चलचित्र क्षेत्रमा प्रवेशसँगै प्रियंका कार्की नेपाली चलचित्र उद्योगमा निकै व्यस्त भइन् । प्रियंकाको आगमनपछि चलचित्र उद्योगका धेरै अभिनेत्रीलाई टाउको दुखाई समेत बनेको थियो ।

त्यसो त पछिल्ला बर्ष उनी अभिनित अधिकांश चलचित्र फ्लप भएका थिए । तर, चलचित्रको अफर भने कम भएको थिएन । एक अनौपचारिक गफमा प्रियंकाले आम्दानीका लागि भएपनि धमाधम काम गरिरहेको बताएकी थिइन् । 

एक पछि अर्को चलचित्रमा समय दिइरहेकी उनले पछिल्ला केही महिनायता भने कुनै प्रोजेक्ट साइन गरेकी छैनन् । न त उनले म्युजिक भिडियोमै समय दिएकी छिन् ।

किन ? हालै एक कार्यक्रममा प्रियंकाले यसको रहस्य खोलेकी छिन् । प्रियंकाले विवाहका लागि पूरै समय दिन नयाँ प्रोजेक्टमा आवद्ध नभएको बताइन् । ‘विवाह अगाडिसम्म म कुनै प्रोजेक्टमा आवद्ध हुन्नँ’, उनले भनिन्, ‘अहिले धेरै चलचित्रको अफर आइरहेको छ, तर रिजेक्ट गरिरहेकी छु ।’

लामो समयदेखि आयुष्मान देशराज जोशीसँगको प्रेममा रहेकी प्रियंकाले यही फागुन १५ मा विहे गर्ने बुझिएको छ ।