२०१२ देखि रक गायनमा लागेकी सुजिना श्रेष्ठ आफैं गीत लेख्नुका साथै कम्पोजसमेत गर्छिन् । उनले पहिलो पटक रक शैलीमा बाउको सम्पत्ति गाएकी थिइन् । स्टेज शोमा धेरैबाट रुचाइएकी सुजिनाले अस्ट्रेलियामा समेत प्रस्तुति दिइसकेकी छिन् भने अहिले उनी यूकेको कार्यक्रमका लागि तयारी गर्दैछिन् । 

रक गायनबाट सुरुवात गरेर कभर गीततिर मोडिनुभएछ नि ?

रक गायन नै मेरो शैली हो, तर विगत तीन वर्षदेखि आरर्बिटेरी च्यानलसँग अनुबन्धित भएकाले केही कभर गीत पनि गाएँ, साथसाथै आफ्नै गीत पनि गाइरहेकी छु । 

अहिले रक गायनको माहौल कस्तो छ ?

अहिले रकको मात्र होइन पप, आधुनिक, सुफी, क्लासिकल कसैको पनि समय राम्रो देख्दिनँ । यद्यपि घुम्दै–फिर्दै फेरि हाम्रो समय आउँछ भन्ने आशा छ ।

कसरी रकतिर आकर्षित हुनुभयो ?

हुन त मेरो परिवार सुफीको फ्यान हो, म पनि खुबै सुन्थें, तर स्कुलमा साथीहरूले रक गीत सुनाउँदा सार्‍है खतरा लाग्थ्यो । त्यही क्रममा म नजादिंदो तरिकाले रकतर्फ आकर्षित भएँ । हुन त सुफी सुन्न मन लाग्छ तर मेरो स्वर अलि मोटो भएकाले पनि होला रक शैली नै चुनें ।

आफैं गीत लेख्ने, संगीत भर्ने अनि गाउने काम गर्नुहुन्छ ? किन अरूको गीत नगाएको ?

सुरुदेखि नै म आफैं गीत लेख्थें, त्यसमा संगीत दिएर गाउने बानी भयो । यसरी आफैं गर्दा आफूले सोचे वा खोजेजस्तो सिर्जना आइरहेको छ । यद्यपि अरूको गीत–संगीतमा पनि गाउनु पर्छ भन्ने पनि लागिरहेको छ ।

तपाईं बढी कस्ता गीत गाउनुहुन्छ ?

अल्ट्नेटिभ रक बढी गाउँछु । म बढी सेन्टिमेन्टल टचका गीत कम्पोज गर्छु । मेरा गीतहरू विकृति तथा समस्याहरूलाई उजागार गर्ने खालका छन् । जस्तै बाउको सम्पत्ति, को हुँ म, हराएको मान्छे जस्ता गीत समाजका समस्या उजागार गर्न तयार पारिएको हो ।

तपाईंका गीतमा मानसिक समस्यालाई बढी प्राथमिकता दिएको पाइन्छ । त्यसको कुनै कारण छ कि ? 

अहिले धेरैमा मानसिक समस्या, डिप्रेसन आदि देख्छु । म आफैं पनि साइकोलोजीकी छात्रा हुँ । अहिलेको शताब्दीको सबैभन्दा ठूलो समस्या नै मानसिक समस्या हो, यसमा सबैलाई काउन्सिलिङ जरुरी छ । त्यही भएर मेरा केही गीत मानसिक समस्यासँग जोडिएका छन् ।

सोसल मिडियालाई कति समय दिनुहुन्छ ?

सोसल मिडियामा पटक्कै मन जाँदैन । समय अनुसार अपडेटका लागि मात्र चलाउँछु । यस्तो लाग्न थालेको छ, यदि यी सोसल मिडिया नहुने हो भने कति राम्रा–राम्रा सिर्जना होलान् ? हामीले यसमा समय मात्र बर्बाद गरिरहेका छौं । यसमा अरूलाई देखाउनु मात्र छ आफ्ना लागि कुनै उपलब्धिमूलक कुरा देख्दिनँ ।

मनपर्ने गायक–गायिका ?

राहत फतेह अलि खा, कैलाश खेर, इक्युवस, थ्रीडेज ग्रेस, अबल्राटस तथा आस्था 

तामाङ मास्के ।

तपाईंका प्रशंसकहरू बढी कुन उमेरका छन् ?

१४ देखि २७ वर्ष सम्मका बढी छन् ।

भविष्यका योजना ?

मायाप्रेमका गीत तयार गर्नेछु । मेरो युट्युब च्यानलवाट आएको रोयल्टीबाट सडकमा अलपत्र कुकुरहरूका लागि काम गर्छु भने साइकोलोजीमा पीएचडी गर्ने सपना पनि छ ।

यति राम्री हुनुहुन्छ, तपाईंको सुन्दरताको रहस्य के होला ?

म आफ्नो स्किनलाई एकदमै माया गर्छु । म नेपालकै ह्यान्डमेड प्रोडक्ट मात्र प्रयोग गर्छु । कुनै पनि केमिकल स्किनमा पर्न दिएकी छैन । घरको भान्सामा पाइने सामग्रीहरूबाटै स्किनको ट्रिटमेन्ट गर्छु ।