साप्ताहिक संवाददाता
एउटा संघर्षरत संगीतप्रेमीको यात्रामा आधारित चलचित्र ‘जस्मिन’ को फस्टलुक सार्वजनिक गरिएको छ । फस्टलुकमा आर्यन अधिकारीलाई मात्रै देखाइएको छ ।
शंकर कार्कीको निर्देशनमा निर्माण भैरहेको चलचित्रमा एक अन्जान पात्रले उक्त संगीतप्रेमीलाई कतिसम्म निस्वार्थ सहयोग गर्छ भन्ने देखाउन खोजिएको छ ।
हाल ७५ प्रतिशत छायाँकन सकिएर अरु चाइनामा खिच्ने जाने क्रममा चलचित्रको फस्टलुक सार्वजनिक गरिएको हो । यसअघि चलचित्र ‘रोमियो’ निर्देशन गरिसकेका निर्देशक शंकर कार्की भन्छन्, ‘संगीतप्रेमीको यात्रा, एक अन्जान पात्रको निस्वार्थ सहयोग, साथीहरुको सम्बन्ध, पारिवारिक समस्या, समाजमा देखिएका र सुनिएका गम्भीर कुरालाई चलचित्रले उठान गरेको छ ।’
सिनेमामा आर्यन अधिकारीका अलावा अशिष्मा नकर्मी, के.के अधिकारी, सेविका प्याकुरेल, रुपा राना, अभय बराल, नविन लम्साल, एलिशा शर्मा, विशाल पहाडी, कृष्ण खनाल, मिना बानियाँ र बालकलाकार श्रवणी थापाले अभिनय गरेका छन् ।
मेनका फिल्म्स प्रालिको व्यानरमा निर्माण भएको चलचित्रमा किरण घिमिरे (माइकल)को लेखन, अष्ट महर्जनको द्वन्द्व, मित्र डि गुरुङको सम्पादन रहने चलचित्रको प्रदर्शन मिति भने तय भएको छैन ।