नेपालमा थप एकजनामा कोभिड–१९ को संक्रमण पुष्टि भएको छ । चैत ४ गते कतारको दोहाबाट कतार एयरवेजको विमान क्युआर ६५३ मार्फत नेपाल आएका व्यक्तिमा कोरोना भाइरसको संक्रमण देखिएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए । ६५ बर्षीया वाग्लुङकी महिलामा संक्रमणको पुष्टि भएपछि उपचार भइरहेको जनाइएको छ । 

यसअघि पनि उक्त विमानबाट नेपाल आएका दुईजनामा कोरोनाको संक्रमण देखिएको थियो ।

कतारबाट आएका ती व्यक्तिमा कोरोनाको संक्रमण पुष्टि भएसँगै नेपालमा कोरोना संक्रमितको संख्या ६ पुगेको छ । जसमध्ये गत माघमा पुष्टि भएको पहिलो कोभिड–१९ संक्रमित व्यक्ति भने उपचारपछि निको भएर घर फर्किसकेका छन् । उनी चीनको वुहानबाट फर्किएका पुरुष थिए । 

दोस्रो संक्रमण ४ चैतमा फ्रान्सबाट कतार हुँदै काठमाडौं आएकी एक विद्यार्थीमा देखिएको थियो । उनमा १० चैतमा कोभिड–१९ पोजेटिभ पुष्टि भएको थियो । उनको अहिले टेकुस्थित शुक्रराज ट्रपिकल तथा सरुवा रोग अस्पताल, टेकुमा उपचार भइरहेको छ । 

तेस्रो संक्रमण १२ चैतमा युएईबाट आएका धादिङका ३२ वर्षीय युवामा पुष्टि भएको थियो । उनी ६ चैतमा नेपाल आएका थिए । ती व्यक्तिको पनि शुक्रराज ट्रपिकल तथा सरुवा रोग अस्पतालमै उपचार भैरहेको छ । 

चौथो संक्रमित व्यक्तिमा १४ चैतमा कोभिड–१९ को संक्रमण पुष्टि भएको थियो । ३४ वर्षीय ती युवा दुबईबाट नयाँदिल्ली हुँदै ७ चैतमा काठमाडौं ओर्लिएका थिए । त्यसपछि उनी भोलिपल्ट प्लेनबाट नेपालगन्ज र त्यहाँबाट हायसमा धनगढी पुगेका थिए । उनी धनगढीस्थित सेती प्रादेशिक अस्पतालमा ११ चैतमा उपचार गर्न भर्ना भएका थिए । उनको अहिले सेती अस्पतालमै उपचार भैरहेको छ ।

यसअघि पाँचौं संक्रमित व्यक्तिमा १५ चैतमा कोभिड–१९ को संक्रमण पुष्टि भएको थियो । १९ वर्षिया युवती बेल्जियमबाट कतार हुँदै नेपाल आएकी थिइन् । उनी पनि चैत ४ गते दोहाबाट क्युआर ६५२ फ्लाइटबाटै काठमाडौं आएकी थिइन् ।