साप्ताहिक संवाददाता
सन् २०१७ मा स्वास्थ्य क्षेत्रमा केही महत्वपूर्ण उपलब्धि भएका छन् । मानिसको जीवनलाई
थप सहज बनाउन यस्ता उपलब्धिहरू सहयोगी हुने विश्वास गरिन्छ ।
नयाँ ब्लड प्रेसर गाइडलाइन
कार्डियोलोजीको क्षेत्रमा सन् २०१७ मा तीनवटा महत्वपूर्ण उपलब्धि हासिल भएका छन् । अमेरिकन हार्ट एसोसिएसनले ब्लड प्रेसरका सन्दर्भमा नयाँ गाइडलाइन तयार गरेको छ, जसअनुसार पहिले माथिल्लो सिस्टोलिक १ सय २० तथा तलको डायस्टोलिक ८० लाई सामान्य ब्लड प्रेसर मानिँदै आएकोमा अब ती दुवै १५ वा २० प्वाइन्ट धेरै भए पनि पहिले जस्तो चिन्तित हुनुपर्ने अवस्था छैन । यद्यपि सावधानी अपनाउनु भने आवश्यक छ । पहिले यो लेभल १४०/९० भए औषधिका लागि सिफारिस गरिन्थ्यो भने अब त्यसलाई घटाएर १३०/८५ बाटै औषधि खान सिफारिस गरिने भएको छ । पहिले एलडीएल वा ब्याड कोलेस्ट्रोल शरीरका लागि त्यति हानिकारक मानिँदैनथ्यो, तर अहिले एलडीएल कुनै पनि रूपमा मुटुका लागि हानिकारक प्रमाणित भएको छ ।
नयाँ डाइबिटिज गाइडलाइन
२०१७ मा अमेरिकन डायबिटिज फाउन्डेसनले एउटा गाइडलाइन निर्माण गरेर सीजीएमसी प्याच अर्थात् कन्टिन्युअस ग्लुकोज मोनिटरिङ सिस्टमलाई शरीरका लागि आवश्यक भएको बतायो । यसबाट बिरामीको औषधिमा केही कमी गर्न सकिन्छ । उक्त प्याचमा एउटा सेन्सर हुन्छ र त्यसले दिनरात ग्लुकोजको मात्रा मोनिटर गर्छ । यसको सहयोगले चिकित्सकले बिरामीका लागि आवश्यक डाइट तथा व्यायाम आदिको सल्लाह प्रदान गर्न सक्छन् । उक्त प्याचलाई ७ देखि १५ दिनमा परिवर्तन गर्नुपर्छ ।
इम्युनोथेरापीबाट क्यान्सरको उपचार
क्यान्सरको उपचारका लागि मेडिकल साइन्सले इम्युनोथेरापीको महत्वलाई स्वीकार गरेको छ । हालसम्म केमोथेरापी, रेडिएसन वा सर्जरी नै क्यान्सरको उपचारको विकल्प थियो । अब इम्युनोथेरापी पनि क्यान्सर रोगीका लागि आशाको किरण बनेको छ । बेलायतका वैज्ञानिकहरूले प्रयोगमा ल्याएको यो प्रविधि आगामी दिनमा थप प्रयोगमा आउने र क्यान्सरको उपचारका लागि उपयोगी हुने विश्वास गरिएको छ ।
स्पाइनल सर्जरीमा क्रान्ति
ढाडको हाड अर्थात् स्पाइनलसम्बन्धी समस्या आए यसको उपचार गर्न निकै समस्या हुन्छ भने ढाडको सर्जरी गराउन नै डराउनुपर्ने अवस्था छ । यदि कुनै जटिलता उत्पन्न भए लामो समय आराम गर्नुपर्ने वा प्यारालाइसिससमेत हुन सक्ने सम्भावना हुन्छ । यद्यपि सन् २०१७ मा ओ–आर्म–२ नामक स्पाइनल ग्याजेट तयार पारिएपछि सर्जरीको क्षेत्रमा एउटा नयाँ क्रान्ति आएको छ । ओ–आर्म–२ को सञ्चालन कम्प्युटरबाट हुन्छ । यसको सहयोगले स्पाइनलसम्बन्धी विभिन्न समस्याको समाधान अझ राम्रो तरिकाले भैरहेको छ । यसमा भएको थ्रिडी नेभिगेसन सिस्टमका कारण स्पाइनमा भएका विकारग्रस्त भाग पहिचान गर्न सहज भएको छ ।
श्वास रोगीलाई राहत
दम तथा सीओपीडीजस्ता बिरामीका लागि सन् २०१७ मा पहिलेभन्दा राम्रा इन्हेलर तथा डिभाइस बजारमा आए, जसका कारण रोगमा नियन्त्रण कायम गर्न सकिन्छ । एलर्जिक आस्थमाका बिरामीका लागि एलर्जन इम्युनोथेरापी प्रचलनमा आएको छ । स्लिप एप्नियाका बिरामीका लागि पनि एक प्रकारको डिभाइस उपलब्ध छ । फोक्सोको क्यान्सर पत्ता लगाउन र उपचार गर्न नयाँ प्रविधिको प्रयोग हुन थालेको छ । क्षयरोगीका लागि समेत यो वर्ष बेडाक्युलाइन तथा डेलामेनिड जस्ता एन्टी ट्युबरक्युलर औषधि उपलब्ध हुन थालेका छन् ।
सिंगल टच उपचार गर्ने डिभाइस
अमेरिकाको ओहायो स्टेट युनिभर्सिटीका अनुसन्धानकर्ताहरूले सिंगल टचमै शरीरका विभिन्न भागमा भएका घाउ वा कुनै कोषमा भएका खराबीको उपचार गर्ने डिभाइस विकसित गरेका छन् । टिस्यु नानोट्रान्सफेक्सन (टीएनटी) नामक उक्त डिभाइसको सहयोगले विभिन्न दुर्घटनामा लागेको चोटपटकको समेत उपचार गर्न सकिन्छ ।
छाला प्रत्यारोपण
फ्रेन्च चिकित्सकहरूले एक ३३ वर्षीय व्यक्तिको शरीरमा उनकै जुम्ल्याहा भाईको छाला प्रत्यारोपण गरे । पेरिसको सेन्ट लुइस हस्पिटलमा गरिएको उक्त सर्जरीमा शरीरको ९५ प्रतिशत भन्दा बढी जलेको छालाको सट्टा अर्को छाला प्रत्यारोपण गरिएको थियो । यद्यपि विश्वमा यस प्रकारको सर्जरी पहिले पनि भएको थियो, तर यति ठूलो भागको छाला प्रत्यारोपण भएको थिएन ।
जिन सुधार्ने प्रविधि
वैज्ञानिकहरूले यो वर्ष मानिसको शरीर भित्र जिन सम्पादन गर्ने प्रविधि (सीआरआईएसपीआर) पत्ता लगाएका छन् । शरीरमा भएको ह्युमन प्यापिलोमाभाइरस (एचपीभी) लाई हटाउन एक प्रकारको जेल प्रयोग गरिन्छ । यसबाट शरीरमा अनावश्यक रूपमा ट्युमर बढ्ने समस्यासमेत समाधान हुन्छ ।