‘शुभ लभ’बाट नेपाली चलचित्रमा प्रवेश गरेका ज्योतिष हरिहर अधिकारी पछिल्लो समय खासै मिडियामा देखिएका छैनन् । कहिलेकाहीं फ्याट्टफुट्ट सार्वजनिक कार्यक्रममा देखिएपनि उनी सुटक्क पस्ने र सुटुक्क निस्कने गरेको देखिएको छ ।

हालै अन्तर्राष्ट्रिय ज्योतिष महासंघको चुनावका लागी भारत पुगेका अधिकारी त्यसपछि खुसुक्क नेपाल फर्किएका छन् । उनी अन्तर्राष्ट्रिय युवा ज्योतिष संघको अध्यक्षमा निर्विरोध निर्वाचित समेत भएका छन् ।

पहिलो चलचित्र ‘शुभ लभ’को असफलतापछि धेरैजसो आफ्नै पेशामा व्यस्त उनी गुपचुप रुपमा नयाँ चलचित्रको काममा व्यस्त भएको बुझिएको छ । उनी निकट स्रोतका अनुसार अधिकारी लगायत केही व्यक्तिले नयाँ चलचित्र ल्याउन दिन रात मिहनेत गरिरहेका छन् । हालै स्क्रिप्टको काम सकाएपछि उनीहरु क्यारेक्टर फाइनल गर्न लागेको जनाइएको छ ।

बुझिएअनुसार यो चलचित्रको मुख्य भुमिकामा हरिहर अधिकारी फाइनल भएका छन् । अन्य पात्रको खोजी भैरहेको छ । यो चलचित्र के–कस्तो विषयमा निर्माण हुने भन्ने विषयमा आधिकारिक जानकारी भने प्राप्त भएको छैन । यद्यपी चैतको अन्तिम सम्म छायांकन थाल्ने निर्माण टिमको योजना छ ।

केहि समयअघि नेपाली ‘कविर सिंह’मा अधिकारी फाइनल भएको समाचार आएको थियो । यो विषयमा उनले समेत स्वीकार गरेका थिए । तर, उक्त चलचित्रका निर्देशकसँगै अधिकारी समेत निस्किएका थिए ।

अधिकारी नयाँ चलचित्रमा आवद्ध भएको विषयमा भने निर्माण पक्षले अहिले केही बोलेको छैन । न त हरिहर अधिकारीले बोलेका छन् । स्रोतका अनुसार यो टिमले छिट्टै पत्रकार सम्मेलनको आयोजना गरेर चलचित्रको घोषणा गर्ने तयारी गरेको छ ।