चट्याङ मास्टरका २ व्यंग्य कविता

  • सरर्रर कार
  • एड्भान्स झ्यालखान

- चट्याङ मास्टर

भाद्र ३, २०७६

सरर्रर कार

सरकारले अब कसैलाई 

भ्रष्टाचार गर्नै दिँदैन 

भ्याएजत्ति भ्रष्टाचार उ आफैं गर्छ,

एउटा छोड्दैन 

सरकार बाहिर बसेर किन गर्नुपर्‍यो भ्रष्टाचार ?

सोझै सरकारसँग हातेमालो गरे हुँदैन ?

 

देश त अब आर्थिक समृद्धितर्फ 

लम्की सकेको छ 

करोडौं करोडको त गाडी मात्रै किनिसकिएको छ 

नेता र जनता गरी 

दुई थरी मानिस छन् देशमा 

नेता जति सम्बृद्ध भै सके अब जनता मात्रै त बाँकी छ 

 

पूरै सिस्टेम्याटिक वैज्ञानिक ढंगले देश चलाउँदै छ सरकार 

त्यसैले त दिनहुँ अनुसन्धानमा करोडौं खर्च गरेको गरै छ 

अरूका अनुसन्धानले नयाँ ग्रह वा सिद्धान्त पत्ता लगाउँछन् 

हाम्रा अनुसन्धानले अपराधी खोजेको खोज्यै छ  । 

दुइतिहाइको सरकार यस्तो द्रुत गतिमा अघि बढ्दैछ 

तस्करी, अपहरण,

हत्या आदि त पछाडि पर्दैछ 

पैदल हिँडेर देश अगाडि बढाउन सक्दै सकिन्न नि 

त्यसैले त भारतको पानीजहाज र चीनको रेल पर्खेको पर्ख्यै छ 

 

सरकारले अब सबै सिन्डिकेट खारेज गर्छ 

पार्टीहरूको सिन्डिकेट सरकार हुँदाहुँदै 

अरुथरिको सिन्डिकेट किन आवश्यक पर्छ ?

एड्भान्स झ्यालखान

लाटो पहिले भ्रष्टाचार गर्छ, 

अनि झ्यालखान पर्छ 

बाठो पहिल्यै झ्यालखान बस्छ

 अनि भ्रष्टाचार गर्छ ।

तरिका यो दोस्रो राम्रो

एड्भान्स भै झ्यालखान गयो त्यागी नेता कहलाई, पछि घिच्नु घिचे भयो ।

पहिले बेइज्जती कमाएर

अनि जेल र नेल भयो 

त्यसपछि बनी नेता, 

मान–इज्जत पनि भयो ।

पदमा बसी भए भ्रष्ट

 झ्यालखान त जानुपर्ने हो 

तर एड्भान्स मै बसेकाले, 

फेरि जान नपर्ने भो ।

प्रकाशित :भाद्र ३, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्