नेपालमा आज २५ जनामा कोरोना संक्रमण पुष्टि भएको छ । बाँके, कपिलवस्तु, धनकुटा र नवलपरासीका व्यक्तिमा कोभिड–१९ संक्रमण पुष्टि भएको हो । संक्रमितहरू ३ देखि ४८ वर्ष उमेर समूहका रहेको स्वास्थ्य तथा जनसंख्या मन्त्रालयका प्रवक्ता विकास देवकोटाले नियमित पत्रकार सम्मेलनमा जानकारी दिए ।

पुष्टि भएका कोभिड संक्रमितमध्ये ३ वर्षका बालक, ७ महिला र १८ पुरुष रहेका छन् । जसमध्ये बाँकेका ६ जना पुरुष, धनकुटाका ४ पुरुष र १ महिला, कपिलवस्तुका १३ र नवलपरासी पश्चिमका १ पुरुषमा कोरोना पुष्टि भएको छ । आजै कोशी प्रादेशिक अस्पतालमा उपचाररत कोभिड संक्रमितमध्ये उदयपुरका ८ जना पुरुष निको भै डिस्चार्ज भएका छन् । यससँगै हालसम्म नेपालमा उपचारपश्चात निको भएर घर फर्किएका संक्रमितको संख्या ४५ पुगेको छ । २ जना कोरोना संक्रमितको मृत्यु भइसकेको छ । अहिलेसम्म नेपालमा कोरोना संक्रमितको संख्या ४ सय २७ पुगेको छ । जसमध्ये ३ सय ५८ पुरुष र ६९ महिला रहेका छन् ।

आजसम्म पिसिआर विधिबाट ३५ हजार ४ सय ९४ र आरडिटी विधिबाट ७५ हजार ७२ जनामा कोभिड परीक्षण भएको छ । गत २४ घन्टामा पिसिआर विधिबाट २ हजार ४ सय ८८ र आरडिटी विधिबाट ३ हजार ६ सय १० परीक्षण गरिएको देवकोटाले जानकारी दिए । हालसम्म ३८ जिल्लामा कोभिड संक्रमित भेटिएका छन् ।

कुन प्रदेशमा कति संक्रमित ?

सातै प्रदेशमा कोभिड–१९ संक्रमित देखिएका छन् । प्रदेश १ का ५९, प्रदेश २ का १ सय ३६, बागमती प्रदेशका २६, गण्डकीका ४, प्रदेश ५ का १ सय ९६, कर्णालीका १ र सुदुरपश्चिमका ५ जनामा संक्रमण पुष्टि भएको छ ।

२३ हजारभन्दा बढी क्वारेन्टाइनमा

हालसम्म २३ हजार २ सय २ जना क्वारेन्टाइनमा रहेका छन् । जसमध्ये प्रदेश १ मा १ हजार ३ सय ४, प्रदेश नंम्बर २ मा ४ हजार १ सय ४४, बागमतीमा ३ सय ५३, गण्डकीमा ४ सय ६६, प्रदेश ५ मा १४ हजार २ सय ६२, कर्णालीमा ७ सय ६४ र सुदुरपश्चिममा १ हजार ९ सय ९ जना क्वारेन्टाइनमा रहेको स्वास्थ्य तथा जनसंख्या मन्त्रालयले जानकारी दिएको छ ।

गुल्मीका संक्रमितको मृत्यु भएको छैन

रूपन्देहीस्थित क्रिम्सन अस्पतालमा उपचाररत गुल्मीका ४१ वर्षीय पुरुष भेन्टिलेटरको सहायतामा आइसियु कक्षमा उपचाररत रहेको देवकोटाले जानकारी दिए । उनको निधन भएको भन्ने समाचार गलत भएको भन्दै उनले स्वास्थ्य अवस्था भने गम्भीर रहेको जानकारी दिए ।

७५ हजारभन्दा बढीको आरडिटी परीक्षण, कुन प्रदेशमा कति ?

आरडिटी विधिबाट गरिएको कुल ७५ हजार ७२ परीक्षणमध्ये प्रदेश १ मा हालसम्म ९ हजार ६ सय २२, प्रदेश २ मा ६ हजार २ सय ३४, बागमती प्रदेशमा १५ हजार ७ सय ३१, गण्डकीमा ७ हजार १८, प्रदेश ५ मा ९ हजार ७ सय ३९, कर्णालीमा ७ हजार ६ सय ३४ र सुदुरपश्चिममा १९ हजार ९४ वटा परीक्षण गरिएको छ ।