विश्व शान्तिका लागि लुम्बिनीको ज्योति भन्ने नाराका साथ बुद्धस्थल लुम्बिनीमा १० लाख दीप प्रज्वलन गरिएको छ । लाइट अ लुम्बिनी रोड अफ डेस्टिनी विद बुद्धिज्म अभियान चीनले लुम्बिनीको मायादेवी मन्दिर, पुष्करणी पोखरी, शान्तिदीप तथा केन्द्रीय नहर आसपासमा उक्त दीप प्रज्वलन गरेको हो । लुम्बिनीको पर्यटन प्रवद्र्धन एवं बुद्ध नेपालमा जन्मिएका हुन् भनेर चिनाउन चीनबाट यो अभियान सुरु गरिएको बताइएको छ । 

गत वर्ष चीनको बेइजिडबाट यात्रा प्रारम्भ गरी संघाई, हङकङ, मकाउ गरी ६० हजार किलोमिटरको दूरी पार गरेर दीप प्रज्वलन टोली लुम्बिनी आएको थियो । यात्राका क्रममा विभिन्न ठाउँका ३ सय ६० बुद्ध बिहारबाट कार्यक्रमको सफलताका लागि संकलित शुभकामना कार्ड पनि यहाँ ल्याइएको थियो । लुम्बिनीमा आयोजित सबै कार्यक्रमको चीनको सरकारी टिभी सिसिटिभी फोरले छायांकन गरेको थियो भने उक्त च्यानलले चाँडै नै लुम्बिनीमा आयोजित कार्यक्रम तथा लुम्बिनीसम्बन्धी वृत्तचित्र प्रदर्शन गर्ने बताइएको छ ।