जेष्ठ १९, २०७६भारतमा कलाकार तथा खेलाडीहरूप्रति आममानिसको क्रेज लोभलाग्दो छ । सेलिब्रेटी कलाकार तथा खेलाडीहरू राजनीतिमा प्रवेश गरेपछि सफल भएका प्रशस्त उदाहरण पनि छन् । निधन भैसकेकी सुप्रसिद्ध नेतृ तथा पूर्वअभिनेत्री जयराम जयललिता ‘अम्मा’ पाँच पटक तामिलनाडुकी मुख्यमन्त्री भएकी थिइन् । उता केही समयअघि युक्रेनको राष्ट्रपति निर्वाचनमा हास्यकलाकार वोलोदीमीर जेलेन्स्की भारी मतले विजयी भएको समाचार आएपछि भारतीय कलाकारहरू अझ उत्साहित भएका थिए । सन् १९८४ को लोकसभामा सुपरस्टार अमिताभ बच्चनले इलाहावादबाट उत्तर प्रदेशका पुराना नेता हेमावती नन्दन बहुगुणालाई पराजित गरेका थिए, तर बच्चन लामो समय राजनीतिमा टिक्न सकेनन् । चर्चित कलाकार विनोद खन्ना पनि पन्जाबको गुरदासपुरबाट लगातार चार पटक लोकसभामा निर्वाचित भएका थिए । अभिनेता गोविन्द पनि चुनाव लडेर सांसद भएका थिए । सन् २०१४ को लोकसभा निर्वाचनमा करिब ३० जना कलाकार चुनावी प्रतिस्पर्धामा थिए । भारतका हरेकजसो निर्वाचनमा कलाकार तथा खेलाडीहरू विशेष भूमिकामा देखिन्छन् । कुनै दलबाट सांसदको टिकट लिएर भोट माग्ने मात्र होइन, आफू समर्थित दललाई विजयी बनाउन समेत उनीहरू निर्णायक बन्ने गरेका छन् । यसपटकको लोकसभा निर्वाचनमा सेलिब्रेटीहरूले चुनावी माहोल त्यसैगरी तताए साथै कतिपय निर्वाचितसमेत भए ।
हेमा मालिनीलाई दोस्रो सफलता
भारतीय जनता पार्टीबाट उत्तर प्रदेशको मथुराबाट उम्मेदवार भएकी अभिनेत्री हेमा मालिनीले लोकसभा निर्वाचनमा दोस्रो पटक जित हासिल गरिन् । अघिल्लो निर्वाचनमा पनि विजयी हेमा कुनै समय ‘ड्रिम गर्ल’ उपनामले चर्चित थिइन् । यसपटक उनले राष्ट्रिय लोकदल तथा गठबन्धन उम्मेदवार नरेन्द्र सिंहलाई २ लाख ९३ हजार ४७१ मतले पराजित गरेकी हुन ।
राजनीतिमा उदाए सनी देवल
बलिउडका चर्चित अभिनेता सनी देवल पहिलो पटक राजनीतिक मैदानमा उत्रिएका के थिए विजयी माला पहिरिहाले । केही महिनाअघि मात्र भारतीय जनता पार्टीमा प्रवेश गरेका सनी पञ्जावको गुरुदासपुरबाट चुनावी मैदानमा थिए । विपक्षी दल कांग्रेसले पकड जमाएको उक्त क्षेत्रबाट उनले सानदार मत ल्याए । सनीले कांग्रेसका सुनीलकुमार जाखडलाई ७७ हजार १ सय ७ मतले पराजित गरे ।
राहुलसँग स्मृति इरानीको बदला
दर्जनौं टेलिसिरियलमा अभिनय गरेकी स्मृति इरानीले कांग्रेस अध्यक्ष राहुल गान्धीलाई अमोठी निर्वाचन क्षेत्रमा पराजित गरिन् । स्मृति सन् २०१४ को चुनावमा राहुलसँग १ लाख मतले पराजित भएकी थिइन् । राहुल गान्धी परिवारको वर्चस्व रहेको उत्तर प्रदेशको अमोठीबाट सन् २००४ देखि नै चुनाव लड्दै आएका थिए । मन्त्रीसमेत भैसकेकी स्मृतिले राहुललाई ५५ हजार १ सय २० मत अन्तरले हराएकी हुन । ‘सास भी कभी बहू थी’ टिभी सिरियलमार्फत पहिचान बनाएकी इरानी भाजपामा राम्रो वाक्कला भएकी नेतृका रूपमा चर्चित छिन् ।
भोजपुरी कलाकारले बाजी मारे
भारतमा भोजपुरी कलाकारहरूको पनि राम्रो प्रभाव छ । भोजपुरी अभिनेता रवि किशनले उत्तर प्रदेशको गोरखपुर क्षेत्रबाट निर्वाचन जितेका छन् । भारतीय जनता पार्टीका उम्मेदवार रवि ३ लाख १ हजार ६ सय ६४ मतान्तरले विजयी भएका हुन् । अर्का भोजपुरी अभिनेता तथा गायक मनोज तिवारीले कांग्रेसकी दिग्गज नेतृ शिला दीक्षितलाई पछारे । नर्थ इस्ट दिल्लीबाट भारतीय जनता पार्टीका उम्मेदवार तिवारीले दीक्षितलाई साढे ३ लाखभन्दा बढी मतले पराजित गरे ।
गायक हंसराज बने सांसद
सूफी गायक हंसराज हंसले पनि भाजपाका तर्फबाट दिल्लीको उत्तर पश्चमी क्षेत्रबाट निर्वाचन जिते । यसअघि भाजपाबाट सांसद भैसकेका उदित राजलाई पराजित गर्दै हंसराजले उक्त सफलता हासिल गरेका हुन् । यसपटक भाजपाबाट टिकट नपाएपछि उदित कांग्रेसमा प्रवेश गरेका थिए ।
किरण खेरको पकड कायमै
भाजपाका तर्फबाट चण्डीगढ क्षेत्रमा उम्मेदवार भएकी चलचित्र अभिनेत्री किरण खेरले पनि विजयी माला पहिरिन् । कांग्रेसका वरिष्ठ नेता पवनकुमार वंशललाई ४६ हजार ९ सय ७० मतले पराजित गर्दै खेरले आफ्नो पकड कायम राखिन् । उनी यसअघि पनि सोही क्षेत्रबाट निर्वाचित भएकी थिइन् ।
निर्दलीय उम्मेदवारको राज
आसनसोल निर्वाचन क्षेत्रमा बलिउडका हस्ती बाबुल सुप्रियोसँग बंगाली अभिनेत्री मुनमुन सेन पराजित भइन् । त्रिणमुल कांग्रेसबाट उम्मेदवार भएकी मुनमुन भारतीय जनता पार्टीका सुप्रियोसँग करिब २ लाख मतले पराजित भएकी हुन् । उता निर्दलीय उम्मेदवार अभिनेत्री सुमनलताले कर्नाटकका मुख्यमन्त्री एचडी कुमारास्वामीका छोरा निखिललाई पराजित गरिन् ।
मिमी चक्रवर्तीको पहिलो यात्रा
‘गानेर ओपारे’ सिरियलबाट अभियन यात्रा सुरु गरेकी अभिनेक्री मिमी चत्रवर्तीको पनि राजनीतिक यात्रा सुरु भएको छ । तृणमुल कांग्रेसका तर्फबाट जादवपुरमा उम्मेदवारी दिएकी मिमीले भाजपाका अनुपम हजारालाई २ लाख ९५ हजार २ सय ३९ मत अन्तरले पराजित गरेर लोकसभाको यात्रा तय गरिन । मिस इन्डियामा समेत भाग लिएकी मिमीको चुनावी सभामा मानिसहरूको अत्याधिक भीड लाग्थ्यो । उनले ‘भिलेन’ ‘धनन्जय’, ‘मोन जाने ना’ जस्ता चर्चित चलचित्रमा काम गरेकी छिन् ।
गौतम गम्भिरले जिते, भाइचुङ हारे
चर्चित क्रिकेटर गौतम गम्भीर पनि भारतको सांसद भएका छन् । गौतम भारतीय जनता पार्टीको उम्मेदवारका रूपमा पूर्वी दिल्लीबाट निर्वाचित भएका हुन । क्रिकेटको माध्यमबाट देशको नाम चम्काएका गौतमले आइएनसीका अरभिन्द सिंह लभ्लीलाई ठुलो मतअन्तरले पराजित गरे । सन् २००३ मा बंगलादेशविरुद्धको खेलबाट भारतीय राष्ट्रिय टिममा डेब्यु गरेका गौतम २०१८ देखि खेलबाट टाढा भएका थिए । उता भारतीय फुटबल टिमका पूर्व कप्तान भाइचुङ भुटियाको पार्टीले लोकसभा चुनावमा पराजय बेहोरेका छ । भुटिया आबद्ध ‘हाम्रो सिक्किम पार्टी’ सिक्किम क्रान्तिकारी परिषद्सँग पराजित भएको हो । भुटिया यसअघि तृणमूल कांग्रेसबाट दार्जीलिङमा उम्मेदवार हुँदा पनि पराजित भएका थिए ।
नुसरत जहाँ
बंगाली चलचित्रकी सर्वाधिक सुन्दर अभिनेत्री नुसरत जहाँ पनि यो पटकको आम निर्वाचनमा निर्वाचित भएकी छिन् । नुसरतले पश्चिम बंगालको क्षेत्रीय पार्टी तृणमुल पार्टीबाट चुनाव जितेकी हुन् । २९ वर्षीया नुसरत जहाँले बसिरहाट निर्वाचन क्षेत्रबाट भारतीय जनता पार्टीका उम्मेदवारलाई पराजित गरेकी थिइन् ।
जो निराश भए
राजनीतिमा राम्रो पकड जमाइसकेका साथै जनतामा लोकप्रिय कतिपय कलाकार यस पटकको लोकसभा निर्वाचनबाट निराश भएका छन् । बलिउड अभिनेता राज बब्बर, नायिका उर्मिला मातोंडकर, अभिनेत्री जया प्रदा, बंगाली अभिनेत्री मुनमुन सेन, भोजपुरी फिल्म स्टार दिनेशलाल यादव, अभिनेता सत्रुघन सिन्हा, अभिनेता प्रकाश राज आदि कलाकार यो सूचीमा छन् ।
(एजेन्सीको सहयोगमा)
प्रतिक्रिया
हाम्रो छनोट
