‘कोरोना, कोरोना

रोगभन्दा बढी त्रास फैलियो हेर न

सेनिटाइजर, मास्कको प्रयोग सधैं गर न’

मेलिना राईका साथमा बिनय कार्की, सबिन लामा तथा सशान कँडेलले गाएको यो सन्देशमूलक गीत शनिबार युट्युबमा ‘प्रिमियर’ भयो । सार्वजनिक गीत मंगलबारसम्म झण्डै साँढे २ लाख पटक हेरिसकिएको छ ।  

बिनय केटुको संगीत निर्देशनमा तयार .गीतको भिडियो सशान कँडेलले निर्देशन गरेका छन् । जनकराज अधिकारीले खिचेको भिडियो विकास दाहालले सम्पादनमा तयार भएको हो । भिडियोमा सरोज खनाल, उत्तम केसी, दमन रुपाखेतीलगायत ११ कलाकारको अभिनय छ । 

कोरोना (कोभिड–१९) महामारीको सन्त्रास फैलिरहेको समयमा संगीतमार्फत जनचेतना जगाउने प्रयास योमात्रै एक्लो होइन । स्वास्थ्य तथा जनसंख्या मन्त्रालयले पनि मदनकृष्ण श्रेष्ठ, हरिवंश आचार्यसहित ११ परिचित कलाकारको अभिनय रहेको सन्देशमूलक म्युजिक भिडियो युट्युबमा सार्वजनिक गरेको छ ।

आइतबार सार्वजनिक गीतमा डेभिड शंकर र बेनिशा पौडेलको स्वर छ । जसमा कोरोना भाइरसको संक्रमण हुनबाट जोगिन सचेत रहन अपिल गरिएको छ । सरोज ओलीको शब्द र दीपक शर्माको संगीत रहेको गीतको भिडियो निश्चल पौडेलले खिचेका हुन् भने निर्देशन शंकर धितालले गरेका छन् । 

त्यस्तै, अम्बिका गुरुङले कोरोना महामारीसम्बन्धी जनचेतना जगाउने शैलीका गीत तयार पारेकी छिन् । गुरुङ रचित शब्दलाई संगीतकार दीपक शर्माले संगीतबद्ध गरेका छन् । गायक ध्रुव विश्काले गीत गाएका छन् भने नरेन्द्र वियोगीले संगीत संयोजन गरेका छन् । जसमा गरिव तथा दीन–दुःखीले यो समस्याबाट कसरी पार पाउलान् भन्ने चिन्ता व्यक्त गरिएको छ । 

‘लौ न आयो, के आयो’ शीर्षकको उक्त गीतमा निर्देशक राज खड्क स्वयम्का साथमा सुरज अधिकारीको अभिनय  छ । भिडियो विष्णु खड्काले सम्पादन गरेका छन् भने विजय लामाले छायांकन गरेका छन् । 

यसैगरी, गायक रमेश कुमार महतोले पनि कोरोना भाइरसबारे चेतनामूलक गीत गाएका छन् । ‘कोरोना गीत’ शीर्षक दिइएको गीत महतोले नै रचना गरेका हुन् भने राजेशकुमार श्रेष्ठले संगीतबद्ध गरेका छन् । गीतको भिडियो महतोकै युट्युब च्यानलमा हेर्न सकिन्छ ।

गायक सन्तोषजङ्ग खत्रीले यूट्युबमा ‘दुःख लाग्छ देख्दा’ शीर्षकको म्युजिक भिडियो अपलोड गर्दै जानकारीमा लेखेका छन्– ‘यो गीतमा मैले जस्तो सुनेको छु, त्यस्तै कुराहरु समावेश गरेर गाएको छु । जतिले पनि कोरोना भाइरसका कारण अकालमा ज्यान गुमाउनु पर्याे, उहाँहरुको सम्झनामा यो गीत गाएको छु ।’ खत्रीले प्रमोद गौतमसँग मिलेर रचना गरेको गीत उनैले संगीतबद्ध गरेका हुन् । 

गायक पुरुषोत्तम न्यौपानेले पनि कोरोना भाइरसबारे जानकारी दिँदै सचेत गराउने गीत गाएका छन् । पुरुषोत्तम न्यौपाने, माया गुरुङ, ज्योती लोहनी तथा ईश्वर सिंहको स्वरमा रेकर्ड भएको गीत र संगीत दुवै न्यौपानेकै हो । तारानाथ आचार्यले उक्त गीतको भिडियोलाई निर्देशन गरेका हुन् ।

लोक गायक राजु परियार र गायिका मञ्जु सुनारले पनि कोरोना भाइरसबारे जनचेतना जगाउने गीत गाएका छन् । रोमहर्ष भण्डारीको शब्द तथा संगीतमा रहेको गीतको म्युजिक भिडियो यूट्युब च्यानलमार्फत सार्वजनिक भएको छ ।