सबै देशमा सबै कुरा अंग्रेजी भाषामा लेखिएको हुँदैन । त्यस्तो अवस्थामा उक्त देशका बारेमा आवश्यक जानकारी प्राप्त गर्न गाह्रो हुन्छ । स्थानीय भाषा नजान्दा त्यहाा लेखिएका कुनै पनि कुरा थाहा हुँदैन । यस्तो अवस्थामा एप्स प्रयोग गरी सम्बन्धित देशको स्थानीय भाषालाई अंग्रेजी वा नेपाली भाषामा अनुवाद गरी सहज रूपमा बुझ्न सकिन्छ । स्मार्टफोनमा त्यस्ता एप्स डाउनलोड गरी यो सुविधा उपयोग गर्न सकिन्छ ।

गुगल ट्रान्सलेट

कुनै नयाँ सहरमा पुग्दा त्यहाँ भएका साइनबोर्डमा लेखिएको भाषा नबुझिने हुनसक्छ । यस्तो अवस्थामा गुगल ट्रान्सलेट एपले सहयोग पुर्‍याउन सक्छ । यसको प्रयोग गरेर कुनै पनि भाषालाई ३० वटा भाषामा अनुवाद गर्न सकिन्छ । जुन भाषाबाट दोस्रो भाषामा अनुवाद गर्ने हो, ती दुवै भाषाको छनोट गर्न सकिन्छ । यदि तस्बिरमा लेखिएको भाषा पनि अनुवाद गर्नुपर्ने हो भने एपमा दुवै भाषा छनोट गर्दा तलतिर क्यामेराको आइकन देखिन्छ जसमा क्लिक गर्नुपर्छ । त्यसपछि माथि दायाँतिर रहेको ग्यालरीको आइकनमा गएर आफूले छनोटका लागि खिचेको तस्बिर सेलेक्ट गर्नुपर्छ । त्यसलाई स्क्यानिङ गरिसकेपछि उक्त तस्बिरमा लेखिएको शब्दको अर्थ मोबाइलको स्क्रिनमा देखिन्छ । यसमा ट्रान्सलेटका साथ क्यामेरा ट्रान्सलेसन, इन्स्ट्यान्ट क्यामेरा ट्रान्सलेसन, क्यामेरा मोड, कन्भर्सेसन मोड तथा ह्यान्डराइटिङ मोड जस्ता विभिन्न मोड उपलब्ध हुन्छन् । गुगल ट्रान्सलेट वेबसाइटको सहयोगले टाइपिङ गरी १ सय ३ वटा भाषा तथा अफलाइन रूपमा ५२ वटा भाषा अनुवाद गर्न सकिन्छ।

माइक्रोसफ्ट ट्रान्सलेटर

माइक्रोसफ्ट ट्रान्सलेटरको सहयोगले टेक्स्ट मात्र होइन, बोलेको कुरा पनि अनुवाद गर्न सकिन्छ । यसको सहयोगले ६० वटा भाषा अनुवाद गर्न सकिन्छ । यसमा डिभाइस कनेक्ट गरेर रियल टाइममा दुई वा बढी व्यक्तिसँग भाषा अनुवाद गरी कुराकानी गर्न सकिन्छ । यो एपमार्फत तस्बिरलाई पनि अनुवाद गर्न सकिन्छ । विदेश यात्रामा रहेको समयमा त्यहाँको भाषा डाउनलोड गरी त्यसलाई अफलाइन रूपमा प्रयोग गर्न सकिन्छ । यो एपमा विभिन्न प्रकारका फ्रेज अर्थात् वाक्यांशका लागि फ्रेजबुक ट्रान्सलेसनको सुविधासमेत उपलब्ध छ, जसको गाइड पनि त्यसैमा दिइएको हुन्छ । यो एपको प्रयोग स्मार्टफोनमा मात्र नभई एन्ड्रोइड वेयर डिभाइसमा पनि गर्न सकिन्छ ।

क्यामेरा ट्रान्सलेट

स्मार्टफोनको क्यामेरालाई पनि अनुवादकका रूपमा प्रयोग गर्न सकिन्छ । यसका लागि क्यामेरा ट्रान्सलेट एपको सहयोग लिन सकिन्छ । यसले पनि विभिन्न ३८ वटा भाषा अनुवाद गर्न सक्छ । यसमा भएको डिफल्ट सेटिङ प्रयोग गरी आफूले बुझ्न चाहेको भाषामा अनुवाद गर्न सकिन्छ । यो एप ओपन गरेपछि स्क्रिनमा एउटा बक्स देखिन्छ । त्यसपछि आफूले अनुवाद गर्नुपर्ने शब्द, लाइन वा वाक्यमा त्यसलाई केही समय फोकस गर्नुपर्छ । यदि ठूलै वाक्य अनुवाद गर्नु छ भने उक्त तस्बिरको आकारलाई केही ठूलो बनाउनुपर्छ । त्यसपछि क्याप्चरमा क्लिक गरेपछि केही समयमै उक्त तस्बिर आफूले चाहेको भाषामा अनुवाद हुन्छ ।

ट्रान्सलेट भ्वाइस ट्रान्सलेटर

यो एपको सहयोगले आफ्नो भाषाको आवाज अर्थात भ्वाइसलाई अर्को भाषामा अनुवाद गर्न सकिन्छ । यो एपको सहयोगले भाषा अनुवाद गर्न कुनै टेक्स्ट टाइप गर्नुपर्दैन । यसमा ८० वटा भाषा अनुवाद गर्ने सुविधा उपलब्ध छ । यसको सहयोगले टेक्स्ट गरिएका विभिन्न भाषालाई आफ्नो भाषामा अनुवाद गर्न सकिन्छ, साथमा वर्ड सजेसन, स्पेलिङ करेक्ट जस्ता टुल पनि यो एपमा उपलब्ध छन् ।

उपरोक्त एपबाहेक इजी ल्यांग्वेज ट्रान्सलेटर, आई ट्रान्सलेटर, भ्वाइस ट्रान्सलेट फ्रीजस्ता विभिन्न प्रकारका एपसमेत उपलब्ध छन् । ती एप्स प्रयोग गरी विभिन्न भाषालाई आफूले बुझ्ने भाषामा अनुवाद गर्न सकिन्छ ।