प्रदेश एकको सम्भावित राजधानीका रूपमा चर्चामा आएको इटहरीमा दोस्रो चरणको स्थानीय तहको निर्वाचनमा कांग्रेस, एमाले, माओवादी तथा राप्रपाबीच मुख्य भिडन्त हुने देखिन्छ । एमालेबाट द्वारिकालाल चौधरी, राप्रपाबाट रोहित कार्की, कांग्रेसबाट रोहित प्रसाईं तथा माओवादी केन्द्रबाट हरिमाया जिमी मेयरका उम्मेदवारका रूपमा मैदानमा छन् । 

नेपाल उद्योग वाणिज्य महासंघका केन्द्रीय सदस्य प्रसाईं नेविसंघबाट कांग्रेसको राजनीतिमा आएका हुन् । इटहरीकै पृष्ठभूमि र राम्रो सामाजिक नेटवर्क भएकाले प्रसाईंले निर्वाचन जित्ने इटहरी कांग्रेसका नेताहरू बताउँछन् । एमाले सुनसरी अध्यक्ष समेत रहेका द्वारिकालाल चौधरी २०४९ र २०५४ को स्थानीय निर्वाचनमा हाल इटहरी उपमहानगरपालिका मै पर्ने हाँसपोसा गाविसमा लगातार दुई कार्यकाल अध्यक्ष चुनिएका थिए । उनी आफ्नो समुदाय र एमाले पार्टीमा सबैबाट रुचाइएका मध्यमार्गी नेताका रूपमा परिचित छन् । इटहरीको खनार क्षेत्रमा लोकप्रिय रोहित कार्की राप्रपा इटहरीका मेयरका उम्मेदवार हुन् । पूर्वमन्त्री रामकुमार सुब्बाको गृहनगर इटहरीमा राप्रपाको राम्रो प्रभाव छ भनिन्छ ।

माओवादी केन्द्र इटहरीले अन्य दलको भन्दा फरक काम गर्दै मेयरमा महिला उम्मेदवार उठाएको छ । युद्धकालमा वीरता किराँतीका रूपमा परिचित हरिमाया जिमीले माओवादी केन्द्रको संगठन एवं महिलाको तटस्थ मतका बलमा जित्ने माओवादी केन्द्रको दाबी छ । उपमेयरमा भने एमालेले लक्ष्मी गौतम, कांग्रेसले विमला ढकाल, राप्रपाले माया रायमाझी एवं माओवादी केन्द्रले सागर सुवेदीलाई मैदानमा उतारेका छन् । यसअघिका स्थानीय तथा अन्य निर्वाचनमा एमालेले आफ्नो वर्चश्व कायम गर्दै आएको इटहरीमा राप्रपा दोस्रो शक्तिका रूपमा देखा पर्दै आएको छ । एमाले आफूले जित्दै आएका पुराना पकेट क्षेत्रहरू जोगाउने अभियान सहित आक्रामक ढंगले चुनाव प्रचारमा लागेको छ भने अन्य दलहरू एमालेको लाल किल्ला तोड्न आक्रामक भएका छन् । इटहरीबाट साझा पार्टीले डा. तारा काफ्लेलाई मेयर र प्रकाशचन्द्र परियारलाई उपमेयरको उम्मेदवार बनाएको छ । 

इटहरीका प्रमुख दलहरू इटहरीलाई १ नम्बर प्रदेशको राजधानी बनाउने मुद्दा आफ्नो घोषणापत्रमा उल्लेख गर्ने तयारीमा छन् ।

इटहरी उपमहानगरपालिका