सन् २०२१ का लागि अमेरिकी इलेक्ट्रोनिक्स डाइभर्सिटी भिसा (डिभी) को आवेदन खुलेको छ । नेपाली समयअनुसार असोज १५ गते बुधबार राति ९:४५ बजेबाट आवेदन दर्ता सुरु भएको काठमाडौंस्थित अमेरिकी दूतावासले जनाएको छ । डिभी चिट्ठा आवेदन कात्तिक १९ गते मंगलबार राति १०:४५ बजे बन्द हुनेछ । दूतावासले डिभी आवेदकलाई चाँडै आवेदन दिन आग्रह गरेको छ । डिभी चिट्ठा भर्नका लागि कुनै पनि शुल्क तिर्नु पर्दैन । अमेरिकी दूतावासले डिभी चिट्ठा भर्दा कन्सल्टेन्टको सहयोग नलिन सल्लाह दिएको छ । डिभी चिट्ठा नि:शुल्क भएकाले कुनै पनि शुल्क नतिर्न समेत दूतावासले आग्रह गरेको छ । अमेरिकी दूतावासले डिभी भर्न सहयोग चाहिए परिवारका सदस्य, साथी वा अन्य विश्वासिलो व्यक्तिको सहयोग लिन आग्रह गरेको छ । सहयोग जसले गरे पनि आफ्नो आवेदनको जिम्मेवार स्वयं रहनुपर्ने दूतावासले जनाएको छ । 

नि:शुल्क रूपमा डिभी लोटरी चिठ्ठा भरेर विदेश जान पाउने भएपछि डिभी भरेर विदेश जान खोज्नेको लर्को डिभी भर्ने ठाउँमा देखिन्छ । आफैंले घरमै बसेर नि:शुल्क भर्न सक्ने भए पनि डिभी भर्ने ठाउँमै पुगेर रकम तिरेर भर्न उनीहरूलाई संकोच लाग्दैन । किनभने उनीहरूलाई अमेरिका पुग्ने हुटहुटी हुन्छ, तर अहिले डिभी भर्नका लागि पासपोर्ट नम्बर अनिवार्य भएपछि यसतर्फको भीड घट्ने देखिन्छ । 

डिभी २०२१ का लागि नयाँ व्यवस्थाअन्तर्गत मुख्य आवेदकको बहालवाला, म्याद नसकिएको, विदेश भ्रमण गर्न मिल्ने राहदानीको राहदानी सङ्ख्या, जारी भएको देश र म्याद समाप्त हुने मिति लगायतको जानकारी दिनुपर्नेछ । यो व्यवस्था मुख्य आवेदकको हकमा मात्र लागू हुनेछ र आश्रितहरूलाई लागू हुनेछैन । विदेश भ्रमणका लागि जारी भएको आफ्नो बहालवाला राहदानीको सही संख्या उपलब्ध गराउनुपर्नेछ । यदि आवेदक राज्यविहीन छन्, कम्युनिस्ट नियन्त्रित मुलुकको नागरिक हुन् र उक्त कम्युनिस्ट मुलुकको सरकारबाट राहदानी प्राप्त गर्न सक्दैनन्, वा अमेरिकी आन्तरिक सुरक्षा मन्त्री र अमेरिकी विदेशमन्त्रीबाट स्वीकृत व्यक्तिगत छुट पाउने लाभग्राही हुन् भने त्यस्ता आवेदकलाई यो व्यवस्था लागू नहुने अमेरिकी दूतावासले जनाएको छ । 

सन् २०२१ को डिभी चिट्ठाका लागि आवेदकहरूले फारम भर्न पाइने मितिभित्र www.dvlottery.state.gov मा गई डिभी चिट्ठाको आवेदन फारम भर्नुपर्नेछ । फारम भर्दा आफ्ना श्रीमान्–श्रीमती र फारम भर्ने मिति कात्तिक १९ गते राति १०:४५ बजेसम्म २१ वर्ष नपुगेका सबै अविवाहित सन्तानको विवरण अनिवार्य भर्नुपर्नेछ । श्रीमान्, श्रीमती र सन्तानको विवरण नभरी पेस गरिएको आवेदन मान्य हुनेछैन । एकजना व्यक्तिले एउटा मात्र आवेदन फारम बुझाउन सक्नेछन् । एकभन्दा बढी आवेदन फारम बुझाउने आवेदक चिट्ठाका लागि अयोग्य ठहरिनेछन् । अघिल्लो वर्षको डिभी भर्दा प्रयोग गरिएको तस्बिर यस वर्षको आवेदनमा प्रयोग गर्न मिल्दैन । तस्बिरसम्बन्धी नियमहरू कडाइका साथ पालना गर्नुपर्नेछ ।

पेस गरिएको तस्बिर आवेदनमा समावेश भएका सही व्यक्तिहरूसँग मेल खाने हुनुपर्नेछ । चस्मा लगाएर खिचिएको तस्बिर स्वीकार्य हुनेछैन । डिभीका लागि पेस गरिने तस्बिरले पनि अमेरिकी भिसाका लागि पेस गरिने तस्बिरसरहकै मापदण्ड पूरा गर्नुपर्छ । आवेदक र आवेदकका परिवारका सदस्यको तस्बिर कुनै पनि प्रकारले मिलाइएको वा त्यसले मापदण्डहरू पूर्ण रूपमा पूरा नगरेको खण्डमा आवेदन अयोग्य ठहरिनेछ वा भिसा जारी हुनेछैन । आवेदन जुनसुकै देशमा भएका नेपालीले दिन सक्नेछन् । 

आवेदन दिने योग्यता माध्यमिक तहको शिक्षा वा त्यसको समानार्थ शिक्षा जसको अर्थ प्राथमिक र माध्यमिक गरी १२ वर्षे औपचारिक शिक्षा सफलताका साथ पूरा गरेको वा विगत पाँच वर्षमा दुई वर्षको कामको अनुभव भएको हुनुपर्छ । त्यस्तो काम जसका लागि कम्तीमा दुई वर्षको तालिम वा अनुभव आवश्यक पर्छ । कामको अनुभव योग्य भए/नभएको निर्धारण युएस डिपार्टमेन्ट अफ लेबर (अमेरिकी श्रम मन्त्रालय) को इ८ल्भत इलीष्लभ को डेटाबेसद्वारा गरिनेछ ।

 डिभी भरेपछि आफ्नो कन्फर्मेसन नम्बरलाई सेभ वा प्रिन्ट गरेर राख्नुपर्नेछ । किनभने पछि डिभी परे नपरेको हेर्ने यही कन्फर्मेसन नम्बरबाट हो । तपाईलाई डिभी चिट्ठा पर्‍यो कि परेन भन्ने कुरा आगामी २०७७ साल वैशाख २३ गते (मे ५, २०२०) का दिन थाहा हुन्छ अर्थात् २०७७ को वैशाख २३ गते मंगलबारदेखि www.dvlottery.state.gov मा गै आफ्नो कन्फर्मेसन नम्बर टाईप गरी नतिजा हेर्न सकिनेछ । यसरी डिभी चिट्ठाको आवेदन फारम भर्न र नतिजा हेर्नको लागि कुनै रकम तिर्नु पर्दैन । डिभी कार्यसम्बन्धी अन्य जानकारीका लागि काठमाडौंस्थित अमेरिकी दूतावासको वेबसाइट https://np.usembassy.gov/visas/immigrant-visas मा हेर्न सकिनेछ । 

आवेदन दर्ता गर्दा आवेदकहरूले आफ्नो इमेल ठेगाना प्रदान गर्नुपर्नेछ, तर छनौट भएका व्यक्तिहरूलाई उनीहरू छानिएका छन् भन्ने बेहोराको इमेल सूचना भने आउँदैन । अर्को कुरा, तपाइं डिभी विजेताका रूपमा छानिदैमा तपाईंले भिसा पाउनुहुन्छ भन्ने कुराको प्रत्याभूति हँुदैन । तपाईंले भिसाका लागि अन्तर्वार्ता दिने मौका पाउनुभयो भने कन्सुलर अफिसरले तपाईसँग आवश्यक योग्यता छ वा छैन र अमेरिकी आप्रवासी कानुनबमोजिम डिभीका लागि तपाईं योग्य हुनुहुन्छ कि हुनुहुन्न भन्ने कुराको निक्र्योल गर्नेछन् । डिभी लोटरी परेर पनि गलत विवरण र न्यूनतम योग्यता नपुगेको कारण अमेरिका जानबाट वञ्चित हुनेहरूको संख्या समेत उतिकै भएकाले डिभी आवेदन भर्दा सचेत बन्नुपर्ने हुन्छ ।

डिभी लोटरी खुलेको मौका छोपेर नि:शुल्क भर्न पाइने डिभी भरिदिने नाउँमा आवेदकबाट मनपरी रकम लिई ठग्नेहरूको सक्रियता सुरु भैसकेको छ । सहर–बजारका विभिन्न पसल, कन्सल्टेन्सी, फोटो स्टुडियोलगायतका विभिन्न ठाउँमा डिभी भरिन्छ भन्दै पर्चा–पम्पलेट बाँडिरहेका छन्, तर अघिल्ला वर्षको तुलनामा यो वर्ष भीड भने कम छ । त्यसको कारण म्याद भएको पासपोर्ट अनिवार्य गराइएकाले हो । पासपोर्ट अनिवार्य गरेपछि डिभी भर्ने उद्देश्यले पासपोर्ट बनाउन खोज्नेहरू पनि उत्तिकै देखिन थालेका छन् ।