रेडियो नेपालकी प्रथम गायिका रानुदेवी अधिकारीको निधन भएको छ । अधिकारीको काठमाडौंस्थित केएमसी अस्पतालमा ८३ वर्षको उमेरमा बिहिबार राती निधन भएको हो । अधिकारीको बिहिबार रातीनै अन्त्यष्टि गरिएको छ । अल्जाइमर्स र पार्किन्सन्सबाट पीडित रानुदेवीलाई बिहीबारनै अस्पताल लगिएको थियो । अस्पताल लगिएको केहीबेरमा उनको निधन भएको हो ।

वीरगन्जमा सन् १९३६ नोभेम्बर २७ मा जन्मिएकी रेडियो नेपालकी प्रथम गायिका रानुदेवीले विसं २००६ सालमा पहिलोपटक ६ वटा गीत रेकर्डिङ गरेकी थिइन् । २००७ सालअघि क्रान्तिका बेला तारिणीप्रसाद कोइरालाको अगुवाइमा प्रजातन्त्र रेडियो स्थापना भएको थियो । विराटनगरको जुट मिल्समा २००४ सालमा स्थापना गरिएको उक्त रेडियोमा गाउन रानुदेवीलाई २००६ सालमा तारिणीप्रसादले नै प्रोत्साहन गरेका हुन् । रानुदेवीले रेडियो नेपालको स्थापनाकालदेखि गीत गाएकी हुन् । 

भारतको वाराणसीमा शास्त्रीय संगीत अध्ययन गरेकी उनका ‘जुनेली रात हजुर’, ‘जाग नेपाली’, ‘मेरो मुटुको माँझ कसको तस्विर’, ‘तिमी दूर देशका परदेशी’, ‘फागुको शितल बतास’ लगायत गीत  लोकप्रिय छन् ।

२०६३ सालमा उनीबारे ‘५६ वर्षपछि...’ नामक सांगीतिक वृत्तचित्र बनाइएको थियो । उक्त वृत्तचित्र पत्रकार तथा गीतकार शंकर खरेल र गायक तथा संगीतकार सुमित खड्काले बनाएका हुन् । उनका छोरा अविन र छोरीहरू अर्चना तथा अल्पना छन् ।