डिट्ठा सा’बको ५२ भाग

कान्तिपुर टेलिभिजनबाट प्रसारण भैरहेको हास्यश्रृंखला 'डिट्ठा सा'ब' ले प्रसारणको ५२ औं भाग पूरा गरेको छ। प्रत्येक शुक्रबार साँझ ७:३० बजे प्रसारण हुने यो श्रृंखलाले ५२ भाग पूरा गरेको अवसरमा गत बुधबार काठमाडौंमा एउटा अनौपचारिक कार्यक्रम आयोजित गर्दै खुसीयाली साटासाट गरेको छ। समसामयिक विषयलाई व्यंग्यात्मक शैलीमा प्रस्तुत गरिने यो श्रृंखलाको निर्देशक किशोर भण्डारी हुन्। श्रृंखलामा भण्डारीले निर्वाह गरेको डिट्ठा सा'बको भूमिकालाई दर्शकले मन पराएका छन्। भण्डारीकै लेखनमा तयार गरिने यो श्रृंखलामा निर्देशक भण्डारीसहित रेश्मा तिमिल्सिना, राजु कमेडी, सुबोध गौतम, सुशीला अर्याल, कमला भट्ट, सञ्जय लामा, रामबाबु तिवारी, लकी भण्डारी आदि कलाकारले अभिनय गरिरहेका छन्।