बलिउडका महानायक अमिताभ बच्चन पाँच दशकभन्दा धेरै समय निरन्तर चलचित्र उद्योगमा बिताए । दर्जनौं हिट चलचित्र दिए । भारतको चलचित्र उद्योगलाई यो स्थानसम्म ल्याउन उनको सर्वाधिक ठुलो योगदान रहेको बताइन्छ ।

उनै महानायक बच्चनले अभिनयबाट सन्यास लिनेबारे सोच्न थालेको चर्चा चलेको छ । त्यसो त २ बर्षअघि पनि यो चर्चा चलेको थियो । चलचित्र क्षेत्रबाट बिदा हुन खोजेको समाचार भाइरल हुन थालेपछि अमिताभले दुइबर्षका लागी पुनः चलचित्रमा साइन गरेर जवाफ फर्काएका थिए ।

तथापी, अहिले उनी आफै चलचित्र क्षेत्रबाट विश्राम लिन खोजेको संकेत गरेका हुन् । एउटा ब्लगमा उनले सन्यास लिनेबारे सोच्न थालेको उल्लेख गरेका छन् । यो ब्लगसँगै बलिउडका महानायक अमिताभ अब छिट्टै चलचित्र क्षेत्रबाट बाहिरिने अनुमान गर्न थालिएको छ ।

स्वर्गीय पिता हरिवंशराय बच्चनको ११२ औ जन्मजयन्तीको अवसरमा २८ नभेम्बर राति साढे १२ बजेतिर उनले उक्त ब्लग सार्वजनिक गरेका हुन् ।

हाल चलचित्र ‘ब्रह्मास्त्र’को सुटिङमा व्यस्त अमिताभले उक्त ब्लगमा लेखेका छन्, ‘यस सानो सुन्दर ठाउँमा कारबाट यहाँ पुग्न मलाई १२ घण्टा लाग्यो । यहाँ सडक पनि राम्रो छैन । कोठा र वातावरण पनि फरक छन् । मैले अब रिटायर गर्नुपर्नेछ । मेरो दिमाग कतै आयो र औंलाहरूले केही गर्दैछ ।’ ब्लगमा उनले आफ्नो यात्रामा साथ र सहयोग गर्ने सम्पुर्णलाई धन्यवाद दिएका छन् ।

चलचित्र ‘सात हिन्दुस्थानी’ बाट ५० बर्षअघि अभिनय यात्रा थालेका अमिताभलाई एउटा रेडियोले आवाज नराम्रो रहेको भन्दै रेडियोमा काम गर्न दिएको थिएन । उनले भारतीय मिडियाहरुसँग केहिपटक आफ्ना मनका बह पोख्दा धेरैलाई पत्याउन समेत गाह्रो पर्छ कि, अमिताभले यस्तो जिन्दगी पनि बाँचेका थिए ।

रूमी जाफ्रे निर्देशित मनोवैज्ञानिक थ्रिलर चलचित्र ‘फेस’ मा समेत चाँडै देखिन लागेका अमिताभलाई यो उमेरमा पनि चलचित्रको प्रस्ताव धेरै आउने गरेको छ । तर, उनले चित्त बुझेका चलचित्रमा मात्रै काम गर्ने गरेका छन् ।

अमिताभ निकट केहि व्यक्तिहरुका अनुसार उनले पछिल्लो केहि बर्षयता निकै धेरै चलचित्रको प्रस्ताव सहजै स्विकारेर काम गरेका थिए । मनमा बुढ्यौलीको आभाष हुन नदिन यसरी धमाधम काम गरेको उनीहरुको भनाई छ ।

केहि महिनाअघि अमिताभले आफ्नो ७५ प्रतिशत भन्दा धेरै फोक्सोले काम गर्न छाडेको बताएका थिए । अमिताभले अहिले मात्रै होइन, पटक पटक विभिन्न स्ट्याटस र ब्लगमा अभिव्यक्ति सार्वजनिक गर्दै फ्यानहरुलाई आफु जतिबेला पनि यो उद्योग छोडेर घर जान सक्ने संकेत दिइरहेका छन् ।