नेपालमा हालसम्म ५ जनामा कोरोना संक्रमण देखिएको छ । त्यसमध्ये एक जना निको भएर घर फर्किसकेका छन् भने अन्य चार जनाको विभिन्न अस्पतालका आइसोलेसनमा उपचार भइरहेको छ । हामीले यहाँ ती ब्यक्तिको अहिले कहाँ उपचार भइरहेको छ र स्वास्थ्य अवस्था कस्तो छ भन्नेबारे जानकारी दिँदै छौं । कोरोना संक्रमित चारै जनाको नाम भने गोप्य राखिएको छ । 

दोस्रो व्यक्ति

दोस्रो कोरोना संक्रमण हुने युुवती चैत ४ गते फ्रान्सबाट कतार हुँदै नेपाल आएकी थिइन् । काठमाडौंकी १९ वर्षीया ती युवतीको स्वास्थ्यमा समस्या आएपछि टेकुस्थित शुक्रराज ट्रपिकल तथा सरुवा रोग अस्पतालमा परीक्षणका लागि पुर्याइएको थियो । चैत १० गते उनमा कोरोनाको संक्रमण भएको पुष्टी भयो । अहिले उनको सोही अस्पतालको आइसोलेसनमा वार्डमा उपचार भइरहेको छ । उनको अवस्था सामान्य छ । उनी डाक्टरहरुको प्रत्यक्ष निगरानीमा उपचाररत छिन् ।

तेस्रो ब्यक्ति

कोरोना संक्रमित हुने तेस्रो व्यक्ति धादिङका ३२ वर्षीय युवा हुन् । उनी चैत ६ गते युएईबाट नेपाल आएका थिए । नेपाल आएर ती युवा काठमाडौंको होटलमा बसेका थिए । स्वास्थ्यमा समस्या देखिएपछि उनी ११ गते टेकुस्थित शुक्रराज ट्रपिकल तथा सरुवा रोग अस्पताल पुगे । १२ गते उनमा कोरोना संक्रमण भएको रिपोर्ट आयो । अहिले उनको टेकु अस्पतालमै आइसोलेसन वार्डमा उपचार भइरहेको छ । उनको अवस्था पनि समान्य नै छ ।

चौंथो ब्यक्ति

कोरोना संक्रमणको पुष्टी भएका चौंथो ब्यक्ति धनगढीका हुन् । उनी दुबईबाट दिल्ली हुँदै नेपाल आएका थिए । उनी चैत ६ गते दिल्ली हुँदै ७ गते काठमाडौं आएका थिए । त्यसको भोलिपल्ट उनी काठमाडौंबाट विमानमा नेपालगञ्ज हुँदै त्यहाँबाट सार्वजनिक यातायातमा धनगढी गुगे । ३४ वर्षीय ती युवाको चैत ११ गते स्वास्थ्यमा समस्या आएपछि सेती प्रादेशिक अस्पताल धनगढी पुगेका थिए । केही दिन अस्पतालमा भर्ना भएपछि परीक्षणका क्रममा १५ गते उनमा संक्रमण भएको पुष्टी भयो । उनलाई हाल छुट्टै आइसोलेसन बेडमा राखेर उपचार भइरहेको छ । ती युवाको परिवारले.संक्रमितको राम्रोसँग उपचार हुन नसकेको दुःखेसो पोखेका थिए । चिकित्सकहरु समेत डरले ती युवाको नजिक जान नसकेको उनको परिवारको आरोप छ । तर, अहिले उनको विशेष निगरानीमा उपचार भइरहेको स्वास्थ्य मन्त्रालयले जनाएको छ ।

पाँचौं ब्यक्ति

कोरोना संक्रमण देखिने पाँचौं ब्यक्ति बेल्जियमबाट नेपाल आएकी १९ वर्षीया युवती हुन् । बाग्लुङकी ती युवती चैत ४ गते नेपाल आएकी थिइन् । ११ गते बाग्लुङकै धौलागिरी अस्पतालबाट स्वास्थ्यकर्मीको एक टोली युवतीको घरमै पुगेर थ्रोट स्वाब लिएर गए । १५ गते उनमा कोरोना भएको पुष्टी भयो । अहिले उनी घरमै सेल्फ क्वारेन्टाइनमा छिन् । त्यसपछि घरमै रहेकी उनलाई आइतबार धौलागिरी अस्पतालमा भर्ना गरिएको छ । उनको अवस्था सामान्य रहेको प्रदेश स्वास्थ्य निर्देशक विन्दु शर्माले जानकारी दिइन् । 

स्वास्थ्य मन्त्रालयका प्रवक्ता डा. विकास देवकोटाले पनि उपचारत चारै जनाको स्वास्थ्य अवस्था अहिले समान्य रहेको जानकारी दिए ।

साप्ताहिकसँग कुरा गर्दै उनले भने, ‘उहाँहरुमा त्यस्तो जटिल कुनै समस्या थिएन । संक्रमण देखिदैमा आत्तिइहाल्नुपर्ने अवस्था होइन । अहिले उहाँहरुको आइसोलेसनमा उपचार भइरहेको छ र अवस्था सामान्य रहेको छ ।’ धनगढीको प्रादेशिक अस्पतालमा राम्रो केयर नभएको गुनासो परिवारका सदस्यले गरेपछि मन्त्रालयले राम्रोसँग उपचार गर्न निर्देशन दिएको देवकाटाले जानकारी दिए । अर्को टेस्ट गर्ने र संक्रमण नदेखिए उनीहरुलाई डिस्चार्ज गर्ने मन्त्रालयको तयारी रहेको छ । 

हालसम्म नेपालमा ८ सय ७५ जनामा कोरोना संक्रमण परीक्षण गरिएको छ । जसमध्ये ८ सय ७० जनामा संक्रमण नदेखिएको स्वास्थ्य मन्त्रालयले साप्ताहिकलाई जानकारी दियो ।