प्रशासनले रोक लगाएपछि संखुवासभा र तेह्रथुमको संगमस्थल गुफा पोखरी क्षेत्रमा तय गरिएको अन्तर्राष्ट्रिय कलाकार सम्मिलित म्युजिक फेस्टिभल अन्तिम समयमा स्थगित भएको छ । प्रशासनले म्युजिक फेस्टिभल ट्रान्स पार्टी भएको जनाऊँदै त्यसमा रोक लगाएको हो, तर मुख्य कार्यक्रम आयोजक शत्तिपिक म्युजिक फेस्टिभलका पदाधिकारीहरूले उक्त समारोह ट्रान्स पार्टी नभएको दाबी गरेका छन् । प्रशासनले गलत अनुमान गरेको भन्दै शक्ति पीकका प्रमुख सुवास केसीले म्युजिक, डान्स, योग, मेडिटेसन तथा नेचर क्याम्पजस्ता क्रियाकलाप माक्र सञ्चालन गर्ने कार्यत्रम रहेको बताए । 

प्रशासनले रोक लगाएका कारण शुक्रवारदेखि आगामी वैशाख ७ गतेसम्म तय गरिएको पूर्वघोषित कार्यक्रम स्थगित गरिएको मादी नगरपालिका–९ का वडाध्यक्ष पाशाङ शेर्पाले जानकारी दिए । उक्त नगरपालिकाले भने कार्यक्रम गर्न स्वीकृति दिएको उनले बताए । प्रहरीले बाटैबाट सहभागीहरूलाई फर्काएपछि सयौं विदेशी पर्यटक तीन दिनसम्म हिलेमै रोकिएका थिए । हिलेस्थित होराइजन होटलमा बस्दै आएका सयौं पर्यटकलाई कार्यक्रम नहुने जानकारी गराएर सम्झाई–बुझाई फिर्ता गरिएको धनकुटा प्रहरी प्रमुख (एसपी) सुरेन्द्रबहादुर गुरुङले जानकारी दिए । उनका अनुसार सोमवार पनि सयौं सहभागी धनकुटा पुगेका थिए । ऊक्त कार्यत्रमका सम्बन्धमा पर्यटन बोर्ड तथा गृह मन्त्रालयलाई कुनै जानकारी नभएकाले रोक लगाउनु परेको उनको दाबी थियो । प्रहरीले कार्यक्रममा सहभागी हुन पुगेका विदेशीहरूका साथमा लागूऔषध रहेको आशंकामा चेकजाँच समेत गरेको थियो । यद्यपि उनीहरूबाट त्यस्ता वस्तु फेला नपरेको एसपी गुरुङले जनाए । 

हिलेबाट फर्किएका सयौं विदेशी पर्यटक काठमाडौं फर्कने क्रम जारी छ । उनीहरूले कार्यक्रम रोकिएको जानकारी पाएकाले फर्किएको प्रतिक्रिया दिए । अधिकांसले जुन उद्देश्यले यात्रा गरिएको हो, त्यसअनुरुप उपलब्धि हुन नसक्दा दुःख व्यक्त गरे । आयोजक र प्रहरीबीच तालमेल नभएकाले कार्यक्रम हुन नसकेको जानकारी पाएको एक विदेशीले बताए । म्युजिक फेस्टिभल हुने भएकाले आफू नेपाल आएको बंगलादेशका म्युजिसियन डा. एरिफ साइकले बताए । 

आयोजकले अघिल्लो वर्ष सोही स्थानमा आयोजना गरिएको यस्तै कार्यक्रममा प्रहरी, प्रशासन तथा उच्च पदस्थ व्यक्तिहरू समेत सहभागी भएका थिए । आयोजकहरूले गत वर्षपनि सोहि स्थानमा म्युजिक फेस्टिभलको आयोजना गरेका थिए । अघिल्लो वर्ष गरिएको कार्यक्रममा प्रहरी प्रशासन, राजनीतिक दलका नेतादेखि विशिष्ट व्यक्तिको सहभागिता हुनु र यो वर्ष अन्तिम समयमा अवरोध गरिनु दुखद रहेको मादी नगरपालिकाका–९ का वडाध्यक्ष पासाङ शेर्पा बताउँछन् । गत वर्षको कार्यक्रमको गतिविधि प्रतिवेदनको आधारमा अवाञ्छित गतिविधि गरिन सक्ने देखिएकाले कडाइका साथ रोक लगाइएको प्रजिअ अधिकारीले बताए ।

म्युजिक फेस्टिभलको मुख्य आयोजक शक्तिपिक म्युजिक फेस्टिभलका प्रमुख सुवास केसीलाई प्रहरीले अनुसन्धानका लागि नियन्त्रणमा लिएको छ । केसीलाई धनकुटा प्रहरीले नियन्त्रणमा लिएर आइतबार संखुवासभा पुर्‍याएको प्रहरी स्रोतले जनाएको छ । प्रहरीले उनीविरुद्ध मुद्दा दर्ता गर्ने तयारी गरेको समेत स्रोतले उल्लेख गरेको छ ।