नेपालले अफगानिस्तानलाई ३–२ गोल अन्तरले पराजित गर्दै साफ यू–१९ च्याम्पियनशिपको फाइनलमा प्रबेश गरेको छ । 

सातदोवाटोस्थित एन्फा कम्प्लेक्समा भएको पहिलो सेमिफाइनलमा नेपाली खेलाडीहरुले पहिलो हाफको ३४ औं मिनेटमा गोल गरेर अग्रता लिएका थिए । अन्जन विष्टले हेड मार्फत् पहिलो गोल गरेको दुई मिनेटमा अर्को एक गोल गरेर नेपालको अग्रतालाई २–० मा कायम गरेका थिए । 

दोस्रो हाफको शुरुमै अनन्त तामाङले बल क्लियर गर्न खोज्दा आत्मघाती गोल भएको थियो । तर नेपालका सुनिल बलले फ्रि किकमा सुन्दर गोल गरेर नेपालको अग्रता ३–१ मा पुर्‍याएका थिए । ७२ औं मिनेटमा अफगानिस्तानका खेलाडी मेहदी रेजाइले गोल गरेर खेललाई ३–२ को स्थितीमा पुर्‍याएका थिए ।