नेपालमा थप दुई जनामा कोरोना ( कोभिड–१९) संक्रमण देखिएको छ । सोमबार स्वास्थ्य तथा जनसंख्या मन्त्रालयले नेपालमा कोभिड १९ का थप दुई नयाँ संक्रमित फेला परेको पुष्टी गरेको हो । यी दुई नेपालमा देखिएका कोभिड–१९ का तेह्रौ र चौधौं संक्रमित हुन् । 

स्वास्थ्य मन्त्रालयको नियमित पत्रकार विफ्रिङमा प्रवक्ता डा. विकास देवकाटाले कैलालीको लम्की चुहा नगरपालिकामा थप एक ६५ वर्षीया महिलामा कोभिड–१९ पोजेटिभ देखिएको जानकारी दिए । यस्तै, उनले रौतहतमा क्वारेन्टाइनमा बसिरहेका एक १९ वर्षीय युवकमा पनि कोभिड–१९ पोजेटिभ पुष्टी भएको बताए । उनीहरुमध्ये कैलाली लम्की चुहाकी ६५ वर्षीया महिलाको धनगढीस्थित सेती प्रादेशिक अस्पतालमा उपचार थालिएको छ भने रौतहटका १९ वर्षीय युवकलाई क्वारेन्टाइनबाट अस्पताल लिने तयारी थालिएको डा. देवकोटाले बताए ।  

प्रवक्ता डा. देवकोटाले नेपालमा कोभिड–१९ को संक्रमितको संख्या १४ पुगेको बताउँदैं सबैलाई होम क्वारेन्टाइनमा बस्न र लकडाउनको पूर्ण पालना गर्न समेत आग्रह गरे ।  

नेपालमा पहिलो पटक गत माघमा पहिलो कोभिड–१९ संक्रमित व्यक्ति भेटिएका थिए । चीनको बुहानबाट फर्किएका उनी उपचारपछि निको भएर घर फर्किसकेका छन् । 

दोस्रो संक्रमण ४ चैतमा फ्रान्सबाट कतार हुँदै काठमाडौं आएकी एक नेपाली महिला विद्यार्थीमा देखिएको थियो । उनमा १० चैतमा कोभिड–१९ पोजेटिभ पुष्टी भएको थियो । उनको अहिले टेकुस्थित शुक्रराज ट्रपिकल तथा सरुवा रोग अस्पतालमा उपचार भैरहेको छ । 

तेस्रो संक्रमण १२ चैतमा युएईबाट आएका धादिङका ३२ वर्षीय युवामा पुष्टी भएको थियो । उनी ६ चैतमा नेपाल आएका थिए । ती व्यक्तिको पनि शुक्रराज ट्रपिकल तथा सरुवा रोग अस्पतालमै उपचाररत छन् । 

चौथो कोभिड–१९ पुष्टी १४ चैतमा धनगढीका एक युवामा भएको थियो । ३४ वर्षीय ती युवा दुबईबाट नयाँदिल्ली हुँदै ७ चैतमा काठमाडौं ओर्लिएका थिए । त्यसपछि उनी भोलिपल्ट प्लेनबाट नेपालगन्ज र त्यहाँबाट हायसमा धनगढी पुगेका थिए । उनको धनगढीस्थित सेती प्रादेशिक अस्पतालमा ११ चैतमा उपचार गर्न भर्ना भएका थिए । उनको अहिले सेती अस्पतालमै उपचार भैरहेको छ ।

पाँचौ कोभिड चैत ४ को फ्लाइटमा बेल्जियमबाट फर्किएकी बाग्लुङकी एक १९ वर्षीया युवतीमा कोभिड–१९ संक्रमण पुष्टी भएको थियो । उनमा १५ चैतमा कोभिड–१९ पुष्टी भएको थियो । उनको बाग्लुङस्थित धौलागिरी अस्पतालमा उपचार भैरहेको छ । 

छैटौं कोभिड–१९ संक्रमित २० चैतमा पुष्टी भएको थियो । पाँचौ संक्रमित भेटिएको ५ दिनपछि दिनपछि चैत २० गते नेपालमा छैटौ कोभिड–१९ संक्रमित भेटिएकी थिइन् । उनी पनि बेल्जियमबाट आएकी बाग्लुङकी युवतीकी नातेदार थिइन् । उनको पनि धौलागिरी अस्पतालकैं आइसोलेसनमा उपचार भैरहेको छ । फ्रान्सबाट फर्केकी संक्रमित विद्यार्थी, बेल्जियमबाट फर्केकी युवती र ती वृद्धा दोहाबाट क्युआर ६५२ फ्लाइटबाट काठमाडौं फर्केका थिए । 

चैत २२ मा एकैदिन नेपालमा सातौ, आठौं र नवौं कोभिड–१९ केस पुष्टी भएको थियो । मुम्बईबाट फर्किएका कैलालीका एक २१ वर्षीया पुरुष, उत्तराखण्डबाट फर्किएका कन्चनपुरका ४१ वर्षीया अर्का पुरुषमा कोभिड १९ पुष्टी भएको थियो । सोही दिन पहिलो पटक नेपालमा कैलालीकै ३४ वर्षीया एक महिलामा पनि कोरोना संक्रमण पुष्टी भएको छ । ती महिला १४ चैतमा धनगढीमा कोरोना पोजेटिभ देखिएका दुबईबाट फर्किएका युवककी आफन्त थिइन् । धनगढीकी स्थानीय महिलामा कोभिड–१९ पुष्टी भएसँगै नेपालमा स्थानीय व्यक्तिमा पहिलो पटक कोभिड–१९ संक्रमण देखिएको थियो । उनीहरु तिनैको सेती प्रादेशिक अस्पतालको आइसोलेसनमा उपचार भैरहेको छ । 

त्यसपछि, ३० चैतमा दशौं, एघारौं र बाह्रौं केस देखियो । भारतबाट आएर पर्साको वीरगन्जको छपकैयास्थित मस्जिदमा शंकास्पद रुपमा बसिरहेका २१ जनामध्ये तीन जना भारतीय नागरिकमा कोभिड–१९ पोजेटिभ देखियो । स्वास्थ्य मन्त्रालयकाअनुसार कोभिड–१९ पोजेटिभ देखिएका भारतीयहरु ३७, ४४ र ५५ वर्षका पुरुष हुन् । उनीहरुको वीरगन्जस्थित नारायणी अस्पतालको आइसोलेसनमा उपचार भैरहेको छ ।  

कोभिड–१९ पोजेटिभ पुष्टी भएका १४ मध्ये ५ जना सेती प्रादेशिक अस्पताल, २ जना टेकुस्थित शुक्रराज ट्रपिकल तथा सरुवा रोग अस्पताल, २ जना बाग्लुङस्थित धौलागिरी अस्पताल र ३ जनाको पर्साको नारायणी अस्पतालमा उपचार भैरहेको छ । एक जना उपचारपश्चात ठीक भएर घर फर्किसकेका छन् भने रौतहटको क्वारेन्टाइनमा पोजेटिभ पुष्टी भएका १९ वर्षीय युवकलाई अस्पताल लग्ने तयारी भैरहेको स्वास्थ्य मन्त्रालयले जनाएको छ ।