वर्ष २०१८ मा हलिउडमा प्रदर्शन भएका चलचित्रमध्ये उत्कृष्ट व्यवसाय गर्न सफल केही चलचित्रहरू :

1

एभेन्जर्स : इन्फिनिटी वार 

निर्देशक : एन्थनी रुसो तथा जो रुसो 

कलाकार : रोबर्ट डोनी जुनियर, क्रिस हेमस्वर्थ, मार्क रफ्लो, क्रिस इभान्स, स्कार्टेल जोहन्ससन आदि ।

२३ अप्रिल २०१८ का दिन प्रदर्शनमा आएको यो चलचित्र वर्षकै सबैभन्दा बढी आम्दानी गर्न सफल चलचित्र हो । यो एउटा अमेरिकी सुपरहिरो चलचित्र हो, जुन मार्वल कमिक्सको सुपरहिरो टिम एभेन्जर्समा आधारित छ । सन् २०१२ मा सार्वजनिक भएको चलचित्र द एभेन्जर्स तथा २०१५ को एभेन्जर्स : एज अफ अल्ट्रानको सिक्वेलका रूपमा प्रदर्शन भएको एभेन्जर्स : इन्फिनिटी वार मार्वल सिनेमेटिक युनिभर्सको १९ औं चलचित्र हो । साइन्स फिक्सनमा आधारित यो चलचित्रमा एभेन्जर्स तथा गार्जियन्स अफ द ग्यालेक्सीसँग मिलेर थेनसलाई रोक्ने प्रयास गरिएको छ, जो अलौकिक मणी संकलन गर्ने अभियान छ । यो चलचित्रलाई हलिउडको हालसम्मकै सबैभन्दा महँगो चलचित्र मानिएको छ । यसमा ३ सय २० मिलियन डलर लगानी गरिएको थियो । यो चलचित्रले विश्वभरिबाट २ बिलियन डलरभन्दा बढी संकलन गरेको बताइन्छ । 

2

ब्ल्याक प्यान्थर 

निर्देशक : रियान कूगनर 

कलाकार : चाडविक बोसम्यान, माइकल बि जोर्डन, लुपिता न्योङ, डानिया गुरिरा, मार्टिन फ्रिम्यान आदि । 

२९ जनवरी २०१८ मा प्रदर्शित चलचित्र ‘ब्ल्याक प्यान्थर’ यो वर्ष सर्वाधिक आम्दानी गर्ने चलचित्रको दोस्रो स्थानमा छ । यो एउटा अमेरिकी सुपरहिरो चलचित्र हो, जुन मार्वल कमिक्सको यही नामको चरित्रमा आधारित छ । यो चलचित्रमा अभिनेता चाडविक बोसम्यानले टी चाल्लाको भूमिका निर्वाह गरेका छन् । चलचित्रको कथा अनुसार टी चाल्ला सिभिल वारका घटनाहरूपछि वकाण्डाको राजाका रूपमा घर फर्कन्छन्, जहाँ उनी एक पुराना विरोधीबाट खतरा देख्छन् । समीक्षकहरूले यो चलचित्रलाई वर्षकै सर्वश्रेष्ठ चलचित्र मान्दै यसको सांस्कृतिक महत्वका बारेमा उल्लेख गरेका छन् । २ सय मिलियन डलर लगानी भएको यो चलचित्रले विश्वभरिबाट १३ अरब डलर आम्दानी गरेको थियो । 

3

जुरासिक पार्क : फलेन किङ्डम

निर्देशक : जे ए बायोना

कलाकार : फ्राङ्क मार्शल, प्याट्रिक क्रोली, बेलेन एटिन्जा आदि ।

यो २२ जुन २०१८ मा प्रदर्शनमा आएको साइन्स फिक्सन एड्भेन्चर चलचित्र हो । सन् २०१५ मा प्रदर्शित जुरासिक पार्कको यो सिक्वेल चलचित्र यही श्रृंखलाको पाँचौं चलचित्र हो । पहिलो पटक प्रदर्शन भएको जुरासिक पार्कको मिति अनुसार यो वर्ष जुरासिक पार्कको २५ औं वार्षिकोत्सव समेत हो । चलचित्रको इतिहासमै यो सबैभन्दा बढि लोकप्रिय तथा सफल श्रृंखलामध्ये एक मानिन्छ । युनिभर्सल पिक्चर्सको यो चलचित्रमा सन् १९९३ देखि जुरासिक पार्क श्रृंखलाका सबैभन्दा लोकप्रिय चरित्रमध्ये एक अभिनेता जेफ गोल्डब्लमलाई पछिल्लो श्रृंखलामा डाक्टर इयान मेल्कमका रूपमा समावेश गरिएको छ । यो चलचित्र थिम पार्क तथा लग्जरी रिसोर्ट जुरासिक पार्कलाई डाइनोसरले नष्ट गरेको दृश्यबाट प्रारम्भ हुन्छ । इस्ला नुबलर द्वीपलाई मानिसहरूले त्यागिसकेका छन् । यो चलचित्रमा डाइनोसरले जंगलमा राज गरेको प्रसंगलाई प्रभावकारी शैलीमा चित्रण गरिएको छ । १ सय ७० मिलियन डलर लगानी गरिएको यो चलचित्रले १३ बिलियन डलर आम्दानी गरेको बताइन्छ । 

4.

इन्क्रिडिबल्स– २

निर्देशक : ब्रान्ड विर्ड

कलाकार : क्राइग टी नेल्सन, होली हन्टर, सराह भोवेल, हङ्क मिल्नर, समुइल एल ज्याक्सन आदि । 

१५ जुन २०१८ का दिन विश्वव्यापी प्रदर्शनमा आएको यो चलचित्र थ्रीडी कम्प्युटर एनिमेटेड सुपरहिरो चलचित्र हो । यो चलचित्रमा एक जना व्यक्ति आफ्ना नयाँ शत्रुसँग लड्दै सामान्य जनतालाई बदल्ने क्रममा एउटा परिवारलाई पछ्याउँछन् । यो चलचित्रको कथा तिनै शत्रु तथा सामान्य परिवारबीचको संघर्षमा आधारित छ । १ घण्टा १८ मिनेट लामो यो चलचित्रको कथा अनुभवी लेखक ब्रान्ड बिर्डले लेखेका हुन् । कलाकारहरूको जीवन्त अभिनयसँगै प्रभावकारी कथाका कारण यो चलचित्रलाई दर्शकहरूले मन पराएका हुन् । २ सय मिलियन डलरमा तयार भएको यो चलचित्रले १२ बिलियन डलर आम्दानी गरेको थियो । 

5.

भेनम

निर्देशक : रुबेन फ्लेस्चर

कलाकार : टम हार्डी, माइकल विलियम, स्कट हेज, रिज अहमद, रेड स्कट आदि ।

१ अक्टोबर २०१८ मा प्रदर्शनमा आएको चलचित्र ‘भेनम’ यो वर्ष सर्वाधिक आम्दानी गर्ने चलचित्रको पाँचौं स्थानमा छ । कोलम्बिया पिक्चर्सले यो चलचित्र १ सय १६ मिलियन डलरमा निर्माण गरेको हो, जसले ८ सय ५४ मिलियन डलर आम्दानी गरेको थियो । भेनम पनि अमेरिकी सुपरहिरोमा आधारित चलचित्र हो । यो चलचित्र मार्बल कमिक्सको भेनम नाम गरेको पात्रमा आधारित छ । 

6.

मिसन इम्पोसिबल–फलआउट

निर्देशक : क्रिस्टोफर क्याक्वेरी 

कलाकार : टम क्रुज, हेन्सी 

काभिल, भिङ रम्स, सिमोन पेग, रेबेका फग्र्युसन आदि ।

२७ जुलाई २०१८ मा प्रदर्शित हलिउड सुपरस्टार टम क्रुजको यो चलचित्र १ सय ७८ मिलियन डलरमा निर्माण भएको हो । यो चलचित्रले ७ सय ९१ मिलियन डलर आम्दानी गरेको छ । द्वन्द्वप्रधान यो चलचित्र जासुसी लडाइँमा आाधरित छ । मिसन इम्पोसिबलको यो तेस्रो श्रृंखला एउटा मिसनमा आधारित छ । आईएमएफको लक्ष्य पूर्ण रूपमा विफल भएपछि विश्वले त्यसको गम्भीर परिणाम भोग्नु परेको थियो । चलचित्रका मुख्य पात्र ईथन हन्ट (टम क्रुज) असफलताको जिम्मेवारी स्वीकार गर्दै त्यही अभियानलाई पुरा गर्ने योजनाका साथ अघि बढ्छन् । यद्यपि सीआईएले उनको कामप्रति सधैं प्रश्न उठाइरहन्छ । विश्वलाई संकटबाट जोगाउन उनले हत्याराहरूका साथ–साथै आफ्नै पुराना सहयोगीहरूसँग पनि लड्नुपर्छ । प्लेटेनियम धातुलाई खतरनाक हातमा पर्नबाट जोगाउनु नै यो चलचित्रका नायकको मुख्य उद्देश्य हो । 

7.

डेडपुल–२

निर्देशक : डेविड लिच

कलाकार : रायन रेलाल्ड्स, जोश ब्रोलिन, मोरेना बेक्करीन, जुलियन डेनिसन, जजी बीटज आदि । 

१८ मे २०१८ मा प्रदर्शनमा आएको यो चलचित्र १ सय १० मिलियन डलरमा निर्माण भएको हो, जसले ६ सय ५७ मिलियन डलर बराबरको व्यवसाय गरेको बताइन्छ । यो अमेरिकी सुपर हिरो चलचित्र मार्वल कमिक्सको चरित्र डेडपुलमा आधारित छ । एक्स म्यान श्रृंखलाको यो ११ औं चलचित्र सन् २०१५ मा प्रदर्शित डेडपुलको सिक्वेल पनि हो । यो चलचित्र भविष्यबाट आएका एक जना सिपाहीले एउटा एक्स फोर्स शीर्षकको टीम गठन गरेर सुरक्षासम्बन्धी गतिविधिमा केन्द्रित रहने कथामा आधारित छ । 

8.

बोहेमियन र्‍यापसोडी 

निर्देशक : ब्रायन सिंगर तथा डेक्स्टर फ्लेचर

कलाकार : रमी मलिक, लुसी व्याइन्टन, ग्विलिम लि, बेन हार्डी आदि । 

२३ अक्टोबर २०१८ मा प्रदर्शनमा आएको यो चलचित्र एउटा बायोग्राफी हो, जसमा बेलायती सांगीतिक समूह क्विनलाई चित्रण गरिएको छ । चलचित्रमा उक्त ब्यान्डका गायक फ्रेडी मर्करीको जीवन चित्रण गरिएको छ । फ्रेडीले सन् १९८५ मा विम्ली स्टेडियममा दिएको कन्सर्टलाई चलचित्रको मुख्य विषय बनाइएको छ । यो बेलायती–अमेरिकी चलचित्रलाई ट्वान्टिथ सेन्चुरी फक्सले निर्माण गरेको हो । ५५ मिलियन डलर लगानी गरिएको यो चलचित्रले ६ सय ६७ मिलियन डलर आम्दानी गरेको थियो । 

9.

एन्ट–म्यान एन्ड वास्प

निर्देशक : पेटन रीड

कलाकार : पल रुड, इभान्जेलिन लिली, माइकल पेना, वाल्टन गोगिन्स, जोडी ग्रिर आदि ।

२५ जुन २०१८ मा प्रदर्शित यो चलचित्र १ सय ९५ मिलियन डलरमा तयार पारिएको हो, जसले ६ सय २२ मिलियन डलर आम्दानी गरेको छ । वाल्ट डिज्नीको यो अमेरिकी सुपरहिरो चलचित्र मार्बल कमिक्सको चरित्र स्कट ल्याङ/एन्ट म्यानमा आाधारित छ । 

10.

फेन्टास्टिक 

बिट्स : द क्राइम्स अफ ग्रिन्डवाल्ड

निर्देशक : डेविड येट्स 

कलाकार : इडी रेडमेन, क्याथराइन वाटरसन, डन फोथ्लर, एलिसन 

सुडोल आदि । 

९ नोभेम्बर २०१८ मा प्रदर्शनमा आएको यो एउटा फेन्टासी चलचित्र हो । जेके रोलिङको लेखनमा निर्माण भएको यो चलचित्रमा २ सय मिलियन डलर लगानी गरिएको थियो, जसले ६ सय १२ मिलियन डलर आम्दानी गरेको बताइन्छ । बेलायत तथा अमेरिकामा संयुक्त रूपमा निर्माण गरिएको यो चलचित्र दुई वर्षअघि प्रदर्शित फेन्टास्टिक बिट्स एन्ड ह्वेयर टु फाइन्ड देमको सिक्वेल हो ।