जुम्लाको स्याउको नाम लिनेबित्तिकै मुख त रसाउँछ, तर जुम्लाको असली स्याउ भने आम उपभोक्ताले कमै खान पाइरहेका छन् । किनभने त्यहाँको स्याउ ठेकेदारी प्रथाका कारण पाक्ने बेला नहुँदै बजारमा पुग्छन् भने ढुवानीमा हेलचेक्र्याइँ गर्दा स्याउ एक–अर्कामा चेपिएर चोटग्रस्त हुन्छन् जसले गर्दा ती स्याउ खाँदा नमीठा र सौन्दर्यमा अनाकर्षक देखिन्छन् । यिनै कारणले गर्दा उपभोक्ताहरूले जुम्लाको स्याउको वर्णन नै गर्न बिर्सिसकेका छन् । 

यही कुरालाई मध्यनजर गरेर सुह्द चापागाईं लगायत उनको टिमले स्थापना गरेको सेफ फुडले जुम्लाको स्याउको असली स्वाद चखाउने जमर्को गरेको छ । मौसमअनुसार भदौमा जुम्लेली स्याउ पाक्छ, त्यही भएर उनले भदौ नलागी स्याउ नटिप्ने सम्झौता गरेका छन् । स्याउको सौन्दर्य नबिग्रियोस् भनेर बलियो कार्टुनको व्यवस्था मिलाइएको छ भने ढुवानी गर्ने क्रममा धेरै ठूलो चाङ बनाउँदा ट्रकमा स्याउ कुचिन्छ भनेर थोरै–थोरै गरेर काठमाडौं ल्याइन्छ । 

ए ग्रेडको यो स्याउको बजार व्यवस्थापनमा बीचमा कुनै किसिमको बिचौलिया नभएका कारण कृषकले स्याउको उचित मूल्य पाएका छन् भने स्याउको उपभोक्ता मूल्य तोकिएका कारण अहिले हाटबजारमा जुम्लाको वास्तविक रसिलो स्याउ उचित मूल्यमा बिक्री भैरहेको छ ।