कमेडी अध्ययन गर्ने । चेस खेल्ने । सन्देशमूलक भिडियो बनाउने । गफ लडाउने । दाल, भात लडाउने । कौसीमा जाने । कम्पाउन्डभित्र भ्रमण गर्ने । मेरो लकडाउन त यस्तै छ । 

केदार घिमिरे ‘माग्ने बुढा’, हास्य अभिनेता

किताब पढिरहेकी छु, आफं खाना पकाइरहेकी छु, नियमित ‘वर्कआउट’ गरिरहेकी छु, अनि टिकटक बनाइरहेकी छु । 

सुरविना कार्की, अभिनेत्री 

लकडाउनको नियमलाई पूर्ण पालना गर्दै सामाजिक सञ्जालमा भुलिरहेको छु । यही लकडाउनमा ट्विटर अकाउन्ट खोलेको छु, एक्टिभ त हुनै पर्‍यो । 

बद्री पंगेनी, गायक

अरू बेला परिवारलाई समय दिन पाउँदिन थिएँ, अहिले प्रशस्तै समय पाइएको छ, त्यसको सदुपयोग गरिरहेको छु । घरको काम, कुकिङ, सरसफाइ सबै गरिरहेको छु । म्युजिकमा रियाज त छँदैछ । 

एन्जिला रेग्मी, गायिका

लकडाउन भनेको कोरना माहामारी छिर्न नदिने एउटा मात्र उपाय हो । त्यो उपायलाई पूर्ण साथ दिँदै घर परिवारलाई पूरा टाइम दिँदै घरमै बसेर गर्नुपर्ने अधुरा कामहरू पूरा गर्दैछु । प्रेम गीत–३ को लाइनअप पटक–पटक हेरेर त्यसलाई पोस्टप्रोडक्सनका बेलामा के–के सुधार गर्न सकिन्छ, त्यो मार्क गर्दै । 

सन्तोष सेन, फिल्म निर्माता

गाउँ जितपुर आएको छु । यतै परिवारसँग दिन कटाइरहेकी छु । अति विपन्न लोपन्मुख उराव समुदायका १९ घर परिवारलाई अस्ति खाद्यन्न राहत लिएर गइयो । यसबाहेक फुर्सदको समयमा सिनेमा हेर्ने, पुस्तक पढ्ने त छँदैछ ।

कामेश्वर चौरसिया, अभिनेता

लकडाउनको पूर्णरूपमा पालना गर्दै घरमा परिवारसँग सेल्फ क्वारेन्टाइन्मा बसिरहेकी छु । घर वरपर रहेका असहाय र सडक बालबालिकालाई आफूले सक्ने सहयोग पनि गरिरहेको छु । टिभीमा कस्तो समाचार आइरहेको छ, अनलाइनले के लेखिरहेको छ, नियमित अपडेट हुन्छ । संगीतलाई त समय दिने भइहालियो । 

सरु गौतम, गायिका

म यता दार्जिलिङतिरै छु । नयाँ फिल्मका लागि कथा लेखिरहेको छु । स्थिति खराब छ, घरमै छु, सुरक्षित त हुनैपर्‍यो । 

तुलसी घिमिरे, फिल्म निर्देशक

प्रदेश २, प्रदेश १ मा ज्यालादारी मजुरी गरिने श्रमिक वर्गलाई म आबद्ध संस्था भोरमार्फत राहत वितरण गरिरहेको छु । आफ्नो व्यक्तिगत स्तरबाट २ लाख रुपैयाँ योगदान गरी १ सय परिवारलाई राहत प्याकेज प्रदान गरिरहेको छु । सँगसँगै नयाँ मैथिली र नेपाली सिनेमाका लागि कथा र स्क्रिप्ट लेख्दैछु । 

राजकुमार महतो, फिल्म निर्माता 

क्लबहरू ठप्प भएर व्यापार चौपट छ । कहिले खोल्न पाइने हो थाहा छैन । भर्खरै घरमा छोरी जन्मिएकी छे । छोरीसँग खेल्दा र रमाउँदा समय गएको पत्तै हुँदैन । यसबाहेक समय कटाउन टिभी, युट्युब, फेसबुक र किताब त छँदैछ । 

आयुष ठकुरी, नाइट क्लब व्यवसायी

अहिलेको समय घरभित्रै बसेर लकडाउनको पालना गर्दै घरमै बसेको छु । नयाँ–नयाँ गीतको कम्पोज गरिरहेको छु । पहिलेभन्दा बढी व्यायाम गरिरहेको छु । दिमागमा नकारात्मक कुरा नखेलुन, रोग प्रतिरोधात्मक क्षमता बढोस् भनेर बढीभन्दा बढी मनोरञ्जनात्मक कार्यक्रम र ऐतिहासिक फिल्म हेरिरहेको छु । 

युवराज चौलागाईं, गायक

लकडाउनको समयमा शारीरिक र मानसिक दुवै रूपमा स्वस्थ रहिरहन म र मेरो परिवार सकारात्मक सोच र स्वस्थ्य व्यवहारमा केन्द्रित हुने कोसिस गरिरहेका छौं । शरीरलाई फुर्तिलो र स्वस्थ राख्न हरेक दिनको सुरुवात योगबाट गरिरहेको छु । खानपानपछि दिउँसोको समयमा स्नातकोत्तर परीक्षाको तयारी गर्नेदेखि फिल्म र अन्य पुस्तकहरूमा दिन बितेको पत्तै हुन्न । हेर्न नभ्याइएका फिल्म र पढ्न नपाएका पुस्तक पनि पढिरहेको छु । 

सिर्जना राईं, विद्यार्थी

घरमा सिर्जनात्मक लेख लेख्दै फेसबुकमा लाइभ आउँछु, अनि अलिकति चेतनामूलक कुरा गर्छु । टिभी र सामाजिक सञ्जाल हेर्दै, परिवारसँग मीठो मसिनो खाँदै संसारबाट छिट्टै यो कोरोना भन्ने भाइरस गायब होस् भन्ने कामना गर्छु । कहिले सोफामा, कहिले भुइँमा कहिले पलङमा लडेर यो लकडाउनको लक कहिले अनलक हुन्छ भन्ने पर्खाइमा दिन बितिरहेको छ ।

सुजित थापा, हास्यकलाकार

म स्वास्थ्य पत्रकार भएको कारण निरन्तर रिपोर्टिङ मै छु । कार्यालय लकडाउन छ । भित्र हुने भित्रै बस्ने र हामी रिपोर्टरले बाहिर बाहिरै रिपोर्टिङ गरेर समाचार पठाउने भन्ने अवधारणाअनुसार विभिन्न अस्पतालमा र भक्तपुर ललितपुर काठमाडांैमा रिपोर्टिङमा हिँडिरहेको छु । सबै पसलहरू बन्द भएको कारण बाहिर फिल्डमा खटिने प्रहरी, पत्रकारलाई खाजापानीमा समस्या छ । 

रिया भण्डारी, सञ्चारकर्मी

गाह्रो छ दिन कटाउन । दिउँसो निन्द्रा लाग्न छोडिसक्यो । सुरुको चार दिन त लागेको थियो । टिभी हेर्दाहेर्दा आँखा दुख्छ, कति हेर्नु ? मोबाइल कति चलाउनु, त्यही कोरोनाको मात्र न्युज आउँछ भनेर डर लाग्छ । त्यसैले दिउँसो बढीजसो संगीतमै समय दिइरहेको छु । 

कुलेन्द्र विश्वकर्मा, गायक

लकडाउनले गर्दा आज–भोलि आफ्नो लागि समय पाएकी छु । बिहान उठेर नियमित योगा गर्न पाएको छु, गीत अभ्यासका लागि पर्याप्त समय पाएको छु । अल्छी लाग्दा कहिले नेटफ्लिक्सबाट फिल्महरू हेरेर त कहिले मिठोमिठो खाने कुराहरू बनाउँदै दिन जान्छ । 

अनिता चलाउने, गायिका

लकडाउनमा म केही गरिरहेको छैन तर समय बितिरहेको छ । बच्चासँग खेल्यो, टिभी हेर्‍यो, मोबाइल चलायो, किताब पढ्यो बस्यो । 

अर्जुन घिमिरे, हास्यकलाकार