लुका मोडरिच, फुटबल

सन् २०१८ का सबैभन्दा ठूला स्टार हुन्– लुका मोडरिच । उनको नेतृत्वमा क्रोएसियाले गत वर्षको विश्वकपमा फाइनलसम्मको यात्रा तय गर्‍यो । उक्त यात्रामा यी रियल म्याड्रिड स्टारको भूमिका महत्त्वपूर्ण रह्यो । उनले रियलका लागि पनि उत्तिकै गतिलो प्रदर्शन गरे र उनको क्लब युरोपेली च्याम्पियन भयो । लुका लियोनल मेसी र क्रिस्टियानो रोनाल्डो दुवैलाई पछाडि छाड्दै गत वर्ष लगभग सबै अवार्डमा वर्षको उत्कृष्ट फुटबल खेलाडी चुनिए । 

क्रिस्टियानो रोनाल्डो, फुटबल

विश्वकप–२०१८ मा क्रिस्टियानो रोनाल्डोको पोर्चुगलले खासै ठूलो उपलब्धि त हात पार्न सकेन, तर उनको क्लब रियल म्याड्रिडले भने युरोपेली च्याम्पियन्स लिग जित्यो । युरोपमा रियलको लगातार प्रभावशाली प्रदर्शनमा सबैभन्दा भन्दा ठूलो योगदान रोनाल्डोकै मानिन्छ, तर गत वर्ष उनी रियल छाडेर इटालीको सिरी ए क्लब युभेन्ट्स पुगे । इटाली आएपछि पनि रोनाल्डोले राम्रै प्रदर्शन गरिरहेका छन् र क्लब लिग उपाधितर्फ उन्मुख छ । 

लियोनल मेसी, फुटबल

अर्जेन्टिनाका लागि लियोनल मेसीले पनि विश्वकप–२०१८ मा खासै केही गर्न सकेनन, तर पनि उनको चर्चा सेलाएन । अहिले उनी उत्कृष्ट लयमा छन् र आफ्नो स्पेनिस क्लब बार्सिलोनाका लागि फेरि एकपटक सम्मोहित गर्न सक्ने प्रभावशाली खेल खेलिरहेका छन् । बार्सिलोना अहिले स्पेनिस ला लिगामा मजबुत छ र उपाधिका लागि बलियो उम्मेदवार सावित भएको छ । यसको एक मात्र कारण मेसी नै हुन् । 

केयलिन एमबापे, फुटबल

गत वर्षको विश्वकपलाई कुनै युवा खेलाडीका लागि सम्झिइने छ भने ती हुन्, फ्रान्सका एमबापे । विश्वकपका क्रममा एमबापे १९ वर्षका थिए, तर उनले पूरा प्रतियोगितामा उमेर भन्दा धेरै परिपक्व खेल खेले र धेरैले उनलाई ब्राजिलका महान खेलाडी पेलेसँग तुलना गरे । फ्रान्सले फेरि एकपटक विश्वकप जित्नुमा उनको प्रभावशाली खेल निर्णायक रह्यो । 

मोहम्मद सलाह, फुटबल

क्लब फुटबलमा उत्कृष्ट प्रदर्शनका लागि सन् २०१८ मा सबैभन्दा सम्झिइने नाम हुन्, इजिप्टका मोहम्मद सलाह । इंग्लिस प्रिमियर लिगमा उनकै प्रदर्शनका आधारमा लिभरपुल शीर्ष स्थानमा छ । यसपटकको च्याम्पियन्स लिगको फाइनलमा लिभरपुलको यात्रा पनि उनकै कारण सम्भव भएको हो । 

विराट कोहली, क्रिकेट

भारतीय क्रिकेट कप्तान विराट कोहलीलाई मन पराउने जति छन्, उत्तिकै मन नपराउनेहरू पनि छन् । कोहली आफ्नो आक्रामक व्यवहारका लागि प्राय: बदनाम भैरहन्छन्, तर विश्व क्रिकेटमा अहिलेको पुस्ताका खेलाडीमध्ये उनी नै सबैभन्दा ठूला स्टार हुन् । यी २९ वर्षीय खेलाडी सन् २०१८ भरीनै लयमा देखिए । टेस्ट क्रिकेटमा गत वर्ष उनी सर्वाधिक रन बनाउने खेलाडी हुन् भने, वान डे क्रिकेटमा पनि उनी उत्तिकै लयमा छन् । अहिले त्यसमा उनको औसत, सय रनको छेउछाउमा छ । 

जोए रुट, क्रिकेट

पारम्परिक क्रिकेट मन पराउनेहरूका लागि सबैभन्दा प्रिय हुन सक्छन् इंग्ल्यान्डका युवा कप्तान जोए रुट । टेस्ट क्रिकेटमा उनी लगातार लयमा छन् र उनको त्यही प्रदर्शनको मदतले इंग्ल्यान्ड फेरि एक पटक विश्व क्रिकेटमा बलियो टिम सावित भएको छ । रुट वान डे क्रिकेटका पनि राम्रा ब्याट्सम्यान सावित भएका छन् । 

नोभाक जोकोभिच, टेनिस

एउटा खेलाडीले आफ्नो खेल जीवनमा कति धेरै उतारचढाव बेहोर्नुपर्छ, त्यो नोभाक जोकोभिचको खेल हेरे पुग्छ । यी सर्बियाली खेलाडी केही समय अघिसम्म खराब समयबाट गुज्रिरहेका थिए । त्यही कारणले उनले प्रतियोगताहरूबाट टाढा रहेर केही समय आराम पनि लिए । जति बेला उनी कोर्टमा फर्किए, पुरानै लयमा आए । सन् २०१८ को अन्त्यतिर सबैभन्दा लयमा देखिएका खेलाडी जोकोभिच नै हुन् । यसैक्रममा उनले विम्बल्डन र यूएस ओपन दुवै जिते । 

सिमोना हालेप, टेनिस

रोमानियाकी सिमोना हालेप महिला टेनिसकी नम्बर १ खेलाडी हुन् । उनले गत वर्षको अन्त्यमा पनि त्यो स्थान गुमाइनन् । सन् २०१८ उनका लागि निकै सुखद रह्यो । उनीमाथि आरोप थियो, उनी राम्री खेलाडी त हुन्, तर ग्रान्ड स्लाम जित्न सक्षम छैनन, तर त्यसलाई गलत सावित गर्दै उनले सुरुमा फ्रेन्च ओपन जितिन् भने त्यसपछि अस्ट्रेलियनओपनको उप विजेता रहिन् । 

कोनर म्याकग्रेगर, मिक्ड मार्सल आर्टस

कोनर म्याकग्रेगर गज्जबका खेलाडी हुन्, यसका कुनै शंका छैन । खासमा उनी मिक्ड मार्सल आर्ट्सका खेलाडी हुन् । एक वर्ष मात्र भयो, उनले व्यवसायिक बक्सिङ खेल्न थालेको । यी दुई विधामा सफल भएर नै यी आइरिस खेलाडीले सन् २०१८ मा मनग्य कमाए र लगातार चर्चामा रहे ।