अभिनेता सुशान्तसिंह राजपुतको आत्महत्यापछि बलिउडमा व्याप्त नातावाद (नेपोटिज्म)को विषय पुनःबहसमा आएको छ । सुशान्त डिप्रेसनमा जानुमा बलिउडको नातावाद खास दोषी रहेको भनेर टिप्पणी सुरु भएको छ ।

अभिनेत्री कंगना रनावतले बलिउडमा पाखण्ड र नातावाद मौलाएको भन्दै सुशान्तको आत्महत्यामा समेत बलिउड उद्योग नै दोषी रहेको इंगित गरेकी छिन् ।

‘तपाईंले उसका पछिल्ला पोस्टहरू हेर्नुस्, बलिउडमा आफ्नो कोही गडफादर नभएकाले दर्शकलाई स्पष्टसँग आफ्नो फिल्म हेर्न अनुरोध गरेका छन् । फिल्म नचले आफू उद्योगबाट बाहिर फालिने चिन्तासमेत उसले व्यक्त गरेको छ । उसले थुप्रै अन्तर्वार्तामा बलिउड उद्योगले आफूलाई आफ्नो ठानेको छैन भनेर भनेका थिए । ?,’ कंगनाले सोसल मिडियामा भिडियोमार्फत भनेकी छिन् ।

बलिउडमा सुशान्तको आत्महत्यापछि नातावादको विषयलाई लिएर बहस बढिरहँदा नेपाली कलाकारहरूले समेत यस विषयमा बोल्न थालेका छन् ।

अभिनेत्री नम्रता सापकोटले सोमबार राति ८ बजेतिर फेसबुक लाइभ आउँदै नेपाली फिल्ममा नातावाद–कृपावाद बढेको भन्दै आक्रोश व्यक्त गरिन् । ‘सरी बट रियल्ली आइ एम नट सरी’ भन्दै आफ्नो भिडियो वक्तव्य सुरु गरेकी उनले नेपाली फिल्म क्षेत्रमा आफ्नै छोरा–छोरी, भाइभतिजालाई फिल्म खेलाउने र वाहियात पारिश्रमिकको हल्ला फैलाउने ट्रेन्ड बढेको बताइन् ।

‘यहाँ कलाकारितालाई भन्दा पनि आफ्नोलाई धेरै सहयोग हुन्छ’, उनले भिडियोमा भनेकी छिन्, ‘यहाँ कलाकार चाहियो भनेर फिल्म घोषणा गरिन्छ । अन्त्यमा उहाँकै छोरा भतिजा, भाइ बहिनी हुन्छ । यहाँ धेरै पारिश्रमिक लियो भनेर छ्यापछ्याप समाचार आउँछ । जुन चिज सुन्दा पनि हामीलाई अचम्म आग्छ । जुन फिल्म आफ्नै बाबा–आमाले बनाएको हुन्छ, त्यसैमा छोराले टन्नै पैसा लियो भनेर बजारमा वाहियात हल्ला फैलाउँछौं । यहाँ आफूले फिल्म बनाउँछन्, आफैँ खेल्छन् ।’

उनले अभिनयमा जिरो तर इन्डस्ट्रीमा राम्रो पकड भएका मान्छेलाई यहाँ बढी महत्व दिने गरिएकोसमेत बताएकी छिन् । ‘संघर्ष गरेर आएको मान्छेलाई त यहाँ गन्दै गनिँदैन । अनि कलाकारहरु डिप्रेसनमा नगएर केमा जान्छन् त, तपाईं आफैँ सोच्नुस् न,’ उनले आक्रोश पोखेकी छिन् ।

सुशान्तको मृत्युपछि मानसिक स्वास्थ्यको विषयलाई लिएर सोसल मिडियामा अहिले सहानुभुति देखाइरहेका ढोँगी (फेक पिपुल) मान्छेहरूप्रति समर्पित भन्दै नम्रताले यो आक्रोश पोखेकी थिइन् ।

त्यस्तै यसअघि पनि नातावादको विषय उठाएकी अभिनेत्री वर्षा शिवाकोटीले मंगलबार बिहानै फेसबुकमा स्टाटस लेख्दै पुनः यो विषयमा बोलेकी छिन् । फिल्म क्षेत्रमा व्याप्त खराब प्रवृत्तिका कारण आफू डिप्रेसनमा गएकोसम्म उनले खुलाएकी छिन् ।

‘नेपोटिज्म सबैतिर हुन्छ, फिल्म इन्डष्ट्रीमा मात्रै होइन्’, उनले लेखेकी छिन्, ‘फरक यत्ति हो कि फिल्म इन्डस्ट्री छर्लङ्ग छ तर सत्य बोल्ने आँट कमैको छ । किनकि यस्ता अभिव्यक्तिले भोलिका दिनमा करिअरमा असर पार्न सक्छ, कामको अभाव हुन सक्छ ।’

अघिल्लो वर्ष आफूले यो विषय उठाउँदा आफ्नो समर्थनमा कोही नबोलेको भन्दै वर्षाले गुनासो पोखेकी छिन् । ‘हालै बलिउडको घटनाले यहाँ पनि चासो बढेको देखेँ,’ उनले भनेकी छिन्, ‘केहीले आवाज उठाउनुुभयो जुन कुुरामा म सहमत छु । तर, यो विषयमा मात्रै फिल्म क्षेत्र रुमल्लिएको छैन । ग्रुपिज्म, लभ अफेयर्स, तुलना, पत्रकार/युट्युबर र कलाकारबीचको अनावश्यक निकटता आदिको बिगबिगीले पनि नकरात्मक असर पारेको छ । म स्वयं यसको पीडित हुँ । मैले जति नै राम्रो काम गरे पनि प्रश्न उठाइन्छ । यी कुराले कति ठाउँमा मलाई मानसिक पीडा भएको मेरो नजिकका केहीबाहेक कसैलाई थाहै छैन । केही समयअघि म पनि डिप्रेस्ड थिएँ । ’

अघिल्लो वर्ष वर्षाले नेपोटिज्मविरुद्ध बोल्दा धेरैले उनलाई अब उनको करिअर सकिने भन्दै टिप्पणी गरेका थिए । ‘तर, यो लकडाउन नभइदिए भए मेरा कति फिल्म मैले समय दिन नसकेर छाड्नुपर्ने अवस्था थियो’, वर्षाको प्रश्न छ, ‘नेपोटिज्मले कहिलेसम्म धान्ला र ?’