नक्साल नागपोखरीलाई दायाँ पारेर नारायणहिटी संग्रहालयको उत्तर ढोकातर्फ लम्कने क्रममा गणतन्त्र पार्कभित्र मानिसहरूको भीडभाड थियो । यसो नियालेर हेर्दा त्यहाँ चर्चित कलाकारहरू हरिवंश आचार्य, किरण केसी, निरुता सिंह, आँचल शर्मा, पुष्प खड्का, नृत्य निर्देशक कविराज गहतराजलाई प्रस्ट देखियो । त्यहाँ विभिन्न पोसाकमा सजिएका अन्य थुप्रै मानिस पनि थिए । झलक्क हेर्दा जो–कोहीले प्रस्ट बुझिहाल्थे कि, त्यहाँ कुनै गीत अथवा चलचित्रको छायाँकन हुँदैछ ।

आखिर, वास्तविकता पनि त्यही थियो । शनिबारको दिन त्यहाँ चलचित्र दाल भात तरकारीमा समावेश ‘भिजिट भिसामा’ गीतको छायांकन भैरहेको थियो । निर्माण सम्पन्न भैसके पनि उद्घाटन भएर सुचारु भैनसकेको गणतन्त्र पार्कमा पहिलो पटक नेपाली चलचित्रको गीतको सुटिङ भएको हो । वैशाख १३ गते प्रदर्शनमा आउने यो चलचित्रमा समावेश गीत ‘भिजिट भिसामा’ हरिवंश आचार्यको शब्द तथा शम्भुजित बाँस्कोटाको संगीत छ । उक्त गीतको भिडियोमा चलचित्रका सबैजसो कलाकारलाई देख्न सकिन्छ, जसमा हरिवंश आचार्य, निरुता सिंह, वर्षा राउत, पुष्प खड्का, आँचल शर्मा, राजाराम पौडेल आदि प्रमुख छन् । 

गीतको छायांकन स्थलमा कोरसहरूको भीडभाड पनि त्यत्तिकै थियो । उक्त गीतमा ९० जनाभन्दा बढी सहायक कलाकार प्रयोग गरिएको छ । कोरसको बीचमा उभिएका अभिनेता पुष्प खड्का र अभिनेत्री आँचल शर्मा गीतको छायांकनका क्रममा निकै प्रफुल्लित देखिन्थे, साथै उत्साहित पनि । यस्तै उत्साहित थिए— राजाराम पौडेल, निरुता सिंह, हरिवंश आचार्य अनि वर्षा राउत । यही उत्साहका बीच शनिबारको सुटिङ सकियो । शनिबार बिहान करिब साढे ९ बजे सुरु भएको उक्त गीतको छायांकन साँझ पौन ५ बजेसम्म गरिएको थियो । त्यो दिन पनि गीतको छायांकन नसकिएपछि भोलिपल्ट आइतबारका लागि समय तय गर्दै सुटिङ युनिट बिदा भयो । चलचित्रमा समावेश गरिएको भिजिट भिसामा शीर्षकको यो गीत ४ मिनेट ३७ सेकेन्ड लामो छ । 

शनिबार भैरहेको गीतको छायाँकन स्थलमा कलाकार मदनकृष्ण श्रेष्ठ, दाल भात तरकारीका निर्देशक सुदन केसी, शिशिर भट्ट साथै बागबजारस्थित मोडल अस्पतालका चिकित्सकहरूको पनि उपस्थिति देखियो । उक्त गीतको छायांकन यसअघि त्रिभुवन अन्तर्राष्ट्रिय विमानस्थलमा एक दिन र हायात होटलमा एकदिन गरिएको थियो । 

चलचित्र दाल भात तरकारीमा तीनवटा गीत समावेश छन् । यतिबेला चलचित्र युनिट शिर्ष गीत दाल भात तरकारीको सुटिङका लागि पोखरामा छ । यो गीतमा पनि हरिवंशकै शब्द छ । उक्त गीतको भिडियोलाई प्रविण सिंहले निर्देशन गर्दैछन्, जसमा ७० जना कोरस प्रयोग गरिने चलचित्र दाल भात तरकारीका निर्माता किरण केसीले बताए । उक्त गीतको छायांकनपछि चलचित्र दाल भात तरकारीको सम्पूर्ण छायांकन सम्पन्न हुने केसीले जानकारी दिए ।