क्याथे प्यासिफिक अन्र्तगत ड्रागन एयरलाईन्सले हङकङ–नेपालको उडान स्थगित गरेको छ । ट्राभल्स कम्पनीहरुलाई परिपत्र गर्दै क्याथेले ३० अप्रिल २०२० सम्मको लागि अस्थायीरुपमा उडान स्थगित गरेको हो । ड्रागन एयरले मंगलबार आफ्नो अन्तिम उडान काठमाडौं भरेको थियो । 

क्याथेले हप्तामा सोमबार र बिहिबार बाहेक ५ दिन नेपाल उडान भरिरहेको छ । कोभिड -१९ (नोभेल कोरोना) भाईरसको संक्रमण बढिरहेको र त्यसको सम्भावित संक्रमणलाई बढावा नदिनका लागि केहि समय उडान स्थगित गरेको विज्ञप्तिमा उल्लेख गरेको छ । 

हप्तामा तीन दिन (मंगलबार, बिहिबार र शनिबार) उडान भरिरहेको नेपाल एयरलाईन्सले मार्च १९ र २६ मा हङकङ उडान स्थगित गरेको छ । अन्य उडान अवरुद्धको सुचना अहिलेसम्म नआएको कन्ट्री म्यानेजर नवराज उपाध्याय बताउछन् । 

नेपाल जादाँ कोरोना फ्रि प्रमाणपत्र चाहिने

नेपाली पासपोर्टवाहक बाहेक १० मार्चबाट लागू हुनेगरि रिपब्लिक चाईना र प्रशासनिक देशहरु, स्लामिक रिपब्लिक ईरान, रिपब्लिक कोरिया र जापान लगायतका देशहरुबाट नेपाल जादाँ अनिवार्य कोरोना फ्रि प्रमाणपत्र चाहिने नेपाल सरकारले जनाएको छ । 

मार्च १३ बाट लागु हुनेगरि फ्रान्स, जर्मनी र स्पेन लगायतका देशहरुबाट समेत नेपाल प्रवेश गर्नेहरुलाई अनिवार्य कोरोना फ्रि प्रमाणपत्र चाहिने भएको हो । 

हङकङ प्रवेश गर्ने सवैलाई क्वारेन्टाईन 

मार्च १७ बाट लागू हुने गरि हङकङ प्रवेश गर्ने सवैलाई १४ दिन क्वारेन्टाईनमा राखिने भएको छ । कार्यकारी प्रमुख क्यारी लामका अनुसार चिकित्सकको निगरानीमा उनीहरु आफ्नै घरमा क्वारेन्टाईनमा बस्नु पर्नेछ । 

विभिन्न देशहरुबाट हङकङ प्रवेश गरेका मानिसहरुमा कोरोनाको लक्षण देखिन थालेसगै सरकारले अनिवार्य क्वारेन्टाईनको सुचना जारी गरेको हो । मकाउ र ताईवानबाट हङकङ प्रवेश गर्नेहरुका लागि भने यो नियम लागु नहुन सक्छ । 

क्वारेन्टाईनको नियमनसगै हङकङ सरकारले क्वारेन्टाईनमा बसिरहेकाहरुलाई अनिवार्य विद्युतीय रिस्टब्याण्ड लगाईदिएको छ । रिस्टब्याण्डको माध्यमबाट स्वास्थ्य अधिकारीहरुले क्वारेन्टाईन नियम पालन गरे नगरेको अनुगमन गर्नेछन् । 

विश्वब्यापिरुपमा संक्रमण बढेपछि कोरोना भाईरसको कारण हङकङमा ४ जनाको मृत्यु भईसकेको छ भने १६७ जनामा संक्रमण देखिएको छ । हङकङमा रहेका नेपालीहरुमा यो रोगको संक्रमण कमै देखिएको छ ।