तुसारो ओढेर

पहाडको ओत लागेर सुतेका छन्

फूलहरु ....

भुकम्पले घर ढलाएपछि

मनमायाको शरिरभरि टाँसिएको छ 

तुसारो 

जूनले झारेको आँसुहरुलाई

चीसो सिरेटो बनाएर हावाले

सेकिरहेको छ, उनलाई 

सरकारले दयामा बनाइदिएको 

घर आफैं कठ्याङ्रीएको छ

चुल्हो तात्न नसकेको थुप्रै दिन भयो

बच्चाहरु -

जहाज आउला 

र भोक मेटौला प्रतिक्षामा छन्

आजकाल -

हरेक दिन बाह्र गतेको भन्दा 

ठुला भुकम्पीय झट्का गएका छन्

मनमायाको मनमा 

उनले गुमाईन बुढा बाबु र आमा

सिंदुर त उनले बाह्र गते नै गुमाएकी थिईन

मनमाया त जसो तसो बाँचेकी छिन्

सरकार कुनै दिन 

यिनै जसोतसो बाँचेकाको सराप लाग्यो भने 

तिमीले सोच्न सक्दैनौं

तिम्रो जिन्दगीमा कस्ता भुकम्प जान्छन !