विभिन्न फेसनेबल एसेसरिजमा गगल्स निकै अगाडि छ । गगल्सका पारखीहरूलाई जाँच्न धेरै प्रतीक्षा गर्नै पर्दैन, यतिबेला जता हेरे पनि अधिकांशको आँखामा गगल्स देखिन्छ । चाहे अफिस जाँदा होस् वा अरू कुनै कामका लागि बाहिर निस्कँदा नै किन नहोस्, धेरैजसोको आँखामा गगल्स हुन्छ । 

गगल्सको फेसन सदाबहार मानिए पनि तुलनात्मक रूपमा गर्मी मौसममा यसको प्रयोग बढी हुन्छ । खासगरी कडा घाममा निस्कँदा आँखाको सुरक्षा र चिसो अनुभव गर्न धेरैजसोले गगल्स प्रयोग गरेको पाइन्छ । आँखाको सुरक्षा कवज मानिने गगल्स आफूलाई सुन्दर देखाउन प्रयोग गर्नेहरूको संख्या निरन्तर बढ्दो छ । नेपालमा अहिले विश्वमा चलेका ब्रान्डका गगल्सहरू सहजै उपलब्ध छन् । रेवन, फास्टट्रयाक, पोलोराइड, सिके जिन्स, फ्लाई मेसिन, भ्यान हुसेन, गुस्सी, लाकोसट, भग, ओकेलीजस्ता विश्वमा लोकप्रियता कमाएका ब्रान्डका चस्मा नेपाली बजारमा पनि सहजै उपलब्ध हुन्छन् । 

रेबन 

रेबन विश्वमै पहिलो स्थानमा रहेको ब्रान्ड हो । अधिकांश मानिसले रुचाएको रेबनका गगल्स नेपालमा पनि सदाबहार छ । महिला हुन् वा पुरुष, गगल्सको नाम आउनेबित्तिकै सबैको पहिलो छनौटमा रेबनकै गगल्स पर्छ । केही महँगो भए पनि रेबनको गगल्स अन्य गगल्सभन्दा फरक र आकर्षक मानिन्छ । रेबन ब्रान्डको ओभल तथा रेक्ट्रेङ्गलर स्टाइलका गगल्स धेरैको रोजाइमा पर्छ । यो गगल्स बाइकिङ, ड्राइभिङ वा आँखाको सुरक्षाका लागि अति उपयोगी मानिन्छ । महिला वा पुरुष दुवैका लागि एभिएटर, ओभल, वेयफरर, रेक्ट्रेङ्गलर, स्पोर्ट्स तथा र्‍याप राउडका मोडल बजारमा उपलब्ध छन् ।

फास्टट्रयाक

फास्टट्रयाक सनग्लास गुणस्तरीय र उत्कृष्ट ब्रान्ड तथा मोडलको गगल्स हो । भरपर्दाे र सुपथ मूल्यमा खरिद गर्न सकिने फास्टट्रयाकका उपभोक्ता पनि प्रशस्तै छन् । विभिन्न आकार तथा स्टाइलमा पाइने फास्टट्रयाक गगल्सका विभिन्न मोडल महिला तथा पुरुष दुवैका लागि उपलब्ध छन् । उपयोगी तथा गुणस्तरिय लेन्स युक्त विभिन्न रंगका फास्टट्रयाकका गगल्सका प्रयोगकर्ता नेपालमा पनि उल्लेख्य छन् । 

पोलोराइड 

पोलोराइड गुणस्तरीय तथा आकर्षक गगल्स हो । युवायुवतीहरूको रोजाइमा परेको पोलोराइडका गगल्स स्टाइलिस तथा चार्मिङ मानिन्छ । विभिन्न आकार तथा स्टाइलमा उपलब्ध पोलोराइडका गगल्स विभिन्न प्रयोजन तथा अवस्थाअनुसार लगाउन सकिन्छ । पोलोराइडका गगल्स केही सस्ता र टिकाउ मानिन्छ । 

सिके जिन्स

सिके जिन्स पनि गगल्सको लोकप्रिय ब्रान्डमध्ये एक हो । यो महिला तथा पुरुष दुवैका लागि अत्यन्तै फेसनेबल गगल्स मानिन्छ । यो गगल्स विशेषगरी सवारी साधन चलाउँदा लगाइन्छ । भरपर्दाे र टिकाउ यो गगल्स अन्य ब्रान्डको तुलनामा सस्तो मानिन्छ । सिके जिन्सका गगल्स विभिन्न रंग तथा आकर्षक डिजाइनमा उपलब्ध छन् । 

फ्लाइड मेसिन

फ्लाइङ मेसिन ब्रान्डका चस्मा संसारभरि नै लोकप्रिय र अत्यधिक बिक्री हुने गगल्समध्ये एक हो । अन्य ब्रान्डका गगल्सको तुलनामा यसको मूल्य पनि निकै कम छ । त्यसै कारण मध्यम वर्गीय उपभोक्तबीच यो गगल्स लोकप्रिय छ । गुणस्तरका दृष्टिकोणले पनि उच्चकोटीको मानिने यो ब्रान्डको चस्मा विभिन्न स्टाइलमा उपलब्ध छन् । 

गुस्सी 

गुस्सीका गगल्स झट्ट हेर्दा निकै आकर्षक देखिन्छन् । युभी प्रोटेक्सनयुक्त गुस्सीका गगल्स नेपालमा पनि लोकप्रिय छ । यो नेपालीहरूको विश्वास जित्न सक्ने थोरै अन्तर्राष्ट्रिय ब्रान्डमध्ये एक हो । नेपालमा गुस्सीका गगल्स विभिन्न रंग तथा डिजाइनमा उपलब्ध छन् । सवारी चलाउँदा आँखालाई सुरक्षा प्रदान गर्ने उत्कृष्ट गगल्समध्ये गुस्सी पनि एक हो ।