तपाइको फेसबुकमा विभिन्न गेम खेल्न अनुरोध आउने गरेकै होला । कतिपयले त वाक्क भएर यस्ता गेम खेल्ने अनुरोध नपठाउन फेसबुक वालमै अनुरोध गरेको समेत पाइन्छ । अहिले फेसबुक तथा अन्य अनलाइन माध्यममा गेम खेल्ने प्रचलनको निकै विकास भएको छ । क्यान्डी क्रस, फार्म हिरो आदि विभिन्न गेम अनलाइन रूपमा लोकप्रिय पनि छन् । 

केही समय पहिले फेसबुकमा खेलिने गेमका आधारमा फेसबुकले एउटा अध्ययन गरेको थियो । उक्त अध्ययनअनुसार त्यतिबेला फेसबुकका १ अर्ब ३० करोड प्रयोगकर्तामध्ये ३१ करोड ५० लाख प्रयोगकर्ताले मासिक रूपमा कमसेकम एउटा गेम खेल्थे । त्यस्तै गेम खेल्न अनुरोध गर्दै पठाइने नोटिफिकेसनको संख्या पनि बढेको थियो । फेसबुक प्रयोगकर्ताले हरेक दिन ७३ करोड ५० लाख नोटिफिकेसन पठाउने फेसबुकले जनाएको थियो । खासगरी स्मार्टफोन, एन्ड्रोइड तथा डेस्कटप तीन वटै स्थानमा खेल्न मिल्ने गेमले धेरै पैसा कमाउने तथ्यांक पनि फेसबुकले सार्वजनिक गरेको थियो । 

यसरी सर्वाधिक खेलिने गेममा क्यान्डी क्रस सागाले सबैलाई उछिनेको थियो । सन् २०१२ को अप्रिलमा सोसल नेटवर्कमा लन्च भएको उक्त गेम किङ नामक कम्पनीले निर्माण गरेको हो । त्यो समयमा फेसबुकमा यो धेरै खेलिने गेम भएको थियो । यसमा एउटा खेल निश्चित लेभलसम्म खेलेपछि अर्को लेभलमा पुग्न साथीबाट अनुमति अर्थात टिकट लिनुपर्ने हुन्छ । ३ जना साथीले अनुमती पठाइदिएपछि वल्ल अर्को लेभलमा पुगिन्छ । यदि साथीहरूले टिकट पठाईदिएनन् भने त्यही अडकिएर बसिरहनु पर्छ । यसले गर्दा पनि क्यान्डी क्रस खेल्नेहरूबाट विभिन्न नोटिफिकेसन आउँथ्यो । यद्यपि अफलाइन रूपमा र किनेर पनि यो खेल खेल्न सकिन्छ । 

पछिल्लो समयमा विभिन्न प्रकारका गेम बजारमा प्रचलित छन् । यस्ता गेम मोबाइलदेखि लिएर कम्प्युटर तथा ठूला गेम  जोनसम्ममा खेल्न सकिन्छ तै पनि फेसबुकमार्फत आएका गेम खेल्नेहरू बढी हुन्छन् । पैसा हुनेहरू भिडियो गेमका लागि आवश्यक सामग्री किनेर घरमै पनि गेम खेल्छन् । नहुनेहरू गेम जोनमा गएर खेल्न सक्छन् । यस्ता गेममध्ये विशेष गरी एक्सन, एड्भेन्चर वा स्पोर्ट्स गेम नै प्रचलित भएको पाइन्छ । अफलाइन गेमका लागि यी गेम प्रचलित छन् । अनलाइन रूपमा पनि इन्टरनेटमै विभिन्न गेम खेल्न सकिन्छ । कतिपयले व्यावसायिक रुपमै पनि यस्ता गेम खेल्छन् । यद्यपि व्यावसायिक रुपमै खेल्ने खेलाडीका लागि भने इन्टरनेटको गति अलि तीव्र हुनु आवश्यक छ ।

कुनै समय स्नेक ९७ खेलेर रमाउने नवीन ध्वजु हाल गुगल प्ले स्टोरमा उपलब्ध विभिन्न मोबाइल गेम खेलेर समय बिताउँछन् । स्नेक गेममा भए जस्तै ट्विस्ट र टर्न नै यी खेलमा पनि प्रयोग हुन्छ र कन्ट्रोल चाहिं पुरानै जस्तो हुन्छ । 

कुनै समय लुडो निकै लोकप्रिय थियो । लुडोले धेरैलाई आफ्नो बाल्यकालको सम्झना दिलाउँछ । केही वर्ष पहिले स्मार्टफोन नआउँदासम्म सबै उमेर समूहका मानिसहरू परिवारका सदस्य वा साथीभाइहरूसँग यो गेम खेलिरहेका पाइन्थे । समयक्रममा यो गेम खेल्ने शैलीमा समेत परिवर्तन आएको छ । अब यो गेम मोबाइल, ट्याब्लेट वा कम्प्युटरमा एक्लै पनि खेल्न सकिने भएको छ । 

आज लुडो विश्वका विभिन्न देशमा लोकप्रिय छ । यसका ठूला प्रतियोगिता समेत हुन्छन् । गुगल प्ले स्टोर वा एप्पलको एप स्टोरमा लुडो नामका अनेकन एप्स उपलब्ध छन् । सर्वाधिक लोकप्रिय मानिएको लुडो किङ एप १० करोड भन्दा बढी पटक डाउनलोड भैसकेको छ । 

लुडोको लोकप्रियताकै कारण नेपाली एप डेभलपर जीवन श्रेष्ठले ‘लुडो निओ क्लासिक’ एप तयार पारे । हाल उक्त एप यति लोकप्रिय छ कि त्यसका १ करोडभन्दा बढी प्रयोगकर्ता छन् । बाघचाल अब स्मार्टफोनमा समेत खेल्न सकिने भएको छ । यसका लागि अनलाइन बाघचाल नामक एप्स समेत बनेको छ । खासगरी कतार, दुबई आदि मुलुकमा यसको प्रयोग बढिरहेको बताइन्छ । यसका निर्माता सेमिकोलन डेभलपर्सका संस्थापक भूपाल सापकोटा भन्छन्, ‘बाघचाल नेपाली खेलका रूपमा विदेशीहरूमाझ समेत प्रसिद्ध भैरहेको छ ।’ केही भारतीयले समेत बाघचाल एप्स विकास गरेका छन् तर रियल टाइममा रहेर विश्वको जुनसुकै भागमा भएका अर्का व्यक्तिसँग खेल्न मिल्ने सुविधा सापकोटाको एप्समा मात्र छ । 

धेरै मानिसहरू ताससँग सम्बन्धित गेम निकै रुचाउँछन् । त्यसैले यससँग सम्बन्धित एप्सको प्रयोग पनि बढ्दो छ । यही कुरालाई ध्यानमा राखी नेपाली एप डेभलपरहरूले पनि त्यस्तै एप्स तयार पारेका छन् । जीवन श्रेष्ठले नै ‘कल ब्रेक प्लस प्लस’ एप्स निर्माण गरेका छन् र यसका प्रयोगकर्ता १० लाखको हाराहारी छन् । निमेष जोशीद्वारा निर्मित ‘कल ब्रेक’ एपका प्रयोगकर्ताको संख्या करिब ५ लाख छ । टेस्लाटेक नामक कम्पनीले बनाएको ‘कल ब्रेक मल्टिप्लेयर’ एप एक करोड भन्दा बढी पटक डाउनलोड भएको छ । सपन अर्यालद्वारा निर्मित ‘म्यारिज कार्ड गेम’ एपका प्रयोगकर्ता पनि ५ लाख भन्दा बढी छन् । नेपालीहरूमा कल ब्रेक तथा म्यारिज जस्ता गेमको लोकप्रियता बढी छ । यस्ता धेरै गेम विशेष गरी युवा पुस्तामा लोकप्रिय छन् ।

पब्जी

पछिल्लो समय पब्जी नामक खेल सबैको आकर्षणमा परेको छ । यो खेल एक सय जना सम्मले एकै पटक खेल्न सक्छन् । साथीभाइका बीच ४ जनाको समूह बनाएर पनि यो गेम खेल्न सकिन्छ । यो एक प्रकारको सामरिक युद्ध जस्तै गरी खेलिन्छ । यसमा आफ्ना हतियार तथा गाडीहरू प्रयोग गरी विपक्षीलाई हराउने प्रयास गरिन्छ । 

वल्र्ड क्रिकेट 

च्याम्पियनसिप–२

क्रिकेट फ्यानहरूका लागि विशेष रूपमा डेभलप गरिएको गेम हो— वल्र्ड क्रिकेट च्याम्पियनसिप–२ । यसमा भएका डट बल र विकेटका साथ बलरको कन्फिडेन्स मिटरमा बढ्ने ग्राफ, प्लेयर एट्रिब्युट सिस्टम तथा शानदार एनिमेसनका कारण यो साँच्चिकै क्रिकेट फ्यानकै लागि बनाइएको जस्तो लाग्छ । 

यसमा डिसिजन रिभ्यु सिष्टम, नयाँ स्टेडियम तथा अन्य कन्ट्रोल जस्ता विकल्प समेत सामेल छन् । यसमा क्यामेरा एंगल, टुर्नामेन्ट र च्यालेन्ज पूरा गर्न साथीहरूसँग ग्रुप बनाएर खेल्न सकिने फिचर पनि उपलब्ध छ । 

क्लास अफ क्लान्स

यो एक प्रकारको शैन्य रणनीतिमा आधारित गेम हो । गेमले प्रयोगकर्तालाई गाउँ, रेल तथा फौज बनाउने अवसर दिन्छ । गेम खेल्दै जाँदा प्रयोगकर्ताले विभिन्न आइटम किन्नुपर्ने हुन्छ । कम्पनीले यहींबाट प्रशस्त पैसा समेत कमाइरहेको छ । 

गेम अफ वार–फायर एज

यसमा प्रयोगकर्ताले आफ्नो साम्राज्य खडा गर्न सक्छन् । हिरोलाई तालिम दिएर लड्न पठाउन सक्छन् । प्रयोगकर्तालाई आफ्नो साम्राज्य बलियो बनाउन सुन किन्ने बिकल्प दिइन्छ, जसका लागि उनीहरूले पैसा तिर्नुपर्ने हुन्छ । 

ड्रिम लिगसकर–२०१८

यो स्पोर्ट्स विधाको गेम हो । यसमा सशक्त फुटबल टिम बनाएर खेलिन्छ । यो गेमको ग्राफिक्स धेरै राम्रो छ र गेमरहरू बीच लोकप्रिय समेत छ । स्मार्टफोनमा फुटबलको आनन्द लिन चाहनेहरूका लागि ड्रिम लिगसकर–२०१८ एउटा उत्कृष्ट गेम हो । यो गेम प्रत्येक वर्ष अपग्रेड भैरहेको छ । 

ग्रान्ड थेफ्ट अटो 

भाइस सिटी

यो गेमको विकास रकस्टार गेमले गरेको हो । रकस्टार गेमले ग्रान्ड थेफ्ट अटोका विभिन्न भर्सन उपलब्ध गराएको छ । यस पटक कम्पनीले यसको १०औं वार्षिकोत्सव मनाइरहेको छ । यसै सन्दर्भमा भाइस सिटी नामक नयाँ गेम डेभलप गरिएको छ । भाइस सिटी एउटा नयाँ सहर हो । यो खेल्न सहज त छँदैछ, यसको ग्राफिक्स पनि धेरै राम्रो छ । अहिले सम्मकै सबैभन्दा राम्रो गेम भनेर लेबल गरिएको यो गेम अपराध, एक्सन तथा फाइट मन पराउने गेमरहरूका लागि उपयुक्त मानिन्छ ।

एसफाल्ट–९ लिजेन्ड्स 

गेमलोफ्ट नामक कम्पनीले निर्माण गरेको रेसिङ गेमको श्रृंखला एसफाल्ट हो । हाल यसको नयाँ संस्करणका रूपमा एसफाल्ट–९ लिजेन्ड्स आइपुगेको छ । यसमा वास्तविक हाइपर कार जस्तै गरी गेम कार चलाउन पाइन्छ । विश्वमै तीव्र गतिका लागि लोकप्रिय फेरारी, पोस्र्चे, ल्याम्बोर्गिनी आदि ब्रान्डका कारलाई तीव्र गतिमा कुदाएर यो गेम खेल्न सकिन्छ । 

डुडल आर्मी–२ : 

मिनी मिलिसिया

मिनी मिलिसियाका धेरै गेम युवाहरूबीच लोकप्रिय छन् । डुडल आर्मी चाहिं अनलाइन मल्टि प्लेयर कम्ब्याट गेम हो जसमा अनलाइन खेल्दा एकैपटक ६ जना खेल्न मिल्छ भने, लोकल वाइफाई नेटवर्कमा १२ जना सम्म खेल्न सकिन्छ । यो गेमको मुख्य रणनीति भनेको विभिन्न हतियारको प्रयोगले शत्रुलाई निस्तेज तुल्याउनु हो । 

पोकेमन गो

पोकेमन गो एन्ड्रोइड र आइओएस दुवैमा सबैभन्दा लोकप्रिय मोबाइल गेम बन्न पुग्यो । निआन्टिक तथा निन्टेन्डोबीचको सहकार्यबाट तयार भएको यो गेम लोकेशनमा आधारित गेम हो । प्रारम्भमा यो गेम केही सीमित देशमा मात्र उपलब्ध थियो भने हाल विश्वका प्राय: सबै देशमा खेल्न सकिन्छ । यो गेममा जीपीएसमार्फत भर्चुअल प्राणी पोकेमनलाई खोज्ने, पक्रिने, युद्ध गर्ने आदि काम हुन्छ ।

स्कोर हिरो

फुटबल प्रेमीहरूका बीच लोकप्रिय छ— स्कोर हिरो । यो गेममा बललाई निश्चित स्थानमा पुर्‍याउन विभिन्न उपाय अपनाउनु पर्ने हुन्छ । यसमा ६ सय लेभलसम्म पुगेर हिरो बन्न सकिन्छ । 

गरिना फ्री फायर

गुगल प्ले स्टोरमा भएको फ्री फायर सर्भाइभल सुटर गेम हो । १० मिनेटको यो गेममा खेलाडी कुनै एकान्त टापुमा हुन्छ र त्यहाँ अन्य ४९ जना खेलाडीसमेत हुन्छन् । खेलाडीले आफूलाई लामो समय सम्म सुरक्षित राख्ने उपाय खोज्नु पर्ने हुन्छ । गाडी, सुरुङ आदि प्रयोग गर्ने वा घाँसमा लुक्ने वा अन्य जुनसुकै उपाय अपनाएर भए पनि आफूलाई जसरी पनि सुरक्षित राख्नु नै यो गेमको लक्ष्य हुन्छ । 

यसबाहेक अन्य विभिन्न मोबाइल गेम पनि उत्तिकै लोकप्रिय छ । विशेष गरी फुटबल, क्रिकेट तथा यस्तै लोकप्रिय गेमका विभिन्न एप्स निर्माण भएका छन् । फिफा १९, ड्रिम्स लिग, रबरी बब, किङडम रस, जेटप्याक जोयराइड, फ्ल्यापी बर्ड, क्लास रोयल, तीनपत्ति गोल्ड आदि त्यसका केही उदाहरण हुन् । 

नेपालमा पनि स्मार्टफोनसँगै गेम एप्सको प्रयोग बढ्दो छ । एक्लै वा साथीभाइसँग अनलाइन वा अफलाइन खेल्न सकिने भएकाले मोबाइलमा खेलिने गेमको प्रयोग पनि बढ्दै गएको मान्न सकिन्छ ।