सूचना प्रविधि क्षेत्रमा उल्लेखनिय काम गर्ने ब्यक्ति र संस्थालाई प्रदान गरिदै आएको आइसिटी अवार्ड को २०२० को अनलाइन नोमिनेसन सुरु भएको छ ।

हरेक बर्ष १७ अगस्टमा आयोजना हुने अवार्डको ग्राण्डफिनाले भने कोरोनाको प्रभाव र महामारीको कारण केही ढिला हुने अवार्ड संयोजक राजन लम्सालले जानकारी दिए । अनलाइन आवेदनको मिति सकिएपछि समय र अवस्था हेरेर अवार्डको फिनाले मिति घोषणा गरिने उनले बताए ।

यस वर्ष आयोजना हुने अवार्डमा विभिन्न ११ विधामा प्रदान गरिनेछ । लम्सालका अनुसार यस बर्ष ‘इन्नोभेसन इन क्राइसिस रेस्पोन्स’ र ‘वुमन आइकन’ थपिएका छन् ।

‘स्टार्टअप’, ‘प्रडक्ट’ र ‘राइजिङ स्टुडेन्ट’ शीर्षकका आइसिटी अवार्ड ‘स्टार्टअप’, प्रडक्ट र इन्नोभेसनको मूल्यांकन गरेर प्रदान गरिनेछन् । त्यस्तै सूचना प्रविधि क्षेत्रका सक्रिय र योगदान गरिरहेका व्यक्तिलाई प्रदान गरिने ‘पायोनियर’, ‘नेपाली डायस्पोरा’, ‘आन्टरप्रेनर’ र ‘मिडिया पर्सन’ शीर्षक अवार्डमा समावेश रहेका छन् । ‘डिजिटल गभर्नेन्स’ सरकारी संस्था र ‘डिजिटल एजुकेशन’ आइसिटी अवार्ड सामुदायिक शैक्षिक संस्थानलाई प्रदान गरिने गरिएको छ । सन् २०१६ देखि सुरु भएको आइसिटी अवार्डमा विभिन्न विधामा अहिलेसम्म ३० भन्दा बढी व्यक्ति, संस्था, कम्पनी तथा प्रोडक्ट सम्मानित भइसकेका छन् ।

यस वर्ष अवार्डको छनौट प्रक्रियालाई व्यवस्थित र सहज बनाउन १२ जना जुरी सदस्य र १० भन्दा बढी जुरी सल्लाहकार सदस्यले काम गर्ने छन् । छनौट प्रक्रिया विभिन्न चरणहरूमा हुनेछ । स्टार्टअप, प्रडक्ट, स्टुडेन्ट प्रोजेक्ट र इन्नोभेसनमा विभिन्न चरणबाट उत्कृष्ट ५ छान्दै अनलाइन तथा एसएमएस भोटिङ पनि सञ्चालन हुनेछ भने अन्य विधाहरूमा जुरी समूहले विभिन्न चरणमा छनौट प्रक्रिया सञ्चालन गर्नेछन् ।। यस वर्ष कोरोनाको संकटको कारण छनौट प्रक्रियालाई अझ बढी प्रविधिमैत्री बनाउनेमा जोड दिने योजना रहेको लम्सालले बताए ।