म्यानमारमा अलपत्र परेका २६ जना नेपाली म्यानमार एयर फोर्सको विमान मार्फत् स्वदेश फर्किएका छन् ।

म्यानमारमा अलपत्र परेका २६ जना नेपालीलाई म्यानमार एयर फोर्सको विमानले काठमाडौंसम्म ल्याइदिएको हो । म्यानमारबाट फर्किएकाहरुलाई बसुन्धरास्थित यती पार्टी प्यालेसमा तयार पारिएको होल्डिङ सेन्टरमा राखिएको छ ।

कोरोना भाइरसको रोकथाम र नियन्त्रणका लागि सरकारले अन्तर्राष्ट्रिय उडानमा समेत प्रतिबन्ध लगाएसँगै म्यानमारमा उनीहरु अलपत्र परेका थिए । म्यानमारबाट फर्किएकामध्ये वाग्मती प्रदेशका १७ जना, गण्डकी र प्रदेश १ का ४–४ जना र प्रदेशका ५ का एक जना रहेका छन् । विमानस्थलमा उनीहरुको स्वास्थ्य जाँच गरेर सेनाले होल्डिङ सेन्टरसम्म गाडीमा ल्याएको थियो ।