गोल्डस्टार जुत्ता नेपालको लोकप्रिय ब्रान्ड हो । नेपालका दर्जनौं जुत्ता उद्योगमध्ये किरण सुजले उत्पादन गर्ने जुत्ता २०४३ सालदेखि नेपाली बजारमा आएको हो । यद्यपि यो कम्पनीले सुरुवातमै गोल्डस्टार जुत्ताको उत्पादन थालेको भने होइन, किरण सुजका सञ्चालक अमिर राणा भन्छन्, ‘अहिले गोल्डस्टारलाई जतिले मन पराउनुभएको छ, यो सफलताका पछाडि धेरै संघर्ष लुकेको छ ।’

तीन जनाको ६ करोडको लगानीमा सुरु भएको यो उद्योगमा अहिले त्यतिबेलाका सञ्चालकमध्ये दुई जना मात्र छन् । यो उद्योगले प्रारम्भिक २०३४ मा हेटौंडामा हात्तीछाप चप्पलको उत्पादन थालेको थियो । झन्डै १ वर्ष योजना बनाएर सुरु भएको यो उद्योगले जब चप्पल उत्पादन थाल्यो, केही समयपछि नै सञ्चालकहरूलाई लाग्यो— हामीले गलत ठाउँमा हात हाल्यौं ! ‘जति प्रयास गरे पनि भनेजस्तो उत्पादन नभएपछि भारतबाट एक जना टेक्निसियन बोलायौं,’ सञ्चालक राणा भन्छन्— ती टेक्निसियनले सुरुमा उद्योगलाई डोर्‍याउने काम गरेपछि उद्योगका ब्रान्ड निरन्तर उत्पादन थालेका हुन ।

भारतबाट ल्याइएको मेसिनबाट सुरु भएको चप्पल उत्पादनको सफलतापछि हौसला मिलेको उद्योगलाई त्यसपछि जुत्ता उत्पादन गर्ने सोच आयो । यद्यपि जुत्ता उत्पादन गर्न केही चुनौती थियो । जुत्ता उत्पादनका लागि मेसिन न भारतमा भेटियो, न चीनमा । किरण सुजले इटलीबाट एउटा मेसिन भित्र्याएसँगै जुत्ता पनि उत्पादन सुरु भयो । सुरुवातमा जुत्ताको नाम राखियो— स्पार्क । स्पार्क सुज केही समय चलेपछि कम्पनीले नयाँ जुत्ता बनाउने सोच बनायो, तर कस्तो खालको उत्पादन बजारमा पठाउने भन्ने विषयमा अलमल भयो । यसबीच उद्योगले गोल्डस्टार जुत्ता उत्पादन गर्ने निर्णय गर्‍यो ।

‘गोल्डस्टार जुत्ता बजारमा गएको केही समयमै यति धेरै बिक्री भयो कि ग्राहकले ब्ल्याकमा समेत किनें,’ सञ्चालक राणा भन्छन्— ‘गोल्डस्टार जुत्ता ब्ल्याकमा समेत बिक्री हुन थालेपछि हामीले त्यसको उत्पादन थप बढायौं र गोल्डस्टारका विभिन्न जुत्ता बजारमा पठायौं ।’ उत्पादन थालेको यतिका वर्षसम्म पनि ग्राहकले मन पराइरहनुभएको छ, यो खुसीको कुरा हो, –राणा भन्छन् ।

किरण सुजले हाल दैनिक ८० हजार जोर गोल्ड स्टार जुत्ता उत्पादन गर्छ । तीमध्ये नेपालबाहेक भारतमा सबैभन्दा बढी निकासी हुन्छ यो जुत्ता । गोल्डस्टार जुत्ताको उत्पादक किरण सुजका उत्पादन दक्षिण एसियाभर नै लोकप्रिय छन् । गोल्डस्टार जुत्ता विश्वप्रसिद्ध चिनियाँ अनलाइन रिटेल कम्पनी अलिबाबामा समेत किन्न पाइन्छ । यति मात्र होइन, गोल्डस्टार दुबई, कतार, मलेसिया, थाइल्यान्ड आदि एसियाली मुलुकसम्म पनि पुगिसकेको छ भने किरण सुजले अब चाँडै आफ्ना उत्पादन अस्ट्ेरलियासमेत पठाउने योजना बनाएको छ ।

यो कम्पनीले प्रत्यक्ष रूपमा ३ हजारलाई रोजगारी दिएको छ त्यसमध्ये ६५ प्रतिशत महिला छन् । यो कम्पनी सबैभन्दा बढी रोजगारी दिने नेपालका टप ५ कम्पनीमध्ये एक हो । नेपालमा एक वर्षमा ४ करोड जोर जुत्ता आयात हुन्छ । नेपाली ब्रान्डबाट मात्र २ करोड ५० लाख जुत्ता उत्पादन हुने अनुमान गरिन्छ । किरण सुजका उत्पादनले नेपाली बजारको ५० प्रतिशत माग पूरा गरेको छ । ६ करोडमा उत्पादन सुरु भएको उद्योगको पुँजी अहिले ८ अर्बभन्दा माथि छ । नेपालमा अन्तर्राष्ट्रिय ब्रान्डका नक्कली जुत्ता छ्यापछ्याप्ती पाइने भएकाले भन्सारमा कडाइ गरी नेपाली उत्पादनलाई नै प्राथमिकता दिनुपर्ने सञ्चालक राणा बताउँछन् ।