![](http://saptahik-jcss-cdn.ekantipur.com/img/icon/android-chrome-512x512.png)
साप्ताहिक संवाददाता
![अमेरिकाको मेरिल्याण्ड राज्यमा गायक ढकाल सम्मानित अमेरिकाको मेरिल्याण्ड राज्यमा गायक ढकाल सम्मानित](http://saptahik-assets-api.ekantipur.com/thumb.php?src=http://saptahik-assets-cdn.ekantipur.com/uploads/source/news/2019/entertainment/Ram-Krishana-Dhakal-05112019110700.jpg&w=1200&height=800)
नेपाली सुगम संगीतका स्रोताका लागि कर्णप्रिय स्वर हो– गायक रामकृष्ण ढकालको । उनले गाएका गीत सबैखाले स्रोताले उत्तिकै रुचाउँछन् । उनै गायक ढकाल यतिबेला अमेरिकाका विभिन्न शहरमा आफ्ना सांगीतिक प्रस्तुति दिईरहेका छन् । प्रस्तुतिकै क्रममा गायक ढकाललाई अमेरिकाको मेरिल्याण्ड राज्यमा बिशेष सम्मान गरियो ।
लामो समयदेखि नेपाली सांगीतिक क्षेत्रमा क्रियाशिल गायक ढकालले उक्त सम्मानले आफूमा अझैं जिम्मेवारी थपिएको बताए । उनले विदेशी भूमीमा मिलेको उक्त सम्मानपछि भावुक हुँदै भनेका छन्– ‘ नेपाली गीत संगीतको सेवामा लाग्न थप हौसला मिलेको बताए । ढकालले भने, ‘बिदेशमा मिलेको यो सम्मानले गर्दा मैले ठुलो जिम्मेवारीको महशुश गरेको छु ।’
मेरिल्याण्ड राज्यका स्टेट डेलिगेट ह्यारी भण्डारीले मेरिल्याण्ड राज्यका नागरिकका तर्फबाट यो सम्मान प्रदान गरेका हुन् । ढकाललाई भण्डारीले अमेरिका र मेरिल्याण्ड राज्यको झण्डा ओढाउदै एक सम्मान पत्र समेत प्रदान गरेका थिए । ढकाललाई नेपाली गीत संगीतमा लामो समयदेखि सक्रिय रहेको र नेपाली गीत संगीतलाई अन्तराष्ट्रिय क्षेत्रमा पुर्याएको भन्दै सम्मान गरेको सम्मान पत्रमा उल्लेख गरिएको छ ।
ढकाललाई ह्यारी भण्डारीसँगै यस क्षेत्रका अवैतनिक महाबाणिज्य दुत प्रेमराजा महत र एनआरएनएका संस्थापक उपाध्यक्ष डाक्टर श्याम कार्कीले सम्मान गरेका थिए । कार्यक्रममा छोटो मन्तब्य राख्दै डेलिगेट भण्डारीले रामकृष्ण ढकालको कला क्षमताको प्रशंशा गरेका थिए । ह्यारी भण्डारी अमेरिकाको राजनीतिमा सबैभन्दा माथिल्लो तहमा पुगेका एक मात्र नेपाली हुन् ।
महाबाणिज्य दुताबासको तर्फबाट महाबाणिज्य दुत तथा बरिष्ठ लोक गायक प्रेमराजा महतले सम्मान गरेका थिए । सो अवसरमा बोल्दै महतले रामकृष्ण ढकाल संसारभरका लागि नेपाली सांस्कृतिक दुत भएको बताए ।
गायक ढकालले यो सिजनमा अमेरिकाका ५ स्थानमा आफ्नो एकल प्रस्तुति देखाएका छन् । डेढ महिना लामो अमेरिका बसाईमा उनले अमेरिकाको न्यु ह्याम्सायर, आयोवा, लस् एञ्जलस, मिचिगन र मेरिल्याण्ड गरी ५ स्थानमा सांगीतिक साँझ सम्पन्न गरेका छन् । उनी मंगलबार नेपाल फर्कदै छन् ।