्याट राख्नुपर्छ अन्यथा फर्निचर कोरिने, टुक्रिने र कलर जाने डर हुन्छ । काठका फर्निचर झ्यालको सीधा मुनि राख्नु हुँदैन । 

बेत–बाँसका फर्निचर 

ग्रिन ब्याम्बो क्रिएसनका प्रबन्ध निर्देशक प्रणव प्रधानका अनुसार अहिले नेपालीहरू बाँस तथा बेतका फर्निचरप्रति आकर्षित हुनुको कारण यी फर्निचर बलियो हुनु र प्राकृतिक देखिनुका साथै सस्तो हुनु पनि हो । बाँसका फर्निचर विशुद्ध नेपाली उत्पादन हुन् । बाँसका फर्निचर जुनसुकै स्थानमा पनि प्रयोग गर्न सकिन्छ । अहिले बाँँसको सोफासेट, स्टुल, डायनिङ टेबल तथा कुर्सी बढी रुचाइएका छन् । दुईवर्षे वारेन्टीसहित बिक्री भैरहेका यस्ता फर्निचर जाडोमा न्याना तथा गर्मीमा शीतल प्रकृतिका हुन्छन् । ७ सयदेखि ५० हजार रुपैयाँसम्म पर्ने यी फर्निचर सुलभ त छन नै साथै टिकाउ पनि छन् । 

बाँसका फर्निचर बिक्री–वितरण गर्ने आबारी धोबीधाराका निर्देशक तथा डिजाइनर नृपाल अधिकारीका अनुसार बाँसका फर्निचर हल्का हुन्छन् र तिनमा प्राकृतिक लचकता हुन्छ । यिनमा बस्दा थकाइ लाग्दैन भने शीतलता समेत प्राप्त हुन्छ । आबारीमा न्यूनतम ५ सय रुपैयाँदेखिका फर्निचर उपलब्ध छन् । घुन–कीरा नलाग्ने उपचार विधि अपनाइएकाले यस्ता फर्निचर ४० देखि ५० वर्ष टिक्छन् । अहिले होटल, रेस्टुराँ तथा निजी घरहरूमा समेत बाँसका फर्निचरको प्रयोग बढ्दो छ । सोफामा ५ वर्षे तथा अन्यमा ६ महिनादेखि ४ वर्षे वारेन्टी दिइने आबारीका फर्निचर बीचमा मर्मत–सम्भार नगरे पनि हुने खालका भएको दाबी गरिएको छ ।

हिमालयन ब्याम्बोका मार्केटिङ अफिसर कृष्ण अर्यालका अनुसार बाँसद्वारा निर्मित नेपाली कलात्मक शैली र डिजाइनका फर्निचर अमेरिका समेत निर्यात भएको थियो । कृष्ण भन्छन्– यस्ता फर्निचर विदेशीले बढी मन पराउँछन्, किनभने यसलाई ईको फ्रेन्डली प्रोडक्टका रूपमा लिइन्छ । राम्रो तथा टिकाउ हुँदाहुँदै पनि बाँँस मृत्यु संस्कारमा प्रयोग हुने भएका कारणले नेपालीहरू यसको प्रयोगमा अलि हिचकिचाउँछन् । 

रटआइरन फर्निचर

वानटाइम इन्भेस्टमेन्ट र लङलाइफ प्रयोगका रूपमा लिइने फलामका फर्निचरले अहिले मार्केट जमाइरहेका छन् । ठुला हाउजिङ, अपार्टमेन्ट तथा होटल मात्र होइन गार्डेन रेस्टुराँदेखि व्यक्तिगत घरसम्म यस्ता फर्निचरले स्थान पाइरहेका छन् । 

कुपण्डोलस्थित आकर्षणका सञ्चालक सगुन ढुंगानाका अनुसार रटआइरनका फर्निचरमा ग्राहकको रुचि बढिरहेको छ । काठ तथा आइरनको कम्बिनेसनका फर्निचरको फेसनसमेत उत्कर्षमा छ । सोफा, बेड, डायनिङ सेटलगायत बाल्कोनी–स्टेयर तथा डेकोरेटिभ रेलिङको माग बढ्दो छ । सगुन भन्छन्– फिनिसिङ र रंगको गुणस्तरअनुरूप यसको मूल्य निर्धारण हुन्छ । टिकाउपनको कुरै गर्नु पर्दैन यो वान–टाइम इन्भेस्टमेन्ट हो । आज किनेको सामान १० वर्षपछि मेन्टनेन्स गरेर बिक्री गर्दा पनि परल मूल्य प्राप्त गर्न सकिन्छ । सामानमा आउने समस्याको प्रकृति हेरी नि:शुल्कदेखि न्यूनतम मूल्यमा मेन्टेनेन्सको सुविधा प्रदान गरिने सगुन बताउँछन् । 

पाटनस्थित मेटलउडकी म्यानेजर शुभेच्छा जोशी भन्छिन्– फ्रेमिङ मेटल र टपिङस वुड मिश्रित फ्युजन मिनिमल स्टिक फर्निचर बढी चल्तीमा छन् । रेस्टुराँ, डिप्लोम्याट्स रेसिडेन्स, अफिस, फ्यामिली गार्डेन रेस्टुराँ आदिमा यस्ता फर्निचर बढी प्रयोग भैरहेका छन् । मेटलउडमा फलाम तथा काठ मिश्रित आकर्षक डिजाइन एवं शैलीका फर्निचर उपलब्ध छन् । 

पोदरेज स्टिल एण्ड आइरनका सञ्चालक प्रमोद गौतमले स्टिल–आइरन फर्निचरको गुण भनेकै कहिल्यै ननासिनु भएको बताए । गौतम भन्छन्– जस्तोसुकै विपदमा पनि यो नासिएर जाँदैन । यसलाई अजम्बरी सरह नै मान्दा हुन्छ, न कीराले खान्छ, न भँंचिएर–पसांगिएर जान्छ, यही कारणले मानिसहरू रट आइरन फर्निचरप्रति आकर्षित छन् । 

रट आइरन फर्निचरको प्रयोग 

सञ्जिता रिजाल

आइरन फर्निचरलाई हामीकहाँ विशेषत: आउटडोर फर्निचरका रूपमा लिइन्छ । विदेशतिर बेडरुमदेखि किचन, डायनिङ तथा लिभिङमा यस्ता फर्निचर चित्ताकर्षक ढंगले प्रयोग गरिएको पाइन्छ । अब बिस्तारै नेपालीहरू पनि रटआइरन फर्निचरप्रति आकर्षित भैरहेका छन् । अहिले त यो फर्निचर घरबाहिरको बगैंचामा मात्र होइन, किचन–डायनिङ हुँदै बेडरुमसम्मै पुगिसकेको छ । घरका साना–ठूला कर्नर स्पेसमा रटआइरन फर्निचर प्रयोग हुन थालेका छन् । आइरन–वुड फ्युजन बेडहरू अत्यन्तै क्लासी देखिन्छन् । रटआइरनका सोफासेट तथा डायनिङ मात्र होइन देवानदेखि स्टडी टेबलसम्म प्रयोगमा आइसकेका छन् । 

बाँसको फर्निचरको सुरक्षा कसरी गर्ने ?

    बाँसको फर्निचरलाई सकेसम्म पानीबाट जोगाउनुपर्छ ।

    हरेक महिना फर्निचरमा तेल लगाउँदा यसमा चमक आउनुका साथै बलियो हुँदै जान्छ ।

    साबुन पानीमा स्पन्ज वा टाबल डुबाएर हल्का सुक्खा पारी सफा गरिरहनुपर्छ । त्यसअघि ब्याम्बो फर्निचरको धूलो झार्न ब्रस वा भ्याकुम गर्न बिर्सनु हुँदैन् ।

    लिक्विड सप वा साबुन पानीले सफा गरिसकेपछि सुक्खा कपडाले राम्रोसँग पुछ्नुपर्छ । 

    चिल्लो वा तातो पदार्थ पोखिएको छ भने तुरुन्तै सफा गरिहाल्नुपर्छ ।