व्यस्त कलाकारहरू सुटिङबाट अलिकति फुर्सद निस्क्यो भने कोही परिवारलाई समय दिन्छन्, कोही घुमघाममा निस्कन्छन्, कति घरमै संगीत सुनेर बस्छन्  ।

अभिनेत्री तथा निर्देशक दीपाश्री निरौलाको कुरा सुन्ने हो भने उनको जिन्दगी बेफुर्सदमै घुमेको छ । बेफुसर्दिलो दैनिकी भए पनि समय निकालेर परिवारलाई समय दिएसँगै उनी पशुपतिनाथ पुग्छिन् । 

प्राय: सुटिङमै व्यस्त भइरहने कलाकारहरू फुर्सदको समयमा के गर्लान् ? दर्शकका लागि यो पक्कै पनि चासोको विषय हो । क्यामराअगाडि अभिनय, नृत्य, द्वन्द्व गर्ने कलाकार प्रत्येक चलचित्रमा फरक–फरक लोकेसनमा पुगिरहेका हुन्छन् । चलचित्र, म्युजिक भिडियो, विज्ञापनको सुटिङको काममा हरबखत उनीहरू व्यस्त देखिन्छन् । यी व्यस्त अभिनेता–अभिनेत्री सुटिङ सकिएपछिको फुर्सदी–जीवन कसरी व्यतीत गर्छन् भन्ने जिज्ञासा धेरैमा छ । साप्ताहिकसँगको कुराकानीमा अभिनेता अभिनेत्रीहरूले फुर्सदको समय फरक–फरक किसिमले बिताउने गरेको बताए ।

रंगमञ्चीय अभिनयबाट चलचित्रमा पदार्पण गरेका अभिनेता विजय बराल हालैमात्र एक बेनामे चलचित्रको सुटिङ सकेर फुसर्दिला बनेका छन् । त्यही फुर्सदको समय सदुपयोग गर्न उनी अनामनगरस्थित मण्डला थिएटरमा दैनिक भेटिन्छन् । ‘फुर्सदको समयमा म चलचित्र हेर्छु, मण्डला थिएटरमा नाटकको काम गर्छु । थिएटरका कलाकारसँग चलचित्रकै विषयमा कुराकानी गर्छु’, विजय भन्छन्, ‘यही चलचित्र हेर्छु भन्ने छैन । कोही कसैले चलचित्र हेर्न सिफारिस गरेका चलचित्र हेर्ने गर्छु । पुस्तक पनि पढ्छु । बजारमा चर्चामा आएका पुस्तक पढ्न रुचाउँछु ।’

अभिनेत्री तथा निर्देशक दीपाश्री निरौलाको कुरा सुन्ने हो भने उनको जिन्दगी बेफुर्सदमै घुमेको छ । बेफुसर्दिलो दैनिकी भए पनि समय निकालेर परिवारलाई समय दिएसँगै उनी पशुपतिनाथ पुग्छिन् । ‘मलाई विराटनगर उपमहानगरपालिकाले सद्भावदूत बनाएकाले कार्यक्रमका लागि विराटनगर गइरहनुपर्छ । त्यस्तै सरकारले भ्रमण वर्ष–२०२० का लागि पर्यटन दूत पनि बनाएको छ । अहिले विराटनगर र भ्रमण वर्षकै काममा दौडधूप भइरहेको छ’, उनी भन्छिन्, ‘नेपाल टेलिभिजनमा मुन्द्रे कमेडी क्लब र रेडियो अडियोमा धनियाँकी दुनियाँको काम पनि गर्नुपर्छ । घुम्ने भनेको सुटिङको बेला वा विराटनगर गएका बेलामा मात्र हुन्छ ।’

जनवरीको अन्त्यतिर दीपाश्री पछिल्लो चलचित्र ‘छ माया छपक्कै’ लिएर मलेसिया जाँदै छिन् । ‘फुर्सद पायो भने घरमै गीत संगीत सुन्ने गर्छु । चलचित्रका लागि धेरै कथा आइरहेका हुन्छन् । एउटा कथाको सार भेटेपछि त्यसलाई कुन तरिकाबाट स्क्रिनप्लेमा ढाल्ने भनेर सहकर्मी साथीहरूसँग छलफल गर्छु । परिवारलाई धेरै समय त दिन सक्दिन, तर दिएको बेला त्यसको भरपुर सदुपयोग गर्छु । बिहानको समय पशुपतिनाथ जान्छु र घर गएर कामको तालिका बनाउँछु’, उनी भन्छिन् ।

कामबाट फुर्सद मिल्नासाथ धेरैको ध्यान पुस्तक अध्ययनमै हुन्छ । तर, कलाकारहरूको भने पुस्तकमा खासै चासो देखिँदैन । उनीहरू पुस्तक नपढ्ने त होइन, तर आवश्यकताभन्दा कम मात्र पुस्तक पढ्ने गर्छन् । 

अभिनेता सलोन बस्नेतलाई पुस्तक पढ्ने कुनै रुचि छैन । व्यस्त सुटिङबाट फुर्सद पाउनासाथ उनी साथीभाइ लिएर घुम्न निस्कन्छन् । घुम्नबाहेक चलचित्र हेर्ने र संगीत सुन्न उनी रुचि राख्छन् । ‘कहीँ कतै नयाँ ठाउँ थाहा पाए भने घुम्न निस्कन्छु । मलाई पुस्तक पढ्नतिर कहिल्यै रुचि जागेन । त्यसकारण म बुक रिडर पनि हुन सकिनँ’, सलोन भन्छन्, ‘चलचित्र हेर्ने शैली मेरो अनौठो छ । कुनै चलचित्रको स्क्रिप्ट हातमा परेपछि आफ्नो चरित्र कस्तो छ, पहिला त्यो पढ्छु, अनि त्यस्तै चरित्र अनुसारका कस्ता चलचित्र बनेका छन्, त्यो बुझेर चलचित्र हेर्ने गर्छु । म घरायसी काम खासै गर्दिनँ । नढाँटी भन्नुपर्दा मलाई चिया पकाउनबाहेक अन्य केही काम आउँदैन ।’

अभिनेत्री स्वस्तिमा खड्काले केही समयअघि मात्र चलचित्र ‘चपली हाइट–३’ को सुटिङ पूरा गरिन् । हालका दिनमा उनी आफ्ना रोकिएका काम पूरा गर्न व्यस्त छिन् । ‘सुटिङ भएकाले मेरा झन्डै १० वटा जति काम पेन्डिङमा थिए । यो समयमा ती पेन्डिङका काम पूरा गर्न लागिपरेको छु’, स्वस्तिमा सुनाउँछिन्, ‘त्योबाहेक घरमा नै आराम गरिरहेकी छु । घरको सरसफाइ गर्ने काम पनि छ । केही राम्रा पुस्तक पढ्छु । यो समयमा विज्ञापनका बाँकी काम पनि पूरा गर्छु ।’ 

कामको तनावबाट फुर्सद हुनासाथ रमाउने अभिनेत्रीमा पूजा शर्मा पनि पर्छिन् । यतिबेला उनी आफूले निर्माण र अभिनय गरेको चलचित्र ‘म यस्तो गीत गाउँछु–२’ को डबिङमा व्यस्त छिन् । ‘चलचित्रको कामबाट फुर्सद पाउनासाथ चलचित्र हेर्ने र पुस्तक पढ्छु । मेरो मुड त्यो बेला कस्तो हुन्छ, त्यसैअनुसार चलचित्र र पुस्तक छनोट गर्छु’, पूजा भन्छिन्, ‘अन्य साथीहरू फुर्सदमा घुमफिर गर्छन् । तर, मचाहिँ सुटिङकै बेला घुमफिर गर्छु । सुटिङ नहुँदाचाहिँ पारिवारिक माहोलमा रमाउँछु ।’

नेपाली चलचित्र क्षेत्रमा पछिल्लो समयमा व्यस्त अभिनेतामा अनुपविक्रम शाही पनि पर्छन् । उनी एकपछि अर्को चलचित्रको काम गरिरहेका छन् । यी अभिनेता अहिले टेलिभिजन रियालिटी शो ‘रोडिज’ को निर्णायक छन् । ‘अहिले चलचित्रकै काम गरिरहेको छु । फुर्सदमा कतै घुम्नभन्दा पनि म नयाँ काम नै गरिरहेको छु । पुस्तक पढ्न त मन लाग्छ, तर पुस्तकभन्दा बढी स्क्रिप्ट नै पढिरहेको हुन्छु’, एङ्ग्री लुक्समा रुचाइएका यी अभिनेता भन्छन्, ‘घरमा म नेटफ्लिक्सबाट चलचित्र हेर्छु । यस्तै फ्लेभरको भन्ने हुँदैन । तर, राम्रा चलचित्र छुटाउँदिनँ ।’

कुनै बेला अभिनयमा व्यस्त रहने अभिनेता भुवन केसी पछिल्लो दशकमा चलचित्र निर्माणमा सक्रिय छन् । उनी होम प्रोडक्सन् सुपर काजोल फिल्म्सबाटै चलचित्र निर्माणमा व्यस्त छन् । छोरा अनमोललाई लिएर उनी लगातार चलचित्र बनाइरहेका छन् । भुवनको भनाइमा उनको फुर्सद पनि चलचित्रबारे सोचेरै बित्ने गर्छ । ‘मेरो फुर्सद समय पनि चलचित्र सम्झेर नै बित्ने गर्छ । कसरी राम्रो चलचित्र बनाउने, कुन कथामा बनाउने भन्ने नै सोचिरहेको हुन्छु । मलाई घुम्नभन्दा पनि चलचित्र नै सम्झन मन लाग्छ’, भुवन भन्छन्, ‘स्क्रिप्ट कस्तो बनाउने होला, कस्तो गीत दर्शकका लागि रुचिकर हुन्छ भन्ने कुरामै बढी सोच्छु ।’

चलचित्रमा खल चरित्रमा रुचाइएका अभिनेता प्रमोद अग्रहरिको फुर्सद शैली अलिक फरक छ । उनी फुर्सद हुनासाथ कोठामै समय बिताउँछन् । ‘कहीँ कतै कार्यक्रम वा साथीभाइ भेटघाट गर्नुपर्‍यो भने मात्र कोठा बाहिर निस्कन्छु । नत्र दिनभर कोठामा हुन्छु’, प्रमोद भन्छन्, ‘कोठामा बस्दा कि सुत्छु कि पुस्तक पढ्छु । पुस्तक यही भन्ने छैन । आफूलाई मन लागेको र रुचि भएको विषयका पुस्तक पढ्छु । म कोठामा बस्दा चलचित्रचाहिँ हेर्दिनँ । किनभने चलचित्र हेर्दा त्यसमा देखिने चरित्र देख्दा मलाई डर लाग्छ । कतै त्यस्तै चरित्र मैले पाएँ भने त्यसलाई कसरी निभाउन सक्छु भन्ने चिन्ता लाग्छ ।’

अभिनेत्री तथा कोरियोग्राफर पवित्रा आचार्य चलचित्र अभिनयका अतिरिक्त भिडियो तथा चलचित्रकै कोरियोग्राफीमा प्राय: व्यस्त रहन्छिन् । उनी आफू फुर्सदमा रहँदा पनि खाली हात बस्दिनन् । ‘चलचित्र वा भिडियोको काममा व्यस्त हुँदा त घरमा बस्नै पाइँदैनथ्यो । ती कामबाट फुर्सद निस्कनासाथ आफ्नो कार्यालयलाई समय दिन्छु । म आफ्नो कार्यालयमा नृत्य प्रशिक्षण गर्छु’, पवित्रा सुनाउँछिन्, ‘नियमित कामबाहेक चलचित्र हेर्ने, गीत सुन्ने त छँदैछ । म आफू कोरियोग्राफर भएकाले पनि रोमान्टिक र सेन्टिमेन्टल टाइपका गीत सुन्ने गर्छु ।’

चलचित्र निर्देशक वसन्त अधिकारी आफ्नो फुर्सदलाई व्यस्तताको फुर्सद मान्न रुचाउँछन् । ‘म अहिले व्यस्तताको फुर्सदमा छु । व्यस्तताको फुर्सद यसअर्थमा कि दिनभर काम गर्छु अनि बेलुकाको समय घरमा सन्तानसँग रमाउँछु’ वसन्त भन्छन्, ‘अहिले सर्ट मुभिमा व्यस्त छु । आफ्नै नयाँ चलचित्रको स्क्रिप्ट लेखिरहेको छु । एक आफन्तले चलचित्र बनाउन लागेकाले उनको स्क्रिप्टमा पनि समय दिइरहेको छु ।’

वसन्त दिनभरि जति नै व्यस्त भए पनि बेलुकाको एक घण्टाको समय सन्तानलाई दिन्छन् । ‘घर पुगेपछि एक घण्टा छोराछोरीसँग खेल्छु । घर पुग्दा दिनभरिको सबै तनावलाई घर बाहिर नै छोड्छु । घरमा पुगेपछि कि चलचित्र हेर्छु कि त किताब पढ्छु । मुड चलेको बेला नयाँ र पुराना दुवै किसिमका चलचित्र हेर्ने गर्छु’, उनी खुल्छन्, ‘पुस्तक पनि यस्तै भन्ने छैन । बजारमा नयाँ पुस्तक आएको थाहा पाउनासाथ किनेर पढ्छु । शनिबारको एक दिनचाहिँ मेरै हातले घरमा खाना पाक्छ । छोराछोरी र श्रीमती पनि खुसी हुन्छन् । दु:खको कुराचाहिँ के भने व्यस्त जीवनका कारण परिवारलाई घुमाउने समय निकाल्नै मुस्किल पर्छ ।’

अभिनेता आमिर गौतम चलचित्र ‘चपली हाइट–३’ को छायांकनपछि त्यसको डबिङको समय कुरेर बसिरहेका छन् । मकवानपुरे यी अभिनेता काम पर्दा मात्र काठमाडौं आइपुग्छन्, नत्र अधिकांश समय हेटौंडामा नै हुन्छन् । ‘चलचित्रको काम नहुँदा पुस्तक पढ्छु । म पन्ध्र वर्षदेखि नियमित रूपमा स्नुकर खेलिरहेको छु । समय मिलेमा साथीभाइसँग घुम्नका लागि बाहिर निस्कन्छु’, आमिर भन्छन्, ‘यसबाहेक ममा पुस्तक पढ्ने सोख पनि छ । बजारमा आएका समसामयिक विषयका प्राय: पुस्तक किनेर पढ्छु ।’

निर्देशक सुदर्शन थापा यतिबेला आफ्नो चलचित्र ‘म यस्तो गीत गाउँछु–२’ को पोस्ट प्रोडक्सनमा व्यस्त छन् । जति व्यस्त भए पनि फुर्सदको समय निस्कनासाथ उनी चलचित्र हेर्ने, घुम्ने काम गर्छन् । ‘फुर्सदमा चलचित्र हेर्ने, घुम्ने र चलचित्रसम्बन्धी छलफलमा व्यस्त हुन्छु । यो बेला स्क्रिप्टको काम पनि गरिरहेको हुन्छु’, सुदर्शन भन्छन्, ‘मलाई किताब पढ्ने लत छैन । त्यसकारण पनि यसमा खासै ध्यान जाँदैन । घुम्न निस्किएँ भने चाहिँ उपत्यका छोड्छु । बाहिर कतै सुन्दर, शान्त स्थानको छनोट गरेर त्यता पुग्छु ।’

निर्देशक तथा निर्माता शोभित बस्नेत फुर्सदको समय डिस्को र क्लबमा बिताउँछन् । ‘पहिले–पहिले घुम्ने समयमा काममा घोटिएर नै बिताइयो । त्यो बेला लाइफको इन्जोय गर्न पाइएन । तर, अहिले भने त्यो इन्जोय गर्न थालेको छु । फुर्सदमा नियमित क्लब जान्छु, नाचगान गर्छु’, शोभित अनुभव सुनाउँछन्, ‘अहिले टेलिसिरियल कुल खानदानमा व्यस्त छु । समय–समयमा चलचित्र हेर्छु । पुस्तक पढ्नचाहिँ खासै ध्यान गएन । तर, स्क्रिप्टका लागि आइडिया जेनेरेट गर्छु ।’ 

अर्का कलाकार शिवहरि पौडेलले परिवारलाई बाहिर घुमाउन नलगेको वर्षौं भइसक्यो । शिवहरि फुर्सदको अभावका कारण परिवारलाई घुमाउन नसकेको स्विकार्छन् । ‘मेरो त फुर्सद नै हुँदैन । सकभर आफ्नो नत्र अरूको काममा हिँडिरहेको हुन्छु । कहीँ कतै झुक्किएर फुर्सद मिल्यो भने वाइफाई चलाउँछु, नत्र डाटाबाटै हो । यो बेला अनलाइनका समाचार हेर्ने गर्छु’, शिवहरि सम्झन्छन्, ‘घरमा छु भने घरकै काम गर्छु । जस्तै पुराना कृतिहरू निकाल्ने, पढ्ने अनि स्क्रिप्टसँग सम्बन्धित विषय छ भने त्यो विषय छान्ने गर्छु । मेरो बुझाइमा राति चलचित्र हेर्नु भनेको निन्द्रा बिगारेर गर्ने काम हो । निन्द्रा लागेन भने नयाँ क्रिएसनका बारेमा घोत्लिन्छु, यसो गरिसक्दा निन्द्रादेवीको प्रवेश भइसक्छ ।’

अभिनेत्री, निर्मात्री तथा निर्देशक रेखा थापा पछिल्लो चलचित्र ‘मालिका’ पछि चुपचाप नै छिन् । उनी यतिबेला नयाँ चलचित्रको तयारीमा छिन् । चलचित्रकै लागि उनले केही महिनाअघि मात्र रेनेशा वान्तवा राईलाई निर्देशकका रूपमा अनुबन्धित गरिसकेकी छन् । ‘म फुर्सदमा घरमै परिवारसँग खाने, बस्ने र रमाइलो गरेर बिताउँछु । कहिलेकाहीँ चलचित्र पनि हेर्ने गर्छु । घुम्न खासै गइँदैन । चलचित्रको लागि स्क्रिप्टको काम गर्छु’, उनी भन्छिन् ।

अभिनेत्री रक्षा श्रेष्ठ टेलिभिजनमा दर्शकले सर्वाधिक रुचाइएको सिरियल ‘सक्किगोनी’ की प्रमुख कलाकार हुन् । उनी सिरियल ‘भद्रगोल’बाट चर्चामा आइन् । ‘सिरियलको सुटिङ नहुँदा घरमै बस्छु । टेलिभिजन खासै हेर्दिन् । युट्युबले गर्दा टेलिभिजन कम हेर्ने गरेको छु । परिवारसँग कहिलेकाहीँ घुम्न निस्कन्छु’, उनी भन्छिन् ।

फुर्सदको समयमा चिसो मौसम परेकाले अभिनेता राजाराम पौडेल खासै घुम्न निस्कँदैनन् । उनी दिनभर घरमै मोबाइल चलाएर बस्छन् । ‘बाहिर घुम्न गए पनि एक्लै जानुपर्छ । घरमा आमा बिरामी हुनुहुन्छ । उहाँलाई हेर्नुपर्ने भएकाले पनि घुम्न जान मिल्दैन । घरमै म मोबाइल चलाएर दिन बिताउँछु’, उनी भन्छन्, ‘आजकाल पुस्तक नपढेको पनि धेरै भइसक्यो । यो बेला चलचित्रको काम पनि खासै छैन ।’