एक्सन अभिनेताका रूपमा परिचित निखिल उप्रेतीको चलचित्र ‘कमिटमेन्ट सिक्सटी आवर्स’ पनि छायांकनकै बीचमा रोकिएको छ । महँगो बजेट भनिएको यो चलचित्रमा बलिउडका कलाकारको अभिनय रहे पनि यसको काम सकिएको छैन ।

२०७४ वैशाख १७ गते चलचित्र ‘लभ लभ लभ’ की निर्मात्री शर्मिला पाण्डेले नेपालबाट हिँडेरै अमेरिका पुग्ने तीन नेपालीको कथामा आधारित रहेर नयाँ चलचित्र निर्माण गर्ने घोषणा गरिन् । दीपेन्द्र के खनालले निर्देशन गर्ने भनिएको यो अनटाइटल चलचित्रका अन्य दुई कलाकारपछि फाइनल गर्ने गरी अभिनेता खगेन्द्र लामिछाने मात्र सार्वजनिक गरियो । दीपेन्द्रकै कथा रहने भनिएको यो चलचित्रको वर्तमान अवस्था के छ, स्वयं निर्माण पक्ष र निर्देशक मात्र जानकार छन् ।

२०७४ जेठ २१ गते आशुसेन फिल्म्सले तत्कालीन राजा दीपेन्द्र शाहमाथि आधारित रहेर चलचित्र ‘दीपेन्द्र सरकार’ निर्माणको घोषणा गर्‍यो । राजधानीको याक एन्ड यती होटलमा निकै तामझामका साथ आयोजित घोषणा कार्यक्रममा चलचित्रका केन्द्रीय पात्र दीपेन्द्रका रूपमा अभिनेता प्रदीप खड्कालाई युवराजधिराजकै गेटअपमा उपस्थित गराइयो । चलचित्रका निर्माता सन्तोष सेनले नेपाल, बेलायत र अमेरिकामा भव्य सेट खडा गरेर चलचित्र ‘दीपेन्द्र सरकार’ छायांकन गर्ने भने पनि यो चलचित्रको अहिले ‘चाइचुइँ’ केही छन् । 

चलचित्र ‘दीपेन्द्र सरकार’ र अनटाइटल चलचित्रजस्तै पछिल्लो दशकमा धेरै चलचित्र निर्माण गर्ने घोषणा गरिए पनि नबनेका उदाहरण उस्तै छन् । निकै तामझाम र प्रचारप्रसार गरी चलचित्र निर्माणको घोषणा गरे पनि पछि भने निर्माण पक्ष चापचुप नै छन्् । एभरेस्ट सूर्य बोहोराको ‘भैरे–२’, अभिनेत्री रेखा थापाको ‘कसले चोर्‍यो मेरो मन फेरि’, ‘रत्ना’, विचल किराँतीको ‘राजा साहेब’, प्रदीपकुमार उदयको ‘अधकट्टी–२’, रविन श्रेष्ठको ‘मुखौटा–२’, भुवन केसीको ‘करोडपति–२’, करण क्रेजी श्रेष्ठको ‘ल्याङल्याङ’ निर्माण हुने हल्लाखल्ला भए पनि निर्माण नभएका चलचित्रमा पर्छन् । चलचित्र ‘राजा साहेब’ले त काठमाडौंमा कलाकार सार्वजनिक गरेरै चाँडै सुटिङ गर्ने घोषणा गरेको थियो, तर व्यवहारमा कहीँकतै देखिएन ।

हल्लै बढी

करिब ५ करोड रुपैयाँको लागतमा निर्माण गर्ने भनिएको शर्मिलाको अनटाइटल प्रोजेक्टको चलचित्र नेपालबाट सुरु भई भारत, थाइल्यान्ड, ब्राजिल, कोलम्बिया, मेक्सिको हुँदै अमेरिकामा टुंगिने भनिएको थियो, तर त्यो यात्रा न त सुरु भयो, न त टुंगियो नै । नेपालबाट अमेरिकासम्म पुगेर यो चलचित्र नबनाए पनि शर्मिलाले नेपालमै ‘चंगाचेट’, ‘घर’ र हाल पोस्ट प्रोडक्सनमा रहेको चलचित्र ‘आमा’ बनाइन् । चलचित्र ‘चंगाचेट’ र ‘आमा’का निर्देशक दीपेन्द्र के खनाल नै हुन् ।

सन्तोषले ‘दीपेन्द्र सरकार’को घोषणा कार्यक्रममा चलचित्रका लागि ५ करोड ५० लाख रुपैयाँको लगानी रहने बताएका थिए । उनले नेपाल, बेलायत र अमेरिकामा भव्यसेट बनाएर चलचित्र छायांकन गरिने भने पनि त्यो घोषणालाई थाँती राखेर उनी यतिबेला ‘प्रेमगीत’को तेस्रो सिरिज ‘प्रेमगीत ३’को निर्माण गरिरहेका छन् । यो निर्माणाधीन चलचित्रका लागि उनले कीर्तिपुरमा सेट नै बनाएका छन् । जुन चलचित्रमा अभिनेता प्रदीप खड्का प्रमुख भूमिकामा छन् ।

विचल राईको चलचित्र ‘राजा साहेब’मा मुख्य भूमिकामा देखिन लागेका अभिनेता रमित ढुंगानाले चलचित्रकै लागि १८ लाख रुपैयाँ पारिश्रमिक लिएको चर्चा चल्यो । चलचित्रका लागि रमित फरक गेटअपमा देखिने भनिए पनि घोषणा कार्यक्रममा लामो दाह्रीमा देखिएका रमित ‘राजा साहेब’का लागि के गर्दैछन् भन्ने निर्माण पक्षबाहेक अन्यलाई अत्तोपत्तो छैन । 

एक्सन अभिनेताका रूपमा परिचित निखिल उप्रेतीको चलचित्र ‘कमिटमेन्ट सिक्सटी आवर्स’ पनि छायांकनकै बीचमा रोकिएको छ । महँगो बजेट भनिएको यो चलचित्रमा बलिउडका कलाकारको अभिनय रहे पनि यसको काम सकिएको छैन । बरु निखिल ‘भैरव’को सिरिज ‘आयो भैरव’को काममा व्यस्त छन् । 

वास्तविक प्रेमकथामा आधारित रहेर निर्माण गरिएको चलचित्र ‘बोबी’ को सिक्वेल ‘बोबी–२ : बाँकी कथा’ निर्माण घोषणा गरिएको एक वर्ष हुन लाग्दा यसको पनि अत्तोपत्तो छैन । उमेश थापा र कविता गुरुङको वास्तविक प्रेमकथा प्रस्तुत गरिएको चलचित्र ‘बोबी’ले औसत सफलता पाएपछि निर्देशक मिलन चाम्सले आफ्नै निर्माण र निर्देशनमा ‘बोबी–२ : बाँकी कथा’को घोषणा गरेका थिए । चाम्स इन्टरटेनमेन्टको ब्यानरमा निर्माण हुने भनिएको यो चलचित्र गत वर्षको चैतमै फ्लोरमा जाने भनेपनि अहिलेसम्म छायांकन सुरु भएको र सकिएको कहींकतैबाट खबर आएको छैन ।

मिलनकै निर्देशन तथा निर्माता सुदीप खड्काको निर्माण बन्ने भनिएको चलचित्र ‘ब्याचलर बन्टी’ पनि चर्चा पाएर नबनेको अर्को चलचित्र हो । यो चलचित्रका लागि अभिनेता अनमोल केसीले ५० लाख पारिश्रमिक लिएको खबरले चलचित्र क्षेत्र गर्माएको थियो, तर सम्झौताको केही समय बित्न नपाउँदै अनमोलले चलचित्र नगर्ने निर्णय लिए । अनमोलले चलचित्र नगर्ने निर्णय लिएको केही समयपछि निर्देशक मिलनले पनि आफूले चलचित्र नगर्ने केही अनलाइन सञ्चारमाध्यमलाई बताएका थिए ।

किन रोकिए चलचित्र ?

घोषणा भएका चलचित्र नबन्नुमा निर्माता तथा निर्देशकको आ–आफ्नै धारणा छ । कोही बजेटको अपुग, कोही स्क्रिप्टको काम त कोही सरकारी पक्षबाट ढिला भइरहेको दाबी गर्छन् । चलचित्र ‘दीपेन्द्र सरकार’का निर्माता सन्तोष सेन आफ्नो चलचित्र अहिलेसम्मकै ठूलो प्रोजक्ट भएको र त्यसलाई दुई चरणमा लैजानुपर्ने भएकाले समय लागेको बताउँछन् । ‘हामीले दरबारको कथा देखाउन लागेका हौं । चलचित्रको स्क्रिप्टको काम भइरहेको छ । दरबारसम्बन्धी कथाको चलचित्र भएकाले दरबार र सरकारले चलचित्रको स्क्रिप्ट फाइनल गरेपछि काम अघि बढ्छ । हामी अहिले त्यही काम गरिरहेका छौं’, सेन भन्छन्, ‘एउटा वास्तविक कथालाई चलचित्रको कथात्मक शैलीमा मिलाएर लैजाँदा समय लाग्दो रहेछ । हामी दर्शकलाई भ्रम र दरबारलाई अप्ठ्यारो नपर्ने हिसाबले चलचित्र बनाउँछौं । त्यसकारण पनि समय लागेको हो ।’ 

निर्देशक खनाल नेपालबाट हिँडेरै अमेरिका पुग्ने कथाको चलचित्रमा केही अप्ठ्यारा आएकाले चलचित्र बन्न समय लागेको बताउँछन् । ‘चलचित्रको काम गर्न केही अप्ठ्यारा समस्या देखिएका छन् । मुख्य कुरा त बजेट नै पुगेको छैन । चलचित्रको कथाअनुसार प्रमुख कलाकार विभिन्न देशको यात्रा गर्दै अमेरिका पुग्नुपर्ने हुन्छ । चलचित्रका लागि प्रतिबद्ध कलाकारको खाँचो छ । यो चलचित्रका काम गरेपछि केही समयका लागि कलाकारले घरपरिवार र देश नै छोड्नुपर्ने हुन्छ, तर नेपालका कलाकारहरू एउटा चलचित्रको काम सक्न पाएको छैन, अर्को चलचित्रमा अभिनय गर्न हतारिन्छन्’, उनी भन्छन्, ‘अर्को प्रमुख समस्या भनेको सुरक्षा पनि हो । नेपालबाट सुरु भएको चलचित्रको कथा भारत, थाइल्यान्ड, ब्राजिल, कोलम्बिया, मेक्सिको हुँदै अमेरिकामा टुंगिन्छ । नेपालबाहेकका देशमा सुटिङ गर्नका लागि सुरक्षाको प्रबन्ध कसरी गर्ने भन्ने सल्लाह भइरहेको छ । कलाकार र प्राविधिकको ठूलो टोलीलाई सुरक्षाको ग्यारेन्टी नभएसम्म सुटिङ गर्न त समस्या भइहाल्छ नि ।’

निर्मात्री तथा निर्देशक रेखा थापा आफ्नो योजनामा चलचित्र ‘कसले चोर्‍यो मेरो मन’को सिक्वेल ‘कसले चोर्‍यो मेरो मन फेरि’ परे पनि त्यसका लागि केही समय लाग्ने बताउँछिन् । ‘कसले चोर्‍यो मेरो मन फेरि र रत्ना बनाउने चर्चा चलिरहँदा रुद्रप्रिया बनाएँ’, रेखा भन्छिन्, ‘कुनै पनि चलचित्र घोषणा गर्नासाथ बन्छ भन्ने पनि छैन । त्यसका लागि आन्तरिक तयारी भइरहेको छ ।’

चलचित्र ‘बोबी–२ : बाँकी कथा’का निर्माता तथा निर्देशक मिलन चाम्स चलचित्रको स्क्रिप्टको काम सकिए पनि निर्माणको काम भने केही समय लम्बिने बताउँछन् । ‘चलचित्र नबन्ला कि भन्ने कुरामा शंका नगर्दा नै राम्रो हुन्छ । चलचित्र भन्नासाथ नै निर्माण हुँदैन’, उनी भन्छन् । मिलन अहिले ‘गोर्खा वारियर’ मा व्यस्त छन् ।  

बन्लान् त रोकिएका चलचित्र ?

घोषणा गरिएका चलचित्र बन्नेमा निर्माता तथा निर्देशकहरू ढुक्क छन् । अहिले तयारी चरणमा रहेको बताउने उनीहरूले आफ्नो चलचित्र बन्नेमा ढुक्क रहन दर्शकसँग आग्रह गरेका छन् । निर्देशक खनाल चलचित्रको स्क्रिप्टको काम भइरहेकाले चलचित्र बन्ने वा नबन्ने भन्ने दोधारमा नरहन आग्रह गर्छन् । । ‘स्क्रिप्टको काम अन्तिम चरणमा पुगेको छ । हामीलाई मेथड एक्टिङ गर्ने कलाकार चाहिएको छ । त्यस्तो कलाकारको खोजी भइरहेको छ’, दीपेन्द्र भन्छन्, ‘हामी मेथड मेकिङ गर्दैछौं । यसको प्रयोग चलचित्र आमामा पनि गरेका छौं । यो केही भिन्न र संवेदनशील मेकिङ भएकाले यसमा केही समय लाग्छ ।’

निर्मात्री तथा अभिनेत्री रेखा चलचित्र ‘कसले चोर्‍यो मेरो मन फेरि’ ठूलो क्यानभासको हुने भएकाले समय लागेको दाबी गर्छिन् । ‘कसले चोर्‍यो मेरो मन फेरि ठूलो क्यानभासको चलचित्र हो । त्यो बनाउन केही समय त लाग्छ नै । कस्तो क्यानभासको बनाउने, बजेट कति दिने र कलाकार को राख्ने भन्ने केही सोचेको छैन’, रेखा खुल्छिन्, ‘यो चलचित्र बन्छ भन्नेमा हामी ढुक्क छौं । अहिले समय लागेकाले मात्र नबन्ला कि भन्ने शंका उब्जिनु स्वाभाविक नै हो ।’ रेखा हाल नयाँ चलचित्रको स्क्रिप्टको काममा व्यस्त छिन् । रेनेशा बान्तवा राईले निर्देशन गर्ने चलचित्रको छायांकन फागुनबाट सुरु हुनेछ ।

निर्माता तथा निर्देशक चाम्स स्क्रिप्टको काम सकिए पनि अन्य कलाकारको छनोटदेखि लिएर प्राविधिक काम बाँकी रहेको बताउँछन् । ‘ती काम सकिनासाथ चलचित्रको काम सुरु हुन्छ, तर त्यसका लागि दर्शकले केही समय पर्खनैपर्छ’, मिलन भन्छन् ।

निर्माता सेनले विवेककुमार शाहको पुस्तक ‘मैले देखेको दरबार’बाट प्रभावित भई ‘दीपेन्द सरकार’ बनाउन लागेका हुन् । ‘मैले यो पुस्तकबाट चलचित्र बनाउने अधिकार लिइसकेको छु । त्यो नामबाट चलचित्र बनाउन सजिलो नहुने भएकाले ‘दीपेन्द्र सरकार’ नाम राखेको हुँ’, सेन भन्छन्, ‘दरबारबाट चलचित्र निर्माणका लागि मौखिक इजाजत पाइसकेको छु । केवल लिखितम् प्रतिबद्धता बाँकी छ ।’ शाह आफू हाल चलचित्र ‘प्रेमगीत–३’ पछि अर्को नयाँ प्रोजेक्टको काम सकेर ‘दीपेन्द्र सरकार’ तिर लाग्ने बताउँछन् । 

विगतमा झन् बढी समस्या

चलचित्रकर्मीहरूका अनुसार अहिले मात्र होइन, वर्षौ अघिसम्म पनि यो समस्या ज्यूँका त्यूँ नै थियो । पुराना चलचित्र निर्माता तथा निर्देशक शोभित बस्नेतको अनुभवमा अहिले भन्दा पहिले एकै पटक धेरै चलचित्र घोषणा गर्ने चलन बढी थियो । ‘अहिले त घोषणा गरिएका चलचित्र निर्माता र निर्देशकले बनाइ नै रहेका हुन्छन्, तर पहिला त एउटै मान्छेले सातदेखि १० वटासम्म चलचित्रको घोषणा गर्थे । अनि बल्लतल्ल एउटा चलचित्र बनाउथे, त्यो फ्लप भएपछि निर्माताको भागाभाग नै हुन्थ्यो’, शोभितको बुझाइ छ, ‘अहिले घोषणा गरिएका चलचित्रहरूमध्ये १० प्रतिशत मात्र बन्दैनन् । पहिला त ५० प्रतिशत बन्थे, ५० प्रतिशतको नामो निशान हुँदैन थियो ।’

शोभितको अनुभवमा निर्माता तथा निर्देशकहरूबिना योजना चलचित्र घोषणा गरेर आफैं फस्ने गरेका छन् । ‘कस्तो चलचित्र कसरी बनाउने भन्ने योजना नै हुँदैनथ्यो । निर्माताको दिमागमा चलचित्र लाइन भनेको धाक र सान देखाउने लाइन हो भन्ने मात्र थियो’, शोभित भन्छन्, ‘नयाँ निर्माताहरू योजना बिना नै चल्छन्, तर पुराना निर्माताहरू योजनाबद्ध किसिमले हिँड्छन् । त्यसकारण पुराना निर्मातामा यो समस्या देखिँदैन ।’ 

अन्य क्षेत्र जस्तै चलचित्र पनि व्यावसायिक क्षेत्र हो । जोकोही लगानीकर्ताहरू चलचित्रमा लगानी गरेर प्रतिफल उठाउन चाहन्छन्, तर चलचित्र मात्र घोषणा गर्ने, त्यसको निर्माणका लागि समय पर्खिने चलनले चलचित्र नै बन्ने वा नबन्ने भन्ने टुंगो नै लाग्दैन । त्यसको असर निर्माताले त भोग्छन् नै, सोही चलचित्रका लागि समय छुट्याएका कलाकार तथा प्राविधिकले झन बढी असर भोग्छन् ।