नेपाली चलचित्र लगातार  फ्लप हुनुको कारण के होला ? 

- प्रस्तुति: महेश तिमल्सिना

माघ ७, २०७५

चलचित्रको व्यापार भनेको समुन्द्रको छालजस्तै हो । कहिले धेरै कहिले थोरै । नेपाली चलचित्र पनि समयअनुसार फ्लप र हिट हुन्छन् । पछिल्लो समयको कुरा गर्नुपर्दा दर्शकको रुचि, चाहना र अपेक्षाविपरीत नेपाली चलचित्र निर्माण हुँदा फ्लप हुन थालेका हुन् । अर्को कुरा, कथालाई गतिलो ढंगले प्रस्तुत गर्न नसक्नु पनि चलचित्र फ्लप हुनुको कारण हो । अब यसबाट चलचित्रकर्मीहरूले पाठ सिकेर दर्शकको चाहना र अपेक्षाअनुरूप चलचित्र निर्माण गर्ने हो भने सुधार आउन सक्छ । 

राजेश हमाल, अभिनेता 

संसारमा सबैभन्दा गाह्रो काम भनेकै चलचित्र बनाउने हो, तर नेपालमा भने सबैभन्दा सजिलो काम चलचित्र निर्माण गर्ने नै भएकाले अधिकांश चलचित्र फ्लप भएका हुन् । अर्को कुरा, नेपालमा हतारमा चलचित्र बनाउने अनि फुर्सदमा पछुताउने चलन छ । हामीले चलचित्रमा समय खर्चेर राम्रो बनाउने अनि राम्रो काम गरेछु भनेर फुर्सदमा खुसी हुनुपर्ने वातावरण बनाउनुपर्छ ।

जितु नेपाल, हास्य अभिनेता 

पहिले–पहिले वर्षमा दुई–तीनवटा चलचित्र बन्थे, जसले गर्दा चलचित्र राम्रो भए पनि नराम्रो भए पनि हिट हुन्थ्यो, तर अहिले महिनैपिच्छे दर्जनौं चलचित्र बनिरहेका छन् । त्यसमा राम्रो चलचित्र चलेका पनि छन्, अलि नराम्रो अनि हतार गरिएका चलचित्र भने फ्लप भएका छन् । 

मिथिला शर्मा, अभिनेत्री 

दर्शकभन्दा धेरै चलचित्र बनेर तथा लगानी गरेर चलचित्रमा अभिनय गर्ने प्रवृत्ति बढेका कारण नेपाली चलचित्र लगातार रूपमा फ्लप हुन पुगेका हुन् । 

बद्री पंगेनी, गायक 

पहिलो कुरा त स्क्रिप्ट नै बलियो नहुनु हो । अर्को कुरा फूलजस्ता सुन्दर कथा उन्ने धागो गतिलो नहुनाले पनि चलचित्र फ्लप भएका हुन् ।

दीपाश्री निरौला, अभिनेत्री 

पहिलो कुरा त कुनै पनि चलचित्र राम्रोसँग निर्माण भएको हुँदैन, तर त्यसलाई राम्रो छ भनेर मिडियाबाजी गरिन्छ अनि अर्को कुरा, राम्रो निर्देशक नभएकाले पनि चलचित्र फ्लप बन्न पुगेका हुन् ।

सञ्चिता लुइँटेल, अभिनेत्री 

दर्शकको माग अनि बजार बुझेर चलचित्र निर्माण नहुनाले नेपाली चलचित्र नियमित रूपमा फ्लप हुँदै आएका छन् । चलचित्र निर्माण गर्दा कास्टमा ध्यान नदिनु पनि यसको अर्को कारण हो । 

असिम शाह, निर्देशक 

हप्तैपिच्छे चलचित्र प्रदर्शन हुनु पनि यसको एउटा कारण हो । अर्को कुरा, स्क्रिप्टमा कम मेहनत अनि चाँडो सुटिङ सिध्याउन हतार गरिन्छ, जसले गर्दा चलचित्र फ्लप होइन सुपर फ्लप हुन पुग्छ । 

शंकर बीसी, निर्देशक तथा मोडल 

मौलिक र यथार्थ विषयलाई आकर्षक ढंगले प्रस्तुत गर्न नसकेकाले नेपाली चलचित्र फ्लप हुन पुगेका हुन् । 

लक्ष्मण शेष, संगीतकार 

गीत–संगीत अनि चलचित्रका सम्बन्धमा केही अध्ययन नै नगरी आँखा चिम्लिएर पैसा फ्याँक्न सक्ने साहुुजीहरूको बिगबिगीले गर्दा नेपाली चलचित्रको यो हालत भएको हो । 

निर्मल शर्मा, अभिनेता 

नेपाली चलचित्र क्षेत्रमा एउटा ब्रान्डले राम्रो चलचित्र बनाउँछ । फलस्वरूप उक्त चलचित्र सुपर हिट हुन्छ । त्यही ब्रान्डलाई पछ्याउँदै अर्कोले त्यस्तै प्रकृतिको चलचित्र बनायो भने त्यो सुपर फ्लप हुन पुग्छ । पछिल्लो समय पनि सबैले एउटा ब्रान्डलाई पछ्याएको र कुनै परिवर्तन ल्याउन नसकेका कारण चलचित्रहरू फ्लप भएका हुन् । 

नीर शाह, अभिनेता 

चलचित्र फ्लप हुने र हिट हुने भन्ने कुरा स्क्रिप्टमा भर पर्छ, तर अहिले स्क्रिप्ट राम्रो भए पनि प्रस्तुतीकरण कमजोर भएका कारण अधिकांश चलचित्र फ्लप भएका छन् ।

दीपेन्द्र के खनाल, निर्देशक 

चलचित्र फ्लप हुने कि हिट हुने भन्ने कुरा दर्शकको हातमा हुन्छ, साथै कथाको पनि उत्तिकै महत्वपूर्ण भूमिका हुन्छ । पहिलेका चलचित्रमा कथा एकदमै राम्रो हुन्थ्यो, तर पछिल्लो समयका चलचित्रमा कथा नै नभएका कारण पनि ती फ्लप हुन पुगेका हुन् । 

भुवन चन्द, अभिनेत्री 

नेपाली चलचित्र नियमितजसो फ्लप हुनुका अनेकन कारण छन् । पहिलो कुरा त हप्तैपिच्छे चलचित्र प्रदर्शन हुनु, चाहिनेभन्दा बढी संख्यामा चलचित्र निर्माण हुनु, त्यसमा पनि राम्रा चलचित्र नहुनुले नेपाली चलचित्र फ्लप हुन्छन् । 

सोभिता सिंखडा, अभिनेत्री 

 

प्रकाशित :माघ ७, २०७५