दीपराज राणालाई चिनाउने धेरै बलिया आधार बनिसकेका छन् । बलिउडमा लामो समयदेखि सक्रिय उनी अहिले ‘दवगं ३’ को छायाँकनमा ब्यस्त छन् । यसअघि उनले धेरै हिट चलचित्रमा काम गरिसकेको अनुभव छ । अचम्मको कुरा त के छ भने सलमान खानको मुख्य भुमिका रहेको पहिलो चलचित्र ‘मैने प्यार किया’ को अभिनेताका लागि दीपराज समेत टप ५ मा परेका थिए । पछि चलचित्र निर्माण टिमले सलमानलाई रोजेको थियो । त्यसपछि उनी आफ्नो बाटो लागे । बिस्तारै सलमानसँग धेरै चलचित्रमा ठोक्किए । यसपटक भारतको मुम्बई पुगेर कान्तिपुर पब्लिकेशन्सका रामजी ज्ञवालीले उनीसँग लामै गफगाफ गरेका छन् । प्रस्तुत छ, कुराकानीको सम्पादित अंश ।
कस्तो चल्दैछ जिन्दगानी ?
धेरै राम्रो चलिरहेको छ । प्रोजेक्टको कुनै कमी छैन । राम्रा–राम्रा प्रोजेक्टहरु पाइरहेको छु । केहि स्क्रिप्ट पढिरहेको छु ।
अहिले कुन प्रोजेक्टमा ब्यस्त हुनुहुन्छ ?
अहिले ‘दबगं ३’ को सुटिङमा ब्यस्त छु । यो चलचित्रमा म नेगेटिभ भुमिकामा देखिनेछु । त्यसबाहेक केहि सिरियलहरु समेत हातमा छन् ।
बलिउडमा यति धेरै चलेको कलाकारले साना–तिना प्रोजेक्टमा के काम गर्नु भन्ने हुन्न ?
मेरो यो आफ्नै किसिमको परिचय हो । खासमा कलाकार भएपछि जस्तोसुकै काम पनि गर्न सक्नुपर्छ । अर्को कुरा सानो ब्यानर भएपनि राम्रो रकम आउँछ, किन छाड्नु भन्ने सोचअनुसार मैले हरेक किसिमका कामलाई सम्मान गरेर भ्याएसम्म काम गर्दै आएको छु ।
अहिलेसम्म कति चलचित्रमा काम गर्नुभयो होला ?
हातले टिपेर त राखेको छैन । तर, साना देखि ठुला ब्यानरका चलचित्र गरेर १ सयको हाराहारी पुगेका छन् ।
पहिलो पटक कलाकार बन्छु भनेर कहिले सोच्नुभयो, याद छ ?
मैले कक्षा ८ बर्षको हुँदा एउटा एउटा कपीमा खाली स्थान भर्नुपर्ने थियो । त्यहाँ कलाकार लेखेको रहेछु । सायद, त्यहिबेला मैले पहिलोपटक कलाकार बन्छु भनेर सोचेको हुँ ।
पहिलो बलिउड प्रोजेक्ट कुन थियो ?
मैले सुरुमा काम गरेको प्रोजेक्ट ‘उडान’ हो । यो सिरियल निकै हिट थियो ।
कुन चलचित्रबाट बलिउड यात्रा थाल्नुभयो ?
अमिताभ बच्चनसँग ‘मै आजाद हुँ’ मा काम गर्ने अवसर पाएँ ।
पहिलो चलचित्रनै अमिताभसँग काम गर्नुभयो, कस्तो लाग्यो ?
पहिलो कुरा त मैले यो चलचित्र हातमा परेपछि निकै खुसी भएँ । यो चलचित्रमा अमिताभ बच्चन समेत हुनुहुन्छ भन्ने कुरा थाहा पाएपछि खुसीको सीमा रहेन ।
तपाईँ त सलमान खानको मुख्य भुमिका रहेको चलचित्र ‘मैले प्यार किया’ को सर्ट लिस्टमा समेत हुनुहुन्थ्यो रे, किन सेलेक्ट हुनुभएन ?
यसको जवाफ त अहिलेसम्म पाएको छैन । तर, मलाई सलमानले जुन भुमिकामा काम गर्नुभयो त्यो रोलका लागी टप ५ राखेको थाहा पाएँ । अनि, छान्ने बेलामा सलमानलाई बोलाएर राखेको रहेछ, पछि मात्रै थाहा भयो ।
बलिउडमा यो स्थानसम्म आउनुभयो, के बुझ्नुभयो ?
अभिनयको किताव पढेर अभिनेता–अभिनेत्री बन्न सकिन्न । तर, किताबमा के लेखेको छ भन्ने कुरा हरेक कलाकारले जान्नुपर्छ । मैले अहिलेसम्म बुझेको कुरा के हो भने, बलिउडमा हार र जित भैरहन्छ । तर, टिकेर संघर्ष गर्न सक्नुपर्छ । तपाईँले एकपटक हरेक कलाकारको विगत हेर्नुस्, उनीहरुको जीवनमा पनि निकै उताव–चढाव पढ्न सक्नुहुन्छ ।
बलिउडमा दैनिक कति व्यक्ति कलाकार बन्न मुम्बईका गल्ली धाउँछन् होला ?
ठ्याक्कै यत्ति भन्ने कुनै आँकडा त छैन । तर, मेरो बुझाईमा कम्तीमा एक लाख व्यक्तिले कुनै न कुनै भुमिकाका लागी दिनरात मुम्बईका गल्ली चहार्छन् होला ।
बलिउड कसरी छिर्नुभयो ?
स्ट्रगलका कुरा बताइराख्ने कुरा होइन । किनभने, हरेक व्यक्तीले जिवनको कालखण्डमा आफ्ना सपना पुरा गर्नका लागि स्ट्रगल गर्नैपर्छ । मैले सानोँ छँदा कलाकार बन्छु भन्ने कुरा सोचेपछि म मुम्बई आएँ । केहि समय मज्जाले डुलेँ । चलचित्रमा काम गर्न भनेर केहि समय ट्रेनिङ लिएँ । पछि एक थियटरमा ५ बर्ष जति निरन्तर काम गरें । त्यसपछि धेरै कुरा थाहा पाएँ । अनि मात्रै हातमा प्रोजेक्ट हात पर्दै गएको हो ।
बलिउडका कलाकारहरु कामप्रति कत्तिको इमान्दार छन् ?
पहिलो कुरा त के हो भने, बलिउडमा काम पाउन धेरै गाह्रो छ । यस्तो ठुलो प्रतिस्पर्धात्मक उद्योगमा कुनै पनि व्यक्तिले काम पाएपछि निकै इमान्दार भएर काम गर्छ । यति मात्रै कुरा होइन, यहाँ काम गर्ने साना देखि ठुला कलाकारसम्म सबै प्रोफेसनल छन् । किनभने, एउटा सानो दृश्यमा काम गर्दा समेत पैसा पाइन्छ ।
बलिउडमा चम्किन गाह्रो छ ?
मैले ३० बर्षदेखि यो ठाउँमा संघर्ष गरिरहेको छु, चम्किनका लागि । भाग्यले कहिले साथ दिन्छ पत्तो हुँदैन । यहाँ कसैले कसैलाई सुपरस्टार बनाउन सक्दैन ।
जीवनमा कहिल्यै अर्को दोस्रो जागीर गर्नुभयो ?
आजका दिनसम्म मैले अभिनय बाहेक केहि गरेको छैन ।